ABŞ-ın cari siyasətinə dair "ip ucları" Ötən gün ABŞ-ın Azərbaycandakı səfiri Ann Dersi diqqət çəkən açıqlamalar verib. O bildirib ki, Qəbələ Radiolokasiya Stansiyası (RLS) Azərbaycana məxsus olan bir obyektdir və Azərbaycanın iştirakı olmadan ondan yararlanmaq mümkün deyil. Ona görə də rəsmi Bakı ilə bu istiqamətdə mütləq müzakirə aparılmalıdır. Səfir ABŞ-ın xarici radioların Azərbaycanda yayımı üçün qanuni qərarın qəbulunda maraqlıdır və bu istiqamətdə fəaliyyətini davam etdirdiyini söyləyib. Ann Dersi deyib ki, Ümumdünya Ticarət Təşkilatına nə qədər tez üzv olsa, Azərbaycan iqtisadiyyatı, xüsusilə qeyri-neft sektoru bir o qədər sürətlə inkişaf edər. Vaşinqton da ÜTT-yə üzvlüyümüzü dəstəkləyir. ABŞ səfiri regiondakı proseslərə münasibətini də açıqlayıb. Onun sözlərinə görə, Gürcüstanın məruz qaldığı müdaxilə və işğal Qafqazda regional sabitlik və təhlükəsizliyə dair yeni sualları gündəmə gətirib. Bu cür siyasi qeyri-müəyyənlik şəraitində ABŞ Azərbaycanın güclü tərəfdaşı olaraq qalmaq niyyətindədir. "Biz Azərbaycanla enerji, regional və qlobal təhlükəsizlik daxil olmaqla mühüm sahələrdə maraqlarımızı bölüşürük. Bu gün Azərbaycanın və Xəzər regionunun qaz ehtiyatlarının müstəqil tərzdə dünya bazarlarına çıxarılması üçün yeni boru xətlərinin inkişafı üzərində işləyirik". Ekspertlərə görə, səfirin son açıqlaması əslində Barak Obama adminstrasiyasının Cənubi Qafqaz və Azərbaycana münasibətdə yürüdəcəyi cari siyasətin elementləridir. Ancaq müşahidəçilər sadalananlar fonunda ABŞ-ın Cənubi Qafqaz regionunda fəallaşacağını göstərən məqamlar tapmaqda da çətinlik çəkirlər. Məsələn, "Atlas" Araşdırmalar Mərkəzinin rəhbəri Elxan Şahinoğlu deyir ki, səfirin fikirləri növbətçi açıqlamalardır və o, bu sözləri əvvəllər də dilə gətirib. Elxan Şahinoğlu hesab edir ki, dünyada vəziyyət kifayət qədər qəlizdir, digər tərəfdən, qlobal maliyyə böhranı özünü sərt şəkildə göstərir. Barak Obama adminstrasiyası üçün də əsas məsələ hələlik qlobal maliyyə böhranının aradan qalxmasına nail olmaqdır. Vaşinqton həm də Rusiyayla təmaslara yol axtarır: "Belə bir ərəfədə prezident Barak Obamanın və onun adminstrasiyasının diqqətini Azərbaycan kimi ölkələrə yönəldəcəyini proqnozlaşdırmıram. Konkret misal da göstərmək olar. Qərb radiostansiyalarının yayımı FM dalğalarından çıxarıldı. Bundan sonra ABŞ elə bir ciddi addımlar atmadı. Azərbaycan hakimiyyətinə bir təklif oldu, amma təklifə də rəsmi Bakı davranışıyla əslində yox dedi, ABŞ-da isə hələ cavab gözləyirlər. Ümumiyyətlə, Barak Obamanın Cənubi Qafqaz və Azərbaycan siyasətindən danışmaq hələ tezdir. Barak Obama hələ ki, böyük problemlərlə məşğuldur". Elxan Şahinoğlu onu da vurğuladı ki, bölgədə Moskva daha aktivdir, ABŞ bir qədər gecikir. Rusiya daim regiona yeni təkliflərlə gəlir, rus rəsmilərinin Bakı səfərlərinin intensivliyi göz önündədir. Azərbaycan qazının tamamilə alınması, Qəbələ RLS-lə bağlı təkliflər də bu sıradadır. Rəsmi Bakı da bu təklfiləri analiz etmək məcburiyyətində qalır. Amma ABŞ-dan bölgədəki vəziyyət, yaxud yeni regional layihələrlə bağlı hələ yeni təklif eşidilməyib: "Bir daha təkrarlayıram ki, Ann Dersinin söylədikləri növbətçi xarakterli açıqlamalardır. Arxiv materiallarına baxsaq, səfir bu sözləri iki il öncə də deyib". Ramiz Mikayıloğlu