Utandım . Orxan Aras Almaniya

SON XƏBƏRLƏR

Utandım . Orxan Aras Almaniya

2021.10.20, 07:36

Gunaz.tv

Utandım

Orxan Aras Almaniya Martın altısında Azərbaycanın yetişdirdiyi böyük öndərlərdən biri olan Məmməd Əmin Rəsulzadənin ölümünün ildönümü idi. Vəfat edəndə yanında olanlar onun üç dəfə “Azərbaycan, Azərbaycan, Azərbaycan” deyərək son nəfəsini verdiyini söyləyirlər. Bir anlıq belə Azərbaycanı dilindən düşürməyən, ölümləri, zülmləri, sürgünləri gözə alan igid atam! Azərbaycanın Milli Məclisində sənin xatirənə hörmət əlaməti olaraq anım üçün hər kəs ayağa durarkən iki millət vəkilinin ayağa durmadığını eşitdim, utandım. Qədirbilməzlik bizim millətin ruhunu da fəth etdiyini anladım, utandım. Keçmişinə və ağsaqqalına hörmət etməmək bizi də əsir aldığını dedim, utandım. Təkcə öz əvəzimdən utanmadım. Bu milləti millət halına gətirmək üçün başını cəlladların önünə uzadanların əvəzindən utandım. Bayrağımıza rənglərini sən verdin! Onun asılı olduğu Milli Məclisdə bunlar yaşandı deyə utandım. Təkcə sənə görə deyil, niyə bu qədər biganə olduq deyə yandım, yandım, utandım. Bu laqeyidlikləmi düşmənə qələbə çalacağıq deyə qorxdum, utandım. Hörmətin də yerlərdə süründüyünü gördüm, utandım. Gələcəyimizə, gənc nəsillərimizə hansı mirası ötürəcəyik deyə düşündüm, utandım. Keçmişinə sahib çıxmayanların gələcəyinə də sahib çıxmayacağını bildiyimdən utandım. “Bir daha yüksələn bayraq bir daha enməz” deyən səsini içimdən eşitdim, utandım. 1918 – 1920-ci illərdə ölkəmizi işğal etmək istəyən alçaqlarla savaşa – savaşa çəkinmədən qan tökmüş azərbaycanlı və türkiyəli şəhidlərdən utandım. Vətən üçün əziyyətlə oğul yetişdirən gözüyaşlı analarımızdan, vətənə gözətçilik edən başı qarlı dağlarımızdan, torpaqlarımızı sərinlədən göllərimizdən, çaylarımızdan utandım. Mən utandım, dostlar! Minlərlə kilometr uzaqda, qürbətdə içimdəki həsrətlə, üsyanla, eşqlə ağladım və utandım. Rəhmətlik atamın ”ağsaqqalına hörməti olmayanın Tanrıya da hörməti olmaz” sözünü xatırlayıb utandım, utandım. Mən ürəyimin sevdası olan Azərbaycanda yaşamasam da, orada yaşayıb, oranın duzunu, çörəyini yeyib utanmayanların əvəzindən də utanıram!

GUNAZ.TV

SON XƏBƏRLƏR