“Kurtlar Vadisi”ndən sərt açıqlama! Azərbaycanda da populyar olan “Kurtlar Vadisi” serialı barədə çoxsaylı iddialardan daha biri, bu dəfə daha sərt formada üzə çıxıb. Türkiyədə nəşr olunan “Tərəf” qəzetinin yazarı, bu filmin dövlət orqanlarının təlimatıyla çəkildiyini və ölkədə qiyam şəraiti hazırladığını iddia edib. Filminin yaradıcıları, Pana-Film şirkəti filmlə bağlı son zamanlar ortaya çıxmış iddialara cavab olaraq açıqlama yayıb. Açıqlamada deyilir: “Yenə “Kurtlar Vadisi”nə hücumlar başladı!!! Yayınlandığı gündən bəri iftiralara məruz qalan əsərimiz və heyətimiz yenə sistemli iftiraların hədəfindədir. Adını dünənə qədər bilmədiyimiz bir iftiraçı özünü tanıtmaq üçün bizdən istifadə etmək yolunu seçib. özünün və vəzifəsinin nə olduğunu bilirik!... İndi isə gələk alçaq iftiralara... “Kurtlar Vadisi”nə baxıb-baxmadığı bəlli deyil, amma onu başa düşmədiyi kəsinliklə bəllidir. “Kurtlar Vadisi”nin ortaya çıxmasının səbəbi cinayətləri və cinayətkar təşkilatları bədiiləşdirib, ictimaiyyəti onlara qarşı xəbərdar etmək, məlumatlandırmaqdır. Türkiyədə hüquq və hüququn üstünlüyü isə bir filmin işi deyil, dövlət qurumlarının işidir. Qiyam şərtləri hazırlamağın cəzası qanunda açıq şəkildə yazılıb. Bu şərtləri hazırlayanlar, “qiyam həvəskarları” gec-tez hüquq qarşısına çıxacaqlar. “Kurtlar Vadisi” filmi dövlət orqanları tərəfindən manipulyasiya edildiyi barədə iftiralarla həmişə qarşılaşıb. Bu qədər də cahillik olmaz! Bir film yaradılır, personajlarına həyat verilir, tamaşaçıya mənimsədilir, bunun üçün onlarla seriya çəkilir, axırda da qiyam şərtləri hazırlayır?! Doğrusu, “Kurtlar Vadisi” kimi bir fenomen yaratmaq qiyam təşkil etməkdən daha çətindir!!! Türkiyədə o qiyamlardan 3 dənə olub, bu filmdən isə bir dənə də yoxdur! Bəziləri bir vaxtlar bu filmi “mən hazırlayıram”, ya da “hazırlatdırıram” deyirdi. O günlərdə bunları söyləyənlərin heç birinin bu gün “Kurtlar Vadisi” ilə əlaqəsi yoxdur. üstəlik, bunların çoxu bu filmlə düşmənlik edirlər. Bir iftiraçı, dövlətin bir qurumunun bu filmi hazırlatdığını, bunun üçün bilgi verdiyini və şərtlər yaratdığını söyləyir. Bu iftirasını sübut edəcək bir dəlil-sübutu varsa, buyursun yayınlasın, biz də görək. Dəlil-sübutu olmadan belə sözləri danışırsa, həm cahil, həm böhtançı, həm də şərəfsizdir. “Kurtlar Vadisi”nin müəllifləri və hazırlayanları bəllidir. “Kurtlar Vadisi”nin hazırlayanı Pana Filmdir. Nə Pana Film, nə də ortaqları heç bir qurum, ya da şəxsdən əmr, məlumat, dəlil almayıb. Bizə belə bir təklif də edilə bilməz. Pana Film, bu günə qədər gördüyü işlərdə cəmiyyətə dövlətin və toplumun problemlərini anlatmağı, bu problemi necə həll etməyin yolunu göstərməyi prinsip olaraq seçib və bunu bacarıb. Bu böhtançı ölkədə aşağılanmış, yox sayılmış, ikinci, beşinci, onuncu elan edilmiş ola bilər. Biz onun bu hisslərini paylaşmırıq... Hər zaman bu millət tərəfindən dəstək görmüş, özünü bu ölkənin əsl vətəndaşları və övladları olaraq qəbul etdirmiş, bu dövlətin gerçək sahibləriyik. Məruz qaldığımız iftiraların hesabını isə məhkəmə önündə soracağıq. Son bir qeyd də “Tərəf” qəzetinin çox yaxından tanıdığımız rəhbərlərinə: hələ əyninə paltarını geyməmiş birinə köşə yazdıranda belə olar, sadəcə öz altını batırmaz, həm də aləmi bərbad edər! Lütfən, uşağınıza sahib çıxın!”