ANKARA APRELƏ QƏDƏR İRƏVANLA MÜNASİBƏTLƏR QURA BİLƏR Vaşinqtondan işarə edilir ki, əks halda “soyqırım”ın tanınması qaçılmaz olacaq “Yeni Musavat”ın bu mövzu ilə bağlı yazıları Türkiyədə müzakirə olunur Ermənistanla intensiv təmaslar içərisində olan Türkiyə iqtidarı bu ilin aprelinədək İrəvanla diplomatik münasibətlər qura bilər. “Milliyet” qəzetinin yazarı Samih İdizin məqaləsində deyildiyinə görə, Vaşinqtondan işarə edirlər ki, aprel ayında ABŞ administrasiyasının erməni “soyqırımı”nı tanımasını əngəlləməyin yeganə yolu bu ola bilər. Məqalədə deyilir ki, ermənilərin soyqırımın ildönümünü qeyd etdikləri aprelin yaxınlaşması ilə bağlı Amerikadakı Türkiyəyönlü çevrələrdə narahatlıq artıb. Çünki erməni məsələsi ilə bağlı qətnamə layihəsi yenidən Konqresin gündəminə gətirilib. Hazırda Konqresə nəzarət ermənilərin mövqelərini dəstəkləyən demokratların əlindədir. Nümayəndələr Palatasının spikeri Nensi Pelosi əvvəldən “erməni soyqırımı”nın tanınmasına çalışan adamdır. Vitse-prezident Cozef Bayden də ermənipərəst mövqeyi ilə tanınır. Üstəlik, prezident Barak Obama seçilməzdən əvvəl ermənilərə “soyqırım”ı tanımaq sözü verib. Bütün bunlara əlavə olaraq AKP iqtidarı İsraillə münasibətləri korlayıb və Amerikadakı yəhudi lobbisi ermənilərin yanında yer ala bilər. Ankarada da rəsmilər etiraf edirlər ki, Obamanın apreldə ermənilərə müraciətində ikitərəfli münasibətləri ciddi ölçüdə zədələyəcək ifadələr işlətməsi riski var. Qəzetin yazdığına görə, məsələ ilə yaxından maraqlanan Amerika çevrələri qeyd edirlər ki, Türkiyənin 24 aprel ərəfəsində Ermənistanla münasibətlərdə beynəlxalq diqqəti cəlb edə biləcək ölçülərdə bir addım atması “soyqırım”ın tanınmasını önləyə bilərdi. Əgər belə addım atılsa, ABŞ administrasiyası Konqresi də “soyqırım” qətnaməsini qəbul etməkdən çəkindirə bilər. Yəni Türkiyəyə verilmək istəyən mesaj budur: Türkiyə aprelə qədər olan zaman çərçivəsində Ermənistanla diplomatik münasibətlər qurmalı və bağlı olan sərhədləri açmalıdır: “Ankaranın bu addımı atması halında Azərbaycan bundan əlbəttə ki, məmnun olmayacaq. Lakin sonda hər iki ölkənin öz milli maraqları önəmlidir. Bakı da öz maraqlarını nəzərə alaraq indiyədək Şimali Kiprin müstəqilliyini tanımayıb. O ki qaldı Davosdakı ”qəhrəmanlığın" ardından yaşanan gəlişmələrə, hissə qapılmanın diplomatiyaya necə zərər verdiyi artıq ortadadır. Hər halda, Türkiyə-Ermənistan münasibətlərinin yeni gəlişmələr ərəfəsində olduğunu söyləyə bilərik". Xatırladaq ki, Türkiyənin İrəvanla diplomatik münasibətlər qurmaq və sərhədləri açmaq üçün Qarabağ münaqişəsinin nizamlanması şərtindən geri çəkildiyi haqda xəbərlər yayılıb. Bu xəbərləri Türkiyə XİN təkzib etmir, Türkiyədəki mənbələr isə geri çəkilmənin həqiqətən baş verdiyini təsdiq edirlər. Bildirilir ki, Azərbaycan tərəfi Türkiyədəki AKP iqtidarının bu addımından olduqca məyusdur. Məsələ Türkiyə mətbuatının və siyasətçilərinin də gündəmindədir. Ötən həftə qəzetimizin yazarlarından birinin AKP iqtidarını ermənilərə edilən bu güzəştə görə tənqid edən yazısı Türkiyə mediasında da müzakirə edilib. Ana müxalifət partiyasının başqan yardımçısı, Türkiyənin NATO-dakı keçmiş səfiri Onur Öymen bu yazını göstərərək Azərbaycan mediasının AKP iqtidarı haqda nələr yazdığını, Ərdoğan iqtidarının ermənilərə münasibətdə təslimiyyətçi və Türkiyənin, eləcə də Azərbaycanın maraqlarına zidd mövqe tutuduğunun bir daha təsdiq edildiyini deyib. Həmin yazıda deyilirdi ki, Davosda Qəzza hadisələrinə görə İsrail prezidentinə bağıran baş nazir Rəcəb Tayyib Ərdoğan eyni reaksiyanı ermənilərə və onların liderlərinə göstərmir. Qəzzada baş verənləri soyqırım adlandıran Ərdoğan Azərbaycanda ermənilərin törətdiyi Xocalı soyqırımı haqda danışmır, əksinə, Ermənistanla sərhədləri açmağa və münasibətlər qurmağa hazırlaşır. Bu yazı Türkiyənin bir çox qəzetlərində, o cümlədən “Haber B” kanalında verilib. F.MƏMMƏDOV musavat