“QARABAĞI SATAN PARTİYA TÜRKİYƏDƏ İQTİDARDA QALA BİLMƏZ” Türkiyənin tanınmış köşə yazarı Behiş Kılıc AKP-nin Ermənistan siyasəti ilə bağlı sensasion açıqlamalar verdi “Türkiyənin indi Ermənistanla bağlı yeritdiyi siyasət Qarabağın itirilməsi ilə nəticələnə bilər. Bu, həm də bizim türk insanlarından vaz keçməyimiz demək olar. Türkiyə hökumətinin bu məsələ ilə bağlı indiki mövqeyi bizim kimi insanların ürəyini ağrıdır”. Bu fikirləri “Yeni Müsavat”ın müxbiri ilə söhbətində Türkiyənin ən tanınmış köşə yazarlarından biri, vaxtilə “Tərcüman” qəzetinin baş redaktoru olan, indi isə “Yeni Çağ” qəzetinə yazan Behiş Kılıc söyləyib. Tanınmış köşə yazarı bildirib ki, sözdə “bir millət, iki dövlətik” deyilsə də əməldə bu görünmür. “Biz indi Türkiyə hökumətinin ermənilərə olan yaxınlığının 1/10 hissəsini Azərbaycanla münasibətlərdə görmürük. İndi erməni diasporu Türkiyədə elə fəaliyyət göstərir ki, istədiyi kimi at oynadır. Onların mediada, universitetlərdə bir hakimiyyətləri var, toplum üzərində təbliğat aparmaq üçün geniş imkanlara malikdirlər. Buna isə onların həm pullarının çox olması kömək edir, həm də Türkiyə iqtidarı zəmin yaradır. Elə bir təbliğat aparırlar ki, Türkiyəni və ictimaiyyətini erməni diasporunun apardığı siyasətə təslim etsinlər. Bu təslimçiliyin içində Qarabağın da itirilməsi son dərəcə net və açıq şəkildə görünür”. B.Kılıc təəssüflə bildirib ki, ermənilərdən üzr istənilməsi və digər bu kimi kampaniyaları dəstəkləyən şəxslər Türkiyə iqtidarı tərəfindən çağdaş aydınlar kimi təqdim olunur. Tanınmış köşə yazarı qəti şəkildə bildirdi ki, Türkiyədə hər kəs ermənilərin kim olduqlarını, Azərbaycana nələr etdiyini bilir deyə ermənilərə belə isti münasibəti dəstəkləmirlər: “Türkiyə hakimiyyətinə belə davranmaq təlimatını imperialist güclər verir. Türkiyənin Ermənistanla bağlı son addımları Amerikanın və imperialistlərin bir projesidir. Bu projenin həyata keçirilməsi Abdullah Gülün bir futbol matçını seyr etmək adı ilə Ermənistana səfəri ilə başladı. Bütün bunlar bir proje çərçivəsində reallaşdırılır. Bu projenin sahibi Ağ Ev, dəstəkçisi isə Avropa Birliyidir”. Köşə yazarı deyib ki, Türkiyənin qarışdırılması da bu projeyə daxildir. B.Kılıc bildirib ki, Qarabağı satan bir partiya Türkiyədə hakimiyyətdə qala bilməz: “Türk cəmiyyəti AKP-nin Ermənistanla bağlı siyasətini qəbul etmir və bununla əsla razı deyil. Türkiyə-Ermənistan əlaqələrindən söhbət gedərkən Qarabağ məsələsi əvvəlki qaydada əsas şərtlərdən biri olmalıdır. Türkiyə iqtidarı da yaxşı bilir ki, Qarabağ məsələsindən vaz keçsələr, onlar üçün asan olmayacaq. Amma xaricdən gələn basqılara da dirəniş göstərmirlər. İqtidar iki arada qalıb. Xaricdə onlara deyirlər ki, əgər onların şərtlərinə əməl etməsələr, hakimiyyətdə qala bilməyəcək və gözləmədikləri olaylarla qarşılaşacaqlar. Ona görə də hakimiyyət ölkə vətəndaşlarını öz siyasətinə razı salmağa çalışır”. Kılıcın fikrincə, AKP öz hakimiyyətini davam etdirmək üçün ola bilər ki, Avropa Birliyi və ABŞ-ın şərtləri qarşısında zaman qazanmaq istəyir: “Türkiyə cəmiyyəti ayağa qalxıb iqtidarın bu siyasətinə və xaricdən gələn təzyiqlərə sərt təpki göstərsə, Qarabağla bağlı təhlükələrin qarşısını almaq olar. Torpaqlarımızı qorumaq üçün bunun bədəli nə isə onu ödəməyə hazır olmalıyıq. İlk növbədə Türkiyə dövləti yeni bir qətliam üçün hazırlanan zəminin qarşısını almaq üçün ayağa qalxmalı və varlığını hiss etdirməlidir”. ANONS Növbəti saylarımızda Türkiyənin Milliyətçi Hərəkat, Səadət, Demokratik Sol partiyaları yetkililərinin, Türkiyə xarici işlər nazirinin müavini, bir sıra ölkələrdə Ankaranı diplomat kimi təmsil etmiş CHP başqanının müavini, millət vəkili Onur Öymen və digərlərinin yaranmış durumla bağlı mövqelərini dərc edəcəyik. Zabil MÜQABİLOĞLU, İstanbul