CƏNUBLU SOYDAŞLARIMIZ “EUROVİSİON”A SEÇİLƏN BƏSTƏYƏ ETİRAZ EDİR Araşa qarşı üsyan Məlum olduğu kimi, Azərbaycan “Eurovision 2009" mahnı müsabiqəsində əslən Cənubi Azərbaycandan olan populyar dünya ulduzu kimi tanınmış Araş Labafın ”Always" (“Hər zaman”) adlı bəstəsi ilə təmsil olunacaq. Təbrizli Məmməd Rza redaksiyaya məktub yazaraq Araş Labafa qarşı etirazını bildirib. Məmməd Rza məktubdakı sətirlərin tək onun deyil, cənublu soydaşlarımızın əksəriyyətinin mövqeyi olduğunu yazır. Müəllifin məktubunu olduğu kimi dərc edirik. “Sanki Azərbaycanda bəstəkar qıtlığıymış. Araş kökdən güney azərbaycanlı olsa da, hər zaman Azərbaycanı rəsmiyyətə tanımayan, Ermənistanı silahlandıran, bu günə qədər dəstəkləyən və Azərbaycanı öz torpaqlarının bir parçası hesab edən İranı təmsil edib. Sənətçinin ”İran-İran" adlı mahnısını dinlədikdən sonra sanıram daha yaxşı qərar vermək olar. O, bir azərbaycanlı olaraq Güney Azərbaycanda zülmə məruz qalmış millətinə dəstək olmaq yerinə oxuduğu “İran-İran” mahnısı ilə tökülən qanları görməməzlikdən gəlmir. Mahnının sözləri "biz İran uşaqları iranlıyıq, iranlı qalacayıq, 2500 illik tarixlə öyünür, İran üçün canım qurban..." deyir. Ola bilər Aysel Teymurzadə “Eurovision-2009"-da ən zirvədə dayana, amma dəyərmi 35 milyon Azərbaycan türkünün düşmənini təmsil edən bir bəstəkarın mahnısı Aysel Teymurzadə ifası ilə dünyaya çatdırılsın? Araş azərbaycanlı olaraq bir neçə yabançı dildə mahnı oxuyub, ancaq öz ana dili Azərbaycan türkcəsində heç bir mahnısı yoxdur, bir adam ki, dünənə qədər özünü iranlı olaraq təqdim edib və İran üçün ölüb, nə oldu ki, bir anda kökdən güney azərbaycanlı təqdim edildi? Ancaq unutmayaq ki, “Eurovision” kimi yarışmalarda fars mahnısı ilə çıxış etmək Azərbaycan üçün ən acı olay olacaqdır. Buna baxmayaraq, bizim millət belə manqurtlara, habelə bu manqurtları dəsətəkləyənlərə cavab verir, verəcək. Kim nə əkərsə, onu biçəcəkdir. İllərdir İran fars şovinizminin basqısından çıxmağa can atıb Quzey Azərbaycanla birləşmək istəyində olan milyonların qəlibini qırıb ayrılığa səbəb olacaq. Bu gün mən bir güney azərbaycanlı olaraq bu konuda quzeyli soydaşlarımıza səslənib belə bir işin qarşısını almağa rica edirəm. Atalar demişkən, min dəfə ölç, bir dəfə biç. Diqqətli olmasaq, param-parça olmuş millətimizə böyük zərbə dəyər. Başqa bir ata sözünə söykənərək “yaranı isti-isti bağlarlar”, həmən bu qərarın qırşısını almaq gərəkdir. Aysel Teymurzadə “Eurovision” yarışmasında öz milli elementlərimizə söykənən bir mahnı ilə yarışmaya qatılıb öz milli kimliyimizi dünya ictimaiyyətinə sərgiləyəydi". Qeyd edək ki, builki beynəlxalq yarışmayla bağlı sənətkarlar arasında da narazılıqlar var. Hətta ötən il müsabiqədə “Day after day” bəstəsi ilə təmsil olunan bəstəkar Gövhər Həsənzadə “Azərbaycan xalqının hökumət tərəfindən qiymətləndirilən bəstəkarları o qədər qiymətsiz oldu ki, Avropa səhnəsinə mahnı yaza bilmədi?”-deyə bu il seçilən mahnıya etirazını bildirdi. Gənc bəstəkar Emil Şahin isə “Eurovision”a hazırladığı mahnıya bir il peşəkar komandanın əziyyət çəkdiyini, lakin Araşın bir günə yazdığı mahnının seçilməsindən dəhşətə gəldiyini dedi. Belarusiyada yaşayan həmyerlimiz, gənc müğənni Günəş Abbasova da Araşın musiqilərinin Avropada artıq dəbdən düşdüyünü vurğuladı. Qeyd edək ki, builki seçimə Bəstəkarlar İttifaqının da narazılığı var. Eldar Mansurov: “”Eurovision”a budəfəki seçimdə Bəstəkarlar İttifaqından heç kim dəvət olunmayıb” Bəstəkarlar İttifaqının mətbuat xidmətindən bildirildiyinə görə, münsiflər heyətində qurumun