"Mən səni sevirəm, sən sevməsən də" Yaxud "ucuz ətin şorbası olmur" Türkiyənin AKP hökuməti Ermənistanla birtərəfli qaydada münasibətləri yoluna qoymaqdan usanmayıb. Birtərəfli qaydada ona görə deyirəm ki, Türkiyə nə qədər səmimi olaraq yaşanan düşmənçiliyə son verməyə çalışsa da, qarşı tərəf bunun əksini həyata keçirir. Elə sonuncu bir faktı demək kifayətdir ki, Ermənistanın göstərilən yaxşılığa münasibəti bəlli olsun. Ermənistanın xarici işlər naziri Edvard Nalbəndyan açıqlamasında bildirib ki, qondarma soyqırım məsələsində heç bir kompromisdən söhbət gedə bilməz. Yəni Ermənistan hələ də bu niyyətindən əl çəkməyib Arzu Şirinova Qısa-qısa Türkiyəni qondarma soyqırımla şantaj etməkdə israrlıdır. Türkiyə isə yaxşılıqlarını davam etdirir. Dünən ermənilərin şərəfinə abidə ucaldılan Türkiyədə bu gün "türk-erməni dostluğu" serialının çəkilişinə start verilib. Türkiyə Dövlət Teleradioşirkətinin çəkdiyi "Ayrılıq" serialında baş rollardan birini oynayan Atilla Saralın dediyinə görə, Ankara və İrəvan arasındakı münasibətlərin normallaşmasına TRT də dəstək vermək niyyətindədir. Bu məqsədlə telekanal "Ayrılıq" adlı serialın çəkilişini aparır: "Biz bu serialla Ermənistanla münasibətlərimizin normallaşmasına çalışan insanlara və ümumiyyətlə, xalqlar arasında sülhə dəstək vermək istəyirik. Türkiyə prezidenti Abdulla Gülün futbol yığmamızın Ermənistan millisinə qarşı matça baxmaq üçün İrəvana səfərindən sonra iki ölkə arasında başlanmış yaxınlaşma, məncə, xalqlarımıza pis heç nə verə bilməz". Onun sözlərinə görə, TRT bu serial sayəsində erməni-azərbaycanlı düşmənçiliyini də ortadan qaldırmaq üçün addım atmağı düşünür. Serialda məhəbbət, avantür intriqa və təbii qaz boru kəmərinin çəkilişi ilə bağlı mövzulardan da bəhs olunur. O da bildirilir ki, Azərbaycan, Çeçenistan və Ermənistanla yanaşı, daha dörd ölkədə çəkiləcək serialın 7 baş qəhrəmanı olacaq. Serialın baş prodüseri Süleyman Çobanoğlunun bildirdiyinə görə, "Ayrılıq" serialında rol ifası ilə bağlı Nejat İşler, Fikret Kuşkan və Haluk Piyeslə ilkin razılıq olsa da, onlar sonradan imtina edərək "erməni obrazı yaratmaq istəmirik" deyiblər. TRT-nin bu addımını təqdir etməsək də, irad da bildirməkdən uzağıq. Çünki bəzi bu və digər məsələlərdə narazılığımızı bildirsək də mənası olmayıb. Ancaq bir arzumuzu bildirməkdən vaz keçmirik. TRT rəhbərliyi tarixi həqiqətləri özündə əks etdirən Xocalı soyqırımına həsr olunmuş serial çəkərsə, o zaman həm dünya ermənilərin əsil sifətini tanıyar, həm də türkün türkə dayağının şahidi olarıq. xxx Yəqin ki, sizlər də diqqət yetirmisiniz-Bakıda, eləcə də paytaxtdan kənarda hara gedirsən çinlilərlə rastlaşırsan. Əsasən gənc nəslin nümayəndələri olan çinlilər əllərində müxtəlif xırdavat məhsulları yaxınlıqdan keçən yerli camaata göstərir və bəzən dəyər-dəyməzinə həmin məhsulları satırlar. Mən özüm həmin məhsullardan almasam da, ancaq dost-tanışın dediyinə görə, çinlilərin satdıqları məhsullar çox keyfiyyətsiz olur. Elə ona görə də yerli camaatdan kimi görürlər keyfiyyətsiz məhsullarını sırımağa çalışırlar. Çox vaxt buna nail olurlar. Məhsulları keyfiyyətsiz olan çinlilər öz əməklərini də ucuz qiymətə satırlar. Məsələn, tikinti sektorunda çalışan çinlilərlə yerli fəhlələrin əməkləri müxtəlif olmaqla qiymətləndirilir. Azərbaycanlı fəhlələrin dediyinə görə, çinli fəhlələr onların qarşısına sədd çəkib. Belə ki, daşın 1 kvadratmetrini yerli işçi 8 manata döşəyirsə, çinli fəhlə bunu 3 manata etməyə razılaşır. Azərbaycanlı fəhlələr onu da bildirirlər ki, öz ustalarımız var ki, əlləri "qızıldır": "Çinliləri isə ucuz işlədirlər. Ona görə də onları gətirirlər. Hamısını da gətirib tələbə kimi burada qeydiyyatdan keçirirlər". Bu danılmaz bir faktdır ki, Azərbaycana işləməyə gələn xarici vətəndaşların əksəriyyətinin qeydiyyatı yoxdur və onlar qeyri-qanuni olaraq burada fəaliyyət göstərərək para qazanırlar. Məsələn, apardığımız araşdırmalara görə, türk saç ustalarının əksəriyyətinin qeydiyyatı yoxdur. Ancaq gəlin görək, azərbaycanlı hər hansı xarici ölkələrdə bu cür fəaliyyət göstərə bilərmi? Əlbəttə ki, yox. Elə qardaş Türkiyəyə işləməyə gedənlər qeydiyyata düşə bilbədikləri halda ölkədən çıxarılırlar.