İRAN AZƏRBAYCAN ÜZƏRİNDƏN VURULACAQ Amerika generali Çak Uayld: “Əminəm ki, hərbi əməliyyatlar başlasa Azərbaycan ərazisindən istifadə olunacaq” İranın nüvə silahı əldə etməyə yaxınlaşdığı haqda xəbərlərin yayılmasından sonra bu ölkəyə qarşı hərbi əməliyyatların mümkünlüyü haqda müzakirələr yenidən başlayıb. Amerika ordusunun generalı, Əfqanıstanda hava əməliyyatlarına komandanlıq etmiş Çak Uayld Amerika saytlarından birinə açıqlamasına bildirib ki, ABŞ-ın hazırda İrana qarşı hərbi əməliyyatlara başlamaq imkanında olmadığı haqda son vaxtlar geniş yayılmış fikirlərin əsası yoxdur: “Mən birbaşa bəyan edə bilərəm ki, bizim İrana qarşı elə bu gün hərbi əməliyyatlara başlamaq imkanımız var”. General əlavə edib ki, ABŞ İrana qarşı hərbi əməliyyatlara başlasa, mütləq Azərbaycan kimi qonşu ölkələrin ərazisindən istifadə edəcək. Vaşinqtondakı Hudzon İnstitunun baş analitiki Riçard Veysin məqaləsində xatırladılır ki, bu günlərdə yüksək rütbəli Amerika hərbi rəsmisi İranın nüvə başlığı hazırlamaq üçün kifayət qədər zənginləşdirilmiş urana malik olduğunu açıqlayıb. Bu məlumat Atom Enerjisi üzrə Beynəlxalq Agentlyin hesabatlarında da təsdiq olunur. Amerika silahlı qüvvələrinin qərargah rəisləri komitəsinin rəhbəri admiral Maykl Müllenin bəyan etdiyinə görə, Tehran nüvə silahı əldə etməyə çox yaxındır. O, nüvə silahına malik İranın region və dünya üçün çox pis nəticə olacağını da bildirib. “Amerika hərbi rəhbərliyinin bu qənaəti prezident Barak Obamanın potensial İran təhlükəsinə qarşı qəti tədbirlər görməyə sövq edə bilər. Obama güc tətbiqi variantından imtina etməyib, ancaq aydın şəkildə bəyan edib ki, məsələnin siyasi yolla həllinə üstünlük verir. Ancaq İrana dair müstəqil ekspert qrupunun araşdırmaları göstərir ki, İranın nüvə təhlükəsini siyasi yolla önləmək çətin olacaq”, - deyə məqalədə bildirilir. 2001-ci ildə ABŞ-ın Əfqanıstanda apardığı hərbi əməliyyatlar zamanı hava əməliyyatlarına komandanlıq etmiş general Çak Uayld isə İrana qarşı güc tətbiqi variantının masa üzərində qalmasını vacib hesab edir. General deyib ki, son zamanlar ABŞ-ın İrana qarşı indiki vəziyyətdə hərbi əməliyyatlara başlamaq və nəticə əldə etmək imkanında olmadığı haqda geniş yayılmış fikirlərin əsası yoxdur. “Mən birbaşa deyə bilərəm ki, ABŞ-ın İrana qarşı elə bu gün hərbi əməliyyatlara başlamaq və onları regional təhlükə olmaqdan uzaqlaşdırmaq üçün kifayət qədər imkanları var” deyə Uayld bildirib. Bununla belə, Uayld güc tətbiqinin ən son variant kimi nəzərdən keçirildiyini bildirib. Ancaq bu varianta əl atılsa general əmindir ki, Birləşmiş Ştatlar Azərbaycan, Türkiyə və körfəz ölkələrindən əməliyyat dəstəyi alacaq. Onun sözlərinə görə, bu dəstək İrana qarşı hava zərbələrinin effektiv olmasına imkan verəcək. “Lakin müstəqil ekspertlər bu fikrə şübhə ilə yanaşırlar. Xüsusən ona görə ki, Azərbaycan İrana qarşı hədələyici jest kimi qiymətləndirilən hər hansı addım atmaq həvəsində olmadığını bildirir”, - deyə məqalədə vurğulanır. Qeyd edək ki, İrana qarşı hərbi əməliyyatlarda Azərbaycan ərazisindən istifadə olunması birinci dəfə deyil gündəmə gəlir. Artıq məlumdur ki, Pentaqonda İrana qarşı hərbi əməliyyatları planlaşdıranlar Azərbaycan xəritəsi üzərində də işləyiblər və hansı nöqtələrdən hava zərbələri üçün istifadə oluna biləcəyini nəzərdən keçiriblər. Eyni zamanda Pentaqon İranın Azərbaycana qarşı cavab hücumlarına qarşı da hazırlıqlar görür. Məsələn, bu yaxınlarda məlum olmuşdu ki, Amerikanın aparıcı hərbi kolleclərindən birində 1000-ə yaxın zabitin iştirakı ilə Azərbaycanı cənubdan hücum etmiş “Ahuristan” şərti adlı ölkənin qüvvələrindən azad etmək üçün komanda qərargah təlimləri keçirilib. Bir həftəyə yaxın davam edən təlimlərdə hava və quru qüvvələrindən istifadə olunub, həmçinin ölkədə vəziyyəti stabilləşdirmək, əsas kommunikasiyaları nəzarət altına almaq kimi tədbirlər də sınaqdan keçirilib. Bütün bu nəzəri hazırlıqlar Azərbaycanın İrana qarşı hər hansı addıma dəstək verməyəcəyi haqda dəfələrlə səslənmiş bəyənatlara baxmayaraq aparılır. Hər halda görünən odur ki, İran nüvə silahı əldə etsə və ya buna yaxınlaşsa regionda baş verəcək hadisələrə Azərbaycan da istər-istəməz cəlb olunacaq. F.Məmmədovun hazırladığı geniş yazını bütöv şəkildə “Yeni Müsavat”ın sabahkı sayında oxuya bilərsiniz. musavat.com