“GÜNEY MƏSƏLƏSİ OBAMANIN SİYASƏTİNDƏ HƏLLEDİCİ YERLƏRDƏN BİRİNİ TUTACAQ” Qabil Hüseynli: “Soydaşlarımızın muxtariyyət qazanması rejim dəyişikliyi kontekstində baş verəcək” ABŞ-ın yeni prezidenti Barak Obama İranın nüvə proqramını dayandırmaq niyyətindədir. Rəsmi Vaşinqton bu problemi dinc danışıqlar vasitəsilə yoluna qoyacağına ümid etsə də, Tehranla bağlı hərbi əməliyyatların istisna edilmədiyini də bildirib. Bundan başqa Obama İranda hakimiyyətdəki rejimə qarşı çıxan müxalifət təşkilatları ilə əlaqələri genişləndirmək qərarına gəlib. ABŞ-ın məşhur analitiklərindən biri Corc Fridman isə belə olan halda cənubi azərbaycanlıların da yeni dövlət qurması şansının az olmadığını bəyan edib. Qeyd edək ki, hazırda güneyli soydaşlarımızın vəziyyəti heç də qənaətbəxş deyil. Cənubi azərbaycanlıların təklifləri və tələbləri İran rəhbərliyi tərəfindən “qulaqardına” vurulur; rejimə qarşı çıxanlar həbs edilir, repressiyalara məruz qalırlar. Yaxın gələcəkdə məsələ ilə bağlı Cənubi Azərbaycan Milli Oyanış Hərəkatının rəhbəri Mahmudəli Çöhrəqanlının Vaşinqtona səfəri gözlənildiyi bildirilir. Sual doğuran bir sıra məqamlar ortaya çıxır: ABŞ Cənubi Azərbaycan faktorundan istifadə edərək İrana təsir taktitasını seçə və Güneydə muxtariyyət məsələsi ortaya atıla bilərmi? Politoloq Qabil Hüseynli öncə Obamanın seçkiqabağı kampaniyada və inauqurasiya mərasimində İranın nüvə texnologiyasına yiyələnməsi haqqında söylədiklərinə toxundu və Obamanın problemin diplomatik yolla həllinə cəhd göstərəcəyini söylədiyini xatırlatdı: “Nüvə proqramı tək Amerikanı yox, həm də Qərb ölkələrini maraqlandıran məsələdir. Buşdan fərqli olaraq Obama İranla hərbi təzyiq dilində danışmayacaq. Obamanın Amerikanın İran siyasətini dəyişə biləcəyi haqda bir şey demək hələ tezdir”. Politoloq onu da qeyd etdi ki, Obama seçkiqabağı platformasında cənubi azərbaycanlıların adını çəkərək İranın onların insan haqlarını tapdamasını vurğulamışdı: “Prezidentin seçki qərargahına cənubdakı soydaşlarımızdan xeyli məktub da gəlmişdi. Hətta Buşun müşavirlərindən biri soydaşlarımızın məsələsinin gündəmdə dayandığını və beynəlxalq qurumların bu məsələyə diqqət artırmasının vacibliyini vurğulamışdı. Məncə, Güney məsələsi Obamanın siyasətində həlledici yerlərdən birini tutacaq. İrandakı soydaşlarımızın milli və insan haqları məsələsi bütün kəskinliyi ilə gündəmə gətiriləcək”. Q.Hüseynli Güney Azərbaycan Milli Oyanış Hərəkatının artıq Amerikanın siyasi elitasında qəbul edildiyini və Mahmudəli Çöhrəqanlının Amerika administrasiyasının müəyyən strukturları ilə görüşə biləcəyini bildirdi: “Amma bu yolda yeganə problem yaradan amil Cənubi Azərbaycanda təşkilatlar arasında fikir ayrılığının olmasıdır. Həmin təşkilatlar Cənubi Azərbaycan məsələsinə vahid ideologiya və stratejiyadan çıxış edib sinxron mövqe nümayiş etdirməyi bacarsalar, məsələ həqiqətən tək Amerikanın deyil, dünyanın gündəmində otura bilər”. Müsahibimiz muxtariyyət məsələsinin rejim kontekstində həll olunacağını söylədi: “İranda rejim dəyişikliyi baş vermədən Cənubi Azərbaycanın muxtariyyətindən danışmaq bir qədər çətindir. Rejim dəyişikliyi ilə milli azlaqların və soydaşlarımızın muxtariyyət məsələsi eyni kontekstdə baş verəcək”. Leyla İLQAR msavat