ANAR MƏMMƏDXANOV: «HÖKUMƏT RUSİYA İLƏ MÜNASİBƏTLƏRƏ TAMAMİLƏ YENİDƏN BAXMALIDIR» Milli Məclisin beynəlxalq münasibətlər və parlamentlərarası daimi komissiyasının üzvü Anar Məmmədxanov «Media forum» saytına açıqlamasında Rusiyadan Ermənistana silah ötürülməsinə birmənalı cavab vermək təklifiylə çıxış edib: «Hökumət Rusiya ilə münasibətlərə tamamilə yenidən baxmalıdır». 1970-ci ildə Bakıda doğulan A.Məmmədxanov Bakı Dövlət Universitetinin mexanika-riyaziyyat fakültəsini bitirib. Rus və ingilis dillərini bilir. Bitərəfdir. Birinci və ikinci çağırış Azərbaycan Respublikası Milli Məclisinin deputatı olub. 2005-ci il noyabrın 6-da 30 saylı Suraxanı birinci seçki dairəsindən deputat seçilib. - Rusiyanın Ermənistana böyük məbləğdə silah-sursat ötürməsi ilə bağlı üzə çıxan məlumatı necə şərh etmək olar? - Mən bu fakta «Day.az» saytında dərc olunan məqaləmlə münasibət bildirmişəm. Həmin yazıdan əlavə nə deyə bilərəm ki?! - Deputatlar, politoloqlar beynəlxalq təftiş komissiyası, Azərbaycan, Rusiya və Ermənistanın iştirakı ilə komissiya, yaxud Milli Məclisin araşdırma komissiyası yaradılmasını təklif edirlər. Sizin təklifiniz nə olardı? - Gündə yeddi təklif vermək mümkündür. Komissiyaların yaradılacağına inanmıram. Özəlliklə üç ölkənin birgə komissiyası real deyil. Belə qurumun yaradılmasına nə Rusiya razılaşacaq, nə Ermənistan. Azərbaycan Rusiyadan Ermənistana silah ötürülməsinə sərt münasibət bildirməlidir. Hökumət Rusiya ilə münasibətlərə tamamilə yenidən baxmalıdır. Komissiyaya-filana ehtiyac yoxdur. - 1997-ci ildə Rusiyadan Ermənsitana 1 milyard dollarlıq silah ötürülməsinin üstü açılanda siz Rusiyada xeyli görüşlər keçirmiş, Moskva qəzetlərinin məsələni geniş işıqlandırmasına çalışmısınız. Hazırda belə cəhdə ehtiyac varmı? - Yox. Çünki hər şey aydındır. Mənim üçün aydındır ki, Ermənistan Rusiya üçün itirilməsi mümkünsüz olan dayaq ölkədir. Ruslar ermənilərə görə başqa ölkələrlə, o cümlədən Azərbaycanla münasibətlərinin pozulmasına razıdırlar. Silah ötürülməsi faktı birinci dəfə olsaydı, deyərdim ki, bunu edən hansısa bir məmurdur. Amma belə deyil, artıq bu, bir siyasətdir. Rusiyanın siyasəti. Düzdür, silah qalmaqalı məsələsinin həm Rusiya, həm Avropa, həm də Amerika mətbuatında öz əksini tapması çox gözəl olardı. Məsələ daha da aktullaşa, Azərbaycana dividendlər gətirə bilərdi. Amma bunun üçün işləmək lazımdır. Azərbaycan məmurları bu istiqamət üzrə işləməlidir. Müvafiq strukturlar bu məlumatın bütün dünyaya çatdırılması istiqamətində fəaliyyət göstərməlidirlər. - Bildirirsiniz ki, Azərbaycan Rusiya ilə münasibətlərinə bir daha baxmalıdır. Məsələn, rəsmi Bakı Dağlıq Qarabağ münaqişəsində vasitəçi olan Rusiyanın ATƏT-in Minsk qrupundan çıxarılmasını tələb etməlidirmi? - Əgər mən ura-patriot, yəni boğazdan yuxarı vətənpərvər olsaydım, deyərdim ki, Bakı Minsk qrupunun tərkibinin dəyişdirilməsiylə bağlı məsələ qaldırmalıdır. Amma mən realistəm və deyirəm ki, bu mümkün deyil. - Bəs Azərbaycan Müstəqil Dövlətlər Birliyindən çıxmaq məsələsi qaldırmalıdırmı? - Xeyr. - Nə üçün? - Ona görə ki, vəziyyət çox çətindir və Azərbaycan hansısa bir addım atanda düşünməlidir: bu bizim xeyrimizədir, ya yox. Əgər MDB-dən çıxsaq, bu, Azərbaycanın xeyrinə olmayacaq. - Onda siz «Hökumət Rusiya ilə münasibətlərə tamamilə yenidən baxmalıdır» dedikdə nəyi nəzərdə tutursunuz? - Son silah qalmaqalı Rusiyanın Azərbaycana strateji müttəfiq olmadığını bir daha təsdiqlədi. Bu mənada münasibətlərə təzədən baxılmalıdır. «Media forum»