Həmsədrlər həyasızlaşır Akif Nağı: "ABŞ və Rusiya Qarabağ münaqişəsini uzunmüddətli dondurmaqla bağlı razılaşıblar" ATƏT-in Minsk qrupunun həmsədrləri yenidən Bakıya dönüblər. Qeyd edək ki, diplomatlar regiona səfəri də Azərbaycandan başlayıblar. Fevralın 26-da Bakıya gələrək prezident və xarici işlər nazirləriylə danışıqlar aparıb, fevralın 27-də İrəvana yola düşüblər. Ancaq Ermənistan paytaxtında görüş keçirmədən Dağlıq Qarabağa gəlib, bazar günü Xankəndində separatçı rejimlərin rəhbərləriylə görüşüblər. Erməni mətbuatı yazır ki, Xankəndində jurnalistlərə açıqlama verən amerikalı həmsədr Minsk qrupunun həmsədrləri arasında ziddiyyətlər olduğu haqda xəbəri təkzib edib. O deyib ki, həmsədrlər öz addımlarını və fəaliyyətlərini bir-biri ilə razılaşdıraraq vahid komanda kimi işləyirlər. Rusiyalı həmsədr Yuri Merzlyakov bildirib ki, bəzən onlardan kimsə xəstəliyi, vaxtının olmaması, ya da digər səbəblərə görə regiona gəlməyə bilər. Ramiz Mikayıloğlu Ancaq onlar bir-birlərinə etibar edərək ayrılıqda səfərlərə də xeyir-dua verirlər. Dağlıq Qarabağdakı qondarma rejimin rəhbəri Bako Saakyanla görüşdən sonra həmsədrlər bəyanlayıblar ki, Xankəndinin iştirakı olmadan yekun razılaşma əldə edilməyəcək, ona görə də gec-tez danışıqlara qoşulması zərurəti yarana bilər. Həmsədrlər Azərbaycan prezidenti İlham Əliyev və Ermənistan prezidenti Serj Sərkisyan arasında Sürixdə aparılmış danışıqlar haqqında bütün məlumatları da Bako Saakyana təqdim etdiklərini nəzərə çatdırıblar. Dağlıq Qarabağın vəziyyəti, iqtisadi və sosial planlar haqqında da Bako Saakyanın məlumatlarını məmnunluqla dinləyiblər. Xankəndində həmsədrlər qeyri-hökumət təşkilatlarının təmsilçiləriylə də görüş keçiriblər. Daha sonra İrəvana dönüblər və martın 2-də prezident Serj Sərkisyan və Ermənistanın xarici işlər naziri Edvard Nalbəndyanla bir araya gəliblər. İndi də Bakıdadırlar. Metya Brayza, Yuri Merzlyakov və onların fransalı həmkarları Bernar Fasyenin Xankəndindəki davranışları göstərir ki, artıq ATƏT-in Minsk qrupunun həmsədrləri korrupsiyalaşmış qrupa çevrilib və nəinki təmsil etdikləri dövlətlərin, artıq onların özlərinin də şəxsi maraqları üst-üstə düşür. Məsələ ilə bağlı fikirlərini öyrəndiyimiz Qarabağ Azadlıq Təşkilatının (QAT) sədri Akif Nağı deyir ki, uzun müddət hər dövlətin öz maraqlarını qabartmağa çalışması Minsk qrupunun həmsədrlərinin fəaliyyətinə mane olub. Xüsusən ABŞ və Rusiya arasında belə bir qarşıdurma özünü göstərib. Amma son il yarım ərzində hər üç həmsədr dövlətin sanki Qarabağ məsələsində bir razılığa gəldikləri hiss olunur. Bu razılaşmanın kökündə də o dayanır ki, Qarabağ problemi uzun müddət ərzində dondurulmuş vəziyyətdə saxlanılsın. QAT sədri hesab edir ki, həmsədrlər "bir komandayıq" deyəndə məhz həmin razılığı nəzərdə tuturlar: "Bəlkə də Metyu Brayza özündən asılı olmayaraq, həmin daxili razılığı "bir komandayıq" deməklə əks etdirir. Çünki Vaşinqtonla Moskva arasında çox kəskin maraq sədləri var. Bu, Qarabağ məsələsinə də aiddir. Bir ara ABŞ çalışırdı ki, Qarabağ problemini Ermənistanın tələblərinə uyğun həllinə nail olsun və İrəvanı Rusiyanın təsirindən çıxarsın. Amma hesab edirəm Gürcüstan hadisələrindən sonra görünür ki, Vaşinqton Qarabağ məsələsinin ümumiyyətlə, tərpədilməməsinə üstünlük verib. Yəni necə var, o şəkildə də müəyyən bir vaxta qədər saxlanılmasını məqbul sayıb. Müəyyən vaxtdan sonra Azərbaycanda, yaxud Ermənistanda ciddi dəyişikliklər baş verərsə, o dəyişikliklərə də uyğun hərəkət edilsin". Akif Nağı onu da qeyd etdi ki, uzun müddət ABŞ Dağlıq Qarabağdakı separatçı qurumun danışıqlara tərəf kimi qoşulmasına həvəs göstərməyib. Bu istiqamətdə daha çox Rusiya təkid edib. İndi hiss olunur ki, Vaşinqton da Moskvanın həmin mövqeyilə razılaşır, ən azından mane olmamağa çalışır: "Bu yöndə də onların arasında bir anlaşmanın mövcudluğu nəzərə çarpır. Həmsədrlərin Bakı-Xankəndi-İrəvan-Bakı marşurutu belə bir təsəvvür yaradır ki, guya hansısa konkret məsələ ortada var. Həmin məsələni də həm Bakıda, həm İrəvanda razılaşdırmaqla hansısa konkret nəticəni ortaya qoymağa çalışırlar. Səfərlər belə intensiv şəkildə həyata keçirilirsə, ola bilər ki, nə isə olsun. Ola bilər ki, hansısa detalla bağlı Bakı və İrəvanın razılığını almağa çalışırlar. Amma mən inanmıram ki, nəticə əldə olunsun. Ola bilər ki, ABŞ Rusiyanın maliyyə böhranı nəticəsində çökməsini, mövqeyinin zəifləməsini də gözləsin. İstənilən halda problemin dondurulumuş şəkildə saxlanılması perspektivi daha çox real görünür".