Rerefendumla bağlı imza toplayan təşəbbüs qrupları işlərini yekunlaşdıra bilmir Mərkəzi Seçki Komissiyasının (MSK) bu gün keçirilən iclasında şikayətlər məsələsi də müzakirə edildi. Bu günədək MSK-ya 6 şikayət daxil olduğunu deyən qurumun sədri Məzahir Pənahov bildirib ki, şikayətçilər dəfələrlə komissiyanın iclaslarına dəvət ediliblər. M.Pənahovun sözlərinə görə, lakin onlar toplantılara qatılmadıqları halda Mərkəzi Seçki Komissiyasını şikayətlərə obyektiv baxmamaqda ittiham edirlər: «Belə iddialar gülüncdür. O iddianı təmin etmək üçün sənəd lazımdır. Bizə daxil olan müracəti gəlib araşdırsınlar və nəsə sənəd versinlər ki, MSK da onların müraciətini təmin etsin». Qeyd edək ki, indiyədək referendum çərçivəsində «Yeni Azərbaycan», «Şəhər» və «Tərəqqi» təşəbbüs qrupları qeydiyyata alınıb. «Abad kənd» təşəbbüs qrupu isə qeydiyyata alınmayıb. «Azad söz» və «Vətəndaş cəmiyyəti» təşəbbüs qrupları artıq imza vərəqələrini Mərkəzi Seçki Komissiyasına təqdim ediblər və onlar hazırda yoxlanılır. «Respublikaçılar», «Qarabağ» və «Respublika uğrunda hərəkat», «Azərbaycan Xalq Cümhuriyyəti», «Davamlı inkişaf naminə» təşəbbüs qrupları isə hələ ki, topladıqları imzaları MSK-ya təqdim etməyiblər. «Respublikaçılar», «Qarabağ» və «Respublika uğrunda hərəkat» təşəbbüs qrupunun üzvü, «Müsavat» partiyası sədrinin müavini Arif Hacılı bildirib ki, imzatoplama prosesini başa çatdırılsa da, müəyyən problemlər üzündən sənədlər hələ Mərkəzi Seçki Komissiyasına təqdim edilməyib: «İmza toplama vərəqələrinin yerlərdən toplanması yekunlaşır. Yaxın günlərdə- ola bilər yanvarın 31, yaxud fevralın 1-də «Respublikaçılar» təşviqat qrupu 60-dan çox seçki dairəsindən topladığı 40 mindən çox imza olan vərəqələri MSK-ya təqdim edəcək. Hakimiyyət dairələri xüsusilə kənd rayonlarında vərəqələrin xüsusi ilə yığılıb gətiririlməsinə maneçilik törədirlər». Gənclər təşkilatlarını təmsil edən «Davamlı inkişaf naminə» təşəbbüs qrupunun səlahiyyətli nümayəndəsi Elməddin Bahadır da təmsil etdiyi qurumun imzatoplama prosesinin yekunlaşmaq üzrə olduğunu bildirib: «Azərbaycanın 70-ə dək seçki dairəsində imza vərəqələrinin toplama kampaniyası ilə məşğuluq. Yerlərdən daxil olan məlumatia görə, bu gün artıq 43 min imza vərəqəsi yığılıb. Biz Seçki Məcəlləsinin bizə verdiyi imkandan ən son ana qədər yaralanmaq niyyətindəyik. Yəqin ki, kampaniyanı başa çatdırıb sənədlərimizi imza vərəqələri ilə birgə MSK-ya təqdim edəcəyik». İmzatoplama zamanı problemlə üzləşmədiklərini deyən təşəbbüs qrupunun təmsilçisi bildirib ki, prosesin ləng getməsinə səbəb onların fəaliyyət göstərdiyi kənd və rayonlarda digər təşəbbüs qruplarının da imza toplamaları olub. Qeyd edək ki, indiyədək martın 18-də dairə seçki komissiyalarında isə 78 təşəbbüs qrupu qeydiyyatdan keçib. Xatırladaq ki, qanunvericiliyə görə, imzatoplama kampaniyası çərçivəsində sənədlərin təqdim edilməsi üçün ayrılan vaxt fevralın 1-i saat 18.00-da başa çatır.