Moskvada dondurulmuş münaqişələr müzakirə edildi Rusiya ilə Türkiyə Qafqazlardakı dondurulmuş münaqişələrin nizamlanması üçün səmərəli tədbirlərin görülməsi tərəfdarıdırlar Bu barədə Moskvada Rusiya ilə Türkiyə prezidentlərinin imzaladığı bəyanatda göstərilir. Habelə sənəddə Moskvanın Türkiyənin Qafqazda sabitlik və əməkdaşlıq platformasıyla bağlı təklifini dəstəkləməsi də əks olunub. Türkiyə prezidenti Abdullah Gül dövlət səfəriylə Rusiyadadır və bu gün o Kremldə Rusiya lideri Dmitriy Medvedevlə görüşüb. Müşahidəçilərin zənnincə, öz çoxəsrlik münasibətləri tarixində kifayət qədər mürəkkəb əlaqələrə malik Rusiyayla Türkiyə indi yaxınlaşma və münasibətlərin istiləşməsi dövrünü yaşayırlar. Bu günkü Kreml danışıqları iki ölkə arasında münasibətlərin yeni mərhələyə irəliləməsi və dostluq və hərtərəfli tərəfkeşliyin dərinləşdirilməsi haqda bəyanatın imzalanmasıyla bitdi. Bəyanat imzalandıqdan sonra onun məğzıni açan Türkiyə prezidenti Abdullah Gül bunları dedi: Moskva bəyanatında göstərilir ki, Rusiyayla Türkiyə Cənubi Qafqazdakı dondurulmuş münaqişələrin nizamlanması üçün səmərəli tədbirlərin görülməsinin tərəfdarıdırlar. Daha sonra sənəddə Türkiyənin Qafqazda sabitlik və əməkdaşlıq platformasına Moskvanın münasibəti göstərilir. İmzalanma mərasimindən sonra Rusiya prezidenti Dmitriy Medvedev bu məsələyə bir daha xüsusi toxunub: "Biz Türkiyənin bəzi təşəbbüslərini, məsələn Qafqazda sabitlik və əməkdaşlıq platformasıyla bağlı təşəbbüsü salamlayırıq. Biz bu təklifin həyata keçirilməsi imkanını görürük, biz daha sıx və bəzən qeyri-formal dialoqun aparılması mümkünlüyünü görürük, bu bölgədəki iqtisadi, nəqliyyat, enerji problemlərinin həllinə kömək edə bilər", deyib prezident Medvedev. Sözügüdən təşəbbüs Gürcüstan-Rusiya müharibəsindən sonra Türkiyənin baş naziri Rəcəb Təyip Ərdoğan tərəfindən irəli sürülmüşdü. İşin mənası isə odur ki, Qafqazlardakı təhlükəsizlik və enerji sahəsində əməkdaşlıq işi üzrə beynəlxalq təşkilat yaradılmalı və bu təşkilata 3 Cənubi Qafqaz ölkəsi və Rusiyayla Türkiyə daxil olmalıdır. Bu təşkilat Qafqazlardakı özünəməxsus ATƏT olmalıdır və bölgədə münaqişəli vəziyyətlərin qarşısını almalıdır. Moskvalı politoloq Aleksandr Pikayevə görə, Rusiyayla Türkiyə Qafqazlarda həm rəqib həm də tərəfkeşdilər: "Bəli, Türkiyənin Azərbaycana müəyyən təsiri var və burada Moskvayla Ankara arasında Bakıya təsir işində rəqabət ola bilər. Ancaq deyək Abxaziyayla bağlı Moskvayla Ankaranın mövqeləri yaxındır, Türkiyədə böyük abxaz diasporası var və onlar türk hökumətinə Abxaziyayla münasibətlər qurmaq işində təyziq edirlər. Türkiyə Ermənistanla münasibətlərini düzəltmək istəyir və bu işdə o Moskvanın köməyinə ehtiyac duya bilər", deyir Aleksandr Pikayev. Düzdür, bir çox müşahidəçilərə görə, sözügedən platforma hələlik real görünmür, ilk növbədə ona görə ki, Rusiyayla Gürcüstanı, yaxud da Azərbaycanla Ermənistanı regional təhlükəsizliklə bağlı bir təşjkilatda təsəvvür etmək hələlik bir qədər çətindir. Moskva danışıqlarında xüsusi diqqət habelə ikitərəfli iqtisadi münasibətlərə verilib. Ötən il qarşılıqlı ticarət mübadiləsi 30 milyard dolları keçib, Türkiyəni təxminən 3 milyon rus turisti ziyarət edib. İndi tərəflər beynəlxalq iqtisadi böhranın bu rəqəmlərə mənfi təsir göstərəcəyindən narahatlıq bildirlər. Bununla belə belə rəsmilərə görə, alış-verişin inkişafı üçün bütün lazımi addımlar atılacaq.bbc