Rusiya Azərbaycanı şantaj edir Rasim Musabəyov: "Məsələ bu şəkildə bağlana bilməz və Azərbaycan da öz addımlarını buna müvafiq şəkildə atacaq" Rusiyanın Gümrüdəki 102 saylı hərbi bazasından Ermənistan ordusuna 800 milyon dollar dəyərində hərbi texnika, silah və sursatın verilməsi ilə bağlı rəsmi Bakının Moskvadan cavab tələb etməsi şimal qonşumuz tərəfindən qıcıqla qarşılanıb. Bu elə rəsmi Bakının Rusiyadan qəti və dəqiq cavab tələb etməsinə rəğmən Moskvanın bu tələblə bağlı notaya şantaj xarakterli cavab göndərməsindən də aydın görünür. Zənnimizcə, Rusiya tərəfinin Azərbaycanın Moskvadakı səfirliyinə təqdim etdiyi cavab notasında "qeyd olunan məqalə dezinformasiyadır. Açıq-aydın antirusiya xarakteri daşıyır və dost Rusiya-Azərbaycan münasibətlərinin pozitiv inkişafına mane olur"- kimi fikirlərin əksini tapması heç də Ermənistana silah verilməsi barədə Azərbaycan mətbuatının açıqladığı məlumatı təkzibləmək üçün əsaslı arqument sayıla bilməz. Digər tərəfdən isə cavab notasında rəsmi Moskvanın Bakıya bu məsələnin üzərinə bir daha qayıdılmamasını "böyük qardaş" kimi tövsiyə etməsi artıq Azərbaycanın şantaj edilməsi sayıla bilər. Bu elə cavab notasından da özünü aydın şəkildə büruzə verir. "Rusiya tərəfi hesab edir ki, 15 yanvar 2009-cu il notasında qeyd olunmuş bu məsələyə qayıtmağın mənası yoxdur(?) və qəti əminlik ifadə edir ki, tərəflər gələcəkdə bir daha tələsik nəticə və addımlar atmayacaqlar. Birlikdə mümkün şübhələri Rusiya ilə Azərbaycanı birləşdirən sıx strateji partnyorluq əlaqələr ruhunda həll edəcəklər". Qeyd edək ki, Rusiya tərəfinin Azərbaycana bu səpkili cavab verməsi ekspertlər tərəfindən birmənalı qarşılanmayıb. Siyasi İnnovasiyalar və Texnologiyalar Mərkəzinin rəhbəri, politoloq Mübariz Əhmədoğlu hesab edir ki, Rusiya cavab notası ilə Azərbaycana təzyiq etməyə çalışdığını bir daha sübut etdi. Onun sözlərinə görə rəsmi Moskvanın mövqeyindən belə aydın olur ki, Rusiya Azərbaycanın bu məsələni qabartmasını gözləmirmiş. "Ona görə də elə məsələ qaldırılan gün Putin Rusiyadakı xarici miqrantların bazarlarda işləməsinə qadağa qoyan qərar qəbul etdi. həmçinin Rusiya başqa vasitələrlə də Azərbaycana təzyiq etməyə çalışır" deyən Mübariz Əhmədoğlu da cavab notasında Moskvanın Bakıya məsələnin üzərinə qayıtmağı məsləhət görməməsi və hərbi silahın verilməsi ilə bağlı əldə olunmuş siyahının ekspertizaya göndərilməsini tələb etməsini Azərbaycanın şantaj edilməsi hesab edir. "Rusiyanın xüsusi xidmət orqanları Dağıstanla, Azərbaycanla, eləcə də ərəb ölkələri ilə bağlı hansısa məlumatlar əldə edəndə onlardan həmin məlumatlarla bağlı sənədin ekspertizasını kim tələb edir ki, indi Rusiya həmin sənədin ekspertizasını Azərbaycandan tələb etsin. Rusiya gündə xüsusi xidmət orqanlarının məlumatlarına istinadən əməliyyatlar keçirir. Onda niyə həmin məlumatlar əvvəlcə ekspertiza olunmur"- deyən SİTM rəhbəri hesab edir ki, Moskvanın Bakıya bu şəkildə cavab verməsinin özü də bir təzyiq kimi qəbul edilməlidir. Politoloq Rasim Musabəyov da Rusiyanın cavab notasının Azərbaycan tərəfindən qənaətbəxş sayılmayacağını bildirir. Onun sözlərinə görə, Rusiyanın cavab notası izahat deyil. "Əgər izahat olsaydı, orada konkret olaraq göstərilərdi ki, Gürcüstandan çıxarılan silah və texnika filan yerdə bizim filan bazamızda saxlanılır. Bu, cavab notasında yoxdur. Bu isə o deməkdir ki, ruslar ermənilərə silah verdiklərini inkar etmirlər. Əgər Rusiya bu məsələnin doğrudan da ikitərəfli münasibətlərə xələl gətirməsini istəmirdisə, onda yoxlama təklif edə bilərdi. Təbii ki, Azərbaycan gedib Ermənistanda yoxlama aparası deyildi, amma beynəlxalq yoxlama təşkil etmək mümkün idi. Ona görə də mən buna cavab yox, başından rədd etmək kimi yanaşıram"- deyən politoloq hesab edir ki, həmin siyahıda hər hansı yanlışlıq olsa belə bu, rəqəmlərlə bağlı ola bilər. "Ola bilər siyahıda 29 tank yazılıb, amma əslində 30 tank verilib. Eləcə də digər silahlarla bağlı". Musabəyov hesab edir ki, Moskvanın bu addımı Bakı tərəfindən də cavabsız qalmayacaq. Onun fikrincə, Rusiyanın burada olan bir sıra maraqlarının təmin olunmaması Moskvaya Azərbaycana ermənilərlə birlikdə heç də istədiyini edə bilməyəcəyini hiss etdirməlidir. "Rusiya hiss etməlidir ki, onun bu addımları buradakı maraqlarının da təmin olunmasına problem yaradır. Təbii ki, biz süni şəkildə Rusiya ilə münasibətləri gərginləşdirməyi qarşımıza məqsəd qoymamışıq. Amma Rusiyanın bu addımlarının da cavabı olmalıdır" deyən politoloq vaxtilə Rusiyanın Azərbaycanı qaz məsələsi ilə bağlı şantaj etdiyini və buna rəsmi Bakının layiqli cavab verdiyini xatırladıb. Bu baxımdan da politoloq Rusiyanın belə aqressiv davranışlarının onun özü üçün problem yaradacağını düşünür. Onun sözlərinə görə, Azərbaycan prezidentinin NABUKKO sammitinə qatılması, ölkənin hərbi xərclərinin 2,5 milyard dollara çatdırılması, Azərbaycan tanklarının Türkiyə tərəfindən modernləşdirilməsi, Türkiyə ilə hərbi əməkdaşlığın genişləndirilməsi kimi məsələlər də Rusiyanın bu davranışlarından irəli gəlir. "Ona görə də kimsə düşünməsin ki, Rusiyanın bu cavabı ilə Azərbaycan razılaşacaq. Məsələ bu şəkildə bağlana bilməz və Azərbaycan da öz addımlarını buna müvafiq şəkildə atacaq". Vüsalə Rafiqqızı