ABŞ GÜNEY MƏSƏLƏSİNƏ DİQQƏTİ ARTIRIR

SON XƏBƏRLƏR

ABŞ GÜNEY MƏSƏLƏSİNƏ DİQQƏTİ ARTIRIR

2021.10.20, 07:36

Gunaz.tv

ABŞ GÜNEY MƏSƏLƏSİNƏ DİQQƏTİ ARTIRIR “Amerikanın səsi”: “İran azərbaycanlıları təzyiqə məruz qalır”

Son zamanlar ABŞ İrandakı 40 milyona yaxın Azərbaycan türklərinin hüquqları məsələsinə diqqəti artırmaqdadır. “Amerikanın səsi” radiosunun baş məqaləsində “İran azərbaycanlıları təzyiqə məruz qalır” sərlövhəli material yerləşdirməsi də bundan xəbər verir. Materialda “Amnesty İnternational”ın İrana dair hesabatına istinad olunub: “Həmin hesabatda qeyd edilir ki, yanvarın 14-də Azərbaycanın Urmiyyə şəhəri yaxınlığındakı Xanegahe Sork kəndində 30-dan çox azəri sünni həbs edilib. Onlar su təchizatının başqa bölgəyə yönəldilməsinə etiraz edərkən polisin hücumuna məruz qalıb. Məlumata əsasən, etirazçıların bəziləri saxlanarkən xəsarət alıb. Başqaları işgəncələrə məruz qalıb. Fevralın 1-də Nazluda saxlanılanların 21 nəfəri məhkəmə qarşısına çıxarılıb. Onlar bir ildən çox həbs cəzası, cərimələr, şallaq və məcburi şəkildə İranın cənub-şərqinə köçürülmə cəzalarına məhkum olunub”. Bundan əlavə bildirilir ki, fevralın 2-də Azərbaycan dilində məktəblərin təsis olunmasını tələb edən 5 azəri fəal Ərdəbil şəhərində 5 il müddətinə azadlıqdan məhrum edilib. Fevralın 4-də isə İran azərbaycanlılarının ana dil hüququnu tələb edən 4 tələbə bir il həbs cəzasına məhkum olunub. Tehranın Şəhid Rəcai Universitetinin professoru Abdullah Abbasi Cavan da həbs edilənlər arasındadır. Professor Cavan noyabrın 13-də Səttarxanın anım mərasimindən az sonra həbs edilib. Cənab Cavana vəkili və ailə üzvlərilə görüşə icazə verilmir. Professor Cavan 2007-ci ildə pantürkizm və sistem əleyhinə təbliğat ittihamları ilə 130 gün həbsdə saxlanmışdı. Mərkəzi Kanadada yerləşən Azərbaycanlı Siyasi Məhbusların Müdafiəsi Cəmiyyətinin direktoru Faxtə Zamani bildirib ki, İran repressiyaları gücləndirib: “2008-ci ildə vəziyyət pis idi. 2009-cu ilin başlanğıcından bəri milli azlıqlara qarşı təzyiqlər artıb. Azərbaycanlılara 2009-cu ilin başlanğıcından bəri son illərin ən sərt cəzaları tətbiq edilir”. Xanım Zamani deyir ki, Azərbaycan icması İranın Konstitusiyasına əsasən iranlıların hüquqlarının təminat altına alınmasını istəyir: “Onlar əsas hüquqları tələb edir. Bu hüquqlardan biri dildir. Onlar iqtisadi, mədəni, dil və din sahələrində ayrı-seçkiliyə məruz qalırlar.” Xəbərdə bildirilir ki, Birləşmiş Ştatlar beynəlxalq tərəfdaşlarıla birlikdə İran hökumətini bütün İran vətəndaşların fundamental hüquqlarına hörmət göstərməyə çağırır. Cavid TURAN musavat

GUNAZ.TV

SON XƏBƏRLƏR