İdarə Heyətinə daxil olan heç bir bəstəkar daxil deyil: “Builki yarışma ilə bağlı mübahisəli fikirlər çoxdur. Lakin bu il Bəstəkarlar İttifaqından münsiflər heyəti kimi yarışmaya heç kim dəvət olunmayıb. Odur ki, ittifaqa daxil olan bəstəkarlar bu barədə fikir bildirmək istəmir. Ötən il İttifaqın İdarə Heyətinin üzvü Eldar Mansurov bu yarışmada təmsil olunurdu, lakin bu il heç kəs dəvət olunmadı. Yarışmaya seçilən musiqi də hələ ictimaiyyətə təqdim olunmayıb, bəstəkarlar, yaradıcı adamlar hələ bu mahnını eşitməyiblərsə, nə fikir səsləndirə bilərlər?” Xatırladaq ki, yarışmaya musiqi seçimi 7 münsif üzvü - İctimai Televiziya və Radio Verilişləri Şirkətinin rəhbəri İsmayıl Ömərov, Bakı Musiqi Akademiyasının rektoru Fərhad Bədəlbəyli, Azərbaycan Mədəniyyətinin Dostları Fondunun icraçı direktoru İbrahim Quliyev, Beynəlxalq Musiqi Şurasının Azərbaycan Milli Musiqi Komitəsinin prezidenti Lalə Kazımova, Azərbaycan Dövlət Filarmoniyasının direktoru Murad Adıgözəlzadə, Mədəniyyət və Turizm Nazirliyinin sektor müdiri Mənzər Nurəliyeva və Gənclər və İdman Nazirliyinin nümayəndəsi Fərhad Hacıyev tərəfindən aparılıb. Jüri 30 mahnı arasından “Always” mahnısına üstünlük verib. Bəstəkarlar İttifaqının İdarə Heyətinin üzvü Eldar Mansurov da builki seçimə dəvət olunmamasından təəccübləndiyini bildirdi: “Bu yarışmaya Bəstəkarlar İttifaqından kiminsə dəvət olunmaması mənə də təəccüblü gəldi. Mən olmasam da, Firəngiz xanım, Aqşin Əlizadə, Zöhrab müəllim münsiflər heyətinin tərkibinə daxil ola bilərdi. Dəvət olunmamağımızın, hər halda, onlardan soruşun. Musiqi və iştirakçı seçiminə gəlincə, mən bu barədə bir söz deyə bilmərəm. İştirakçının da, musiqinin də seçilməsi barədə yalnız mətbuatdan məlumatlıyam. Bəlkə də seçilən musiqi yaxşıdır, amma mən eşitməmişəm, ümumiyyətlə, bu barədə maraqlanmıram”. Ayselin dünya turnesi niyə təşkil olunmur? Onu da əlavə edək ki, artıq Türkiyənin ictimai televiziyası TRT “Eurovision-2009"-da ölkəsini təbliğ edəcək Hadisə Açıgözün geniş təbliğat kampaniyasına başlayıb. Lakin Azərbaycanın da öz təmsilçisini bir sıra Avropa ölkələrinə promo-tura çıxaracağı bildirilsə də nədənsə ölkə ictimai televiziyası bu barədə heç bir məlumat vermir. Qeyd edək ki, İTV-nin ”Eurovision" mahnı yarışması üzrə nümayəndəsi Leyla Əliyeva az öncə efirdən bildirmişdi ki, ölkəmizin təmsilçisi Aysel Teymurzadənin promo-turları təşkil olunsa da, bəzi ölkələrə onun yarışmada oxuyacağı mahnının yalnız klipləri göndəriləcək. Builki beynəlxalq yarışma ilə bağlı səslənən mübahisəli fikirlərlə əlaqədar dünən İctimai Televiziya ilə əlaqə saxladıq. Oradan bizə bildirildi ki, sualımızı İTV-nin “Eurovision” mahnı yarışması üzrə nümayəndəsi L.Əliyevadan başqa heç kim cavablandıra bilməz: “Leyla xanım isə hazırda xəstədir, işə gəlmir”. Leyla Əliyeva ilə mobil telefon vasitəsilə əlaqə saxlamaq cəhdimiz də baş tutmadı. Araş “Eurovision”da Aysellə birgə oxuyacaq Sonda qeyd edək ki, Araş BBC-yə verdiyi müsahibəsində bildirib ki, “Eurovision”da Aysellə birgə çıxış etmək niyyətindədir. Araş atası Zahir Huvayın da Əfqanıstanda tanınmış müğənni olduğunu vurğulayıb. “İlk üçlüyə çıxmasam, məyus olacam”-deyən musiqiçi bu müsabiqədə Azərbaycanın qələbə qazanacağına ümid etdiyini deyib: “Mən Aysellə görüşmüşəm. Onunla bir həftə vaxt keçirdim. Onun ifasına qulaq asdım. Xoşuma gəldi. Mən bununla yalnız fəxr edə bilərəm. Həm yaxşı ifaçı ilə işləyirəm, həm də əlimdə yaxşı mahnı var. İşlədiyimiz dəstə də əladır. Qələbə qazanacağımıza ümid edirəm". Mövzunu davam etdirəcəyik. NİGAR musvat