Ərdoğan "Həmas"ı yenə müdafiə edib Ancaq baş nazir davranışlarıyla ABŞ-dakı nüfuzlu yəhudi lobbisinin dəstəyinin itirilməsinə, "erməni soyqırımı"nın Konqresdə qəbuluna yol açdığını etiraf etməyib Qəzza olaylarına sərgilədiyi davranış nəticəsində Türkiyənin İsrail və nüfuzlu yəhudi lobbisi ilə münasibətlərinin pisləşməsinə yol açan baş nazir Rəcəb Tayyib Ərdoğan hərəkətlərinə bəraət qazandırmağa çalışıb. Xatırladaq ki, keçən həftə ABŞ-dakı ən böyük 5 yəhudi təşkilatı Türkiyənin baş naziri Rəcəb Tayyib Ərdoğana məktub göndərərək bu ölkədə antisemitizm dalğasının baş qaldırmasından əndişələrini dilə gətiriblər və baş naziri gərəkən addımları atmağa çağırıblar. Məktubu Amerika Yəhudi Komitəsi (AJC), İftira ilə Mübarizə Liqası (ADL), ABŞ Yəhudi Təşkilatları Sədrləri Konfransı (CPMAJO), Milli Təhlükəsizlik İşləri üçün Yəhudi İnstitutu (JİNSA) və "Bnai Brith" adlı qurum imzalayıb. Ramiz Mikayıloğlu Məktubda yazılır ki, Türkiyədəki yəhudilər özlərini təhlükə altında və küncə sıxışdırılmış vəziyyətdə hiss edirlər. Türkiyədə müşahidə olunan yəhudi əleyhdarlığında məhz baş nazir Rəcəb Tayyib Ərdoğanın açıqlamaları rol oynayıb. ABŞ-dakı nüfuzlu yəhudi təşkilatlrından birinin rəhbəri isə neçə illərdir ki, Konqresdə "erməni soyqırımı"nın tanınmasına qarşı çıxdıqlarını xatırladıb: "Amma bu dəfə çox çətin olacaq. Əvvəllər təkcə Türkiyə haqlı olduğuna görə yox, eyni zamanda dostumuz olduğu üçün sizə dəstək verirdik. Hazırda isə Türkiyənin dostumuz olduğunu söyləmək çətindir". Rəcəb Tayyib Ərdoğan isə Londonda ərəb dilində yayımlanan "Əl Həyat" qəzetinin bu yöndə sualını cavablandırarkən deyib ki, o, İsrail xalqına qarşı deyil, İsrailin siyasi liderlərinə və barbarca işlənən cinayətleri dəstəkləyənlərə qarşıdır. O etiraf edib ki, "Həmas" İsrailin hərbi əməliyyatlarından öncə bu ölkəyə raketlər ataraq xətaya yol verib. Bununla belə, baş nazir yenə də "Həmas"ın müdafiəçisi rolunda çıxış edib: "İsraildən fərqli olaraq "Həmas"ın 6 ay ərzində atəşkəsə əməl etdiyini də nəzərə almalıyıq. Ancaq İsrail anlaşmaya baxmayaraq, blokadanı qaldırmaq və keçid məntəqələrini açmaq yönündə həmin müddətdə heç nə etmədi və "Həmas"ı, qəzzalıları ayağa qaldırdı". Rasional olmayan davranışlarıyla ABŞ-dakı nüfuzlu yəhudi lobbisinin dəstəyinin itirilməsinə, bunun nəticəsində qondarma "erməni soyqırımı"nın Konqresdə qəbuluna yol açdığını etiraf etməyən Rəcəb Tayyib Ərdoğan "Həmas"ın dərdinə qalıb: "Hamas"ın Fələstin siyasətinde bir rola sahib olması gərəkdir. Hər kəsin Fələstindəki seçkilərin nəticələrinə sayğıyla yanaşması lazımdır". Baş nazir bildirib ki, Qəzza əməliyyatını başlamasıyla Ankaranın vasitəçilik etdiyi İsrail-Suriya dialoqu dayandırılıb. Onun sözlərinə görə, dialoqun davamı üçün İsrail həqiqətən sülh istədiyini göstərməlidir: "İsrail Qəzzada hərbi əməliyyatlara başladıqdan sonra Suriya rəsmiləriylə görüşdüm və vasitəçiliyi dondurmağa qərar verdik. Bu şərtlərdə sülh danışıqları aparıla bilməz". Rəcəb Tayyib Ərdoğan İsrail və "Həmas" arasında atəşkəsin davamlı hala gətirilməsi üçün ehtiyac yaranarsa, bölgəyə türk müşahidəçilər göndərməyə də müsbət yanaşdıqlarını söyləyib.