ABŞ “ƏL-QAİDƏ” DÜŞƏRGƏSİNƏ BAKTERİOLOJİ SİLAH ATIB?! Terror təşkilatının Əlcəzairdəki düşərgəsində 40-dan çox adam dəhşətli vəba epidemiyasından ölüb “əl-Qaidə” beynəlxalq terror təşkilatının təlim düşərgələrindən birində kökü kəsilmiş hesab edilən dəhşətli vəba epidemiyası yayılır. Britaniyanın “The Sun” qəzetinin əldə etdiyi xəbərə görə, terror şəbəkəsinin Əlcəzairdəki təlim düşərgələrindən birində azı 40 nəfər bu xəstəlikdən ölüb. Xəstəlik terrorçulardan birinin cəsədinin ələ keçirilməsindən və müayinə olunmasından sonra aşkarlanıb. Ehtimal olunur ki, orta əsrlərdə Avropada milyonlarla adamın ölümünə səbəb olan bu xəstəlik “əl-Qaidə” üzvləri arasında kütləvi şəkildə yayılır. Məlumatlara görə, ölənlər “əl-Qaidə” Məğrib ölkələrində" adlı qruplaşmanın üzvləridir. Bu qruplaşma Əlcəzair, Somali və bəzi Afrika ölkələrində fəaldır, onun üzvləri vaxtilə ABŞ-ın Keniya və Tanzaniyadakı səfirliklərini partladıblar. Bildirilir ki, terror qruplaşmasının liderləri xəstəliklə necə mübarizə aparmaq lazım olduğunu bilmirlər, onlar ehtiyat edirlər ki, dəhşətli virus “əl-Qaidə”nin Əfqanıstan və Pakistandakı düşərgələrinə də yayıla bilər. “əl-Qaidə”nin Afrika bölməsinin üzvləri tez-tez bu ölkələrdəki düşərgələrdə olurlar. Bu xəstəliyin haradan “əl-Qaidə” düşərgəsinə yayıldığı məlum deyil. Lakin belə ehtimal var ki, bakterioloji silah hesab edilən vəba virusunu terror düşərgəsinə ABŞ-ın xüsusