TÜRK MİLLƏT VƏKİLİ AKP-ni ERMƏNİSTANLA ƏLAQƏLƏRƏ SON QOYMAĞA ÇAĞIRDI Canan Arıtman: “Bu şərtlər altında İrəvanla münasibətlər qurmaq Atatürkdən vaz keçməkdir” Xarici işlər naziri Əli Babacanın Ankara ilə İrəvan arasındakı danışıqlarla bağlı Türkiyə Böyük Millət Məclisinə (TBMM) çağırılması tələbi qüvvədədir. Bu barədə “Yeni Müsavat”a dünən telefon söhbətində Ə.Babacanın Ermənistanla aparılan danışıqlar haqda TBMM-də hesabat verməsi tələbini gündəmə gətirən Cümhuriyyət Xalq Partiyasından (CXP) olan millət vəkili Canan Arıtman deyib. Qarşıdan gələn bələdiyyə seçkiləri ilə bağlı təbliğat kampaniyası aparmaq üçün hazırda İzmirdə olduğunu söyləyən millət vəkili deyib ki, Ə.Babacanın parlamentə çağırılması üçün aparılan işi daha da genişləndiriblər. Amma obyektiv səbəblərdən Türkiyə XİN başçısının yaxın vaxtlarda parlamentdə hesabat verməsi mümkün deyil. Çünki martın 29-da bu ölkədə keçiriləcək parlament seçkiləri ilə əlaqədər TBMM tətilə çıxıb: “Bu səbəbdən də ən azı parlament tətildən qayıdanadək Əli Babacanın parlamentə çağırılması mümkün deyil. Amma biz görürük ki, hər gün Türkiyə iqtidarı ilə Ermənistan arasındakı təmaslar daha da artır. Buna görə də, xarici işlər nazirinin hökumət adından açıqlama verməsi lazımdır. Odur ki, mən bir millət vəkili olaraq Əli Babacanla görüşərək bu məsələni müzakirə etmək istəyirəm. Ən azı nazir bir millət vəkili olaraq mənim narahatlığımı bölüşməli və görüş təşəbbüsünü qəbul edərək mənə açıqlama verməlidir. Ümid edirəm ki, xarici işlər naziri ilə görüşüb bu məsələ ilə bağlı ondan hər hansı bir açıqlama ala biləcəm”. Qeyd edək ki, C.Arıtman Ə.Babacanın parlamentə çağırılması ilə bağlı TBMM-nin xarici işlər komissiyasında məsələ qaldırarkən AKP-dən olan millət vəkillərinin etiraz etməsi səbəbindən qalmaqal yaranmışdı. Son vaxtlar Türkiyə ilə Ermənistan arasında əlaqələrin daha da genişlənməsi, İstanbul-İrəvan-İstanbul təyyarə reyslərinin həftədə 3 dəfəyə çatdırılması, Ermənistanın 2008-ci ildə iki ölkə arasında ticarət dövriyəsinin həcminin 185 milyon manatdan çox olması barədə verdiyi açıqlamalar və ötən il Türkiyədən Ermənistana 11 min iri yük maşının getməsi barədə yayılan məlumatlarla bağlı isə CXP-dən olan millət vəkili bunları deyib: “Ermənistana münasibətdə bizim tələblərimiz dəyişməyib. Öncə işğal altındakı Azərbaycan torpaqları azad olunmalı, qaçqınlar yurdlarına qayıtmalı, Ermənistan Türkiyənin sərhədlərini tanımalı və uydurma soyqırım iddialarından əl çəkməlidir. Bunun xaricində Ermənistanla hər hansı ticari-siyasi əlaqələr qurmaq, sərhədləri açmaq Türk dünyasının maraqlarından, Atatürkdən vaz keçməkdir və xəyanətə bərabər bir addımdır. Təəssüflər olsun ki, AKP iqtidarı bizi və Azərbaycandakı qardaşlarımızı üzməkdə davam edir. Mən öz adımdan və Cümhuriyyət Xalq Partiyası adından AKP-ni bu şərtlər altında Ermənistanla əlaqələrə son qoymağa çağırıram”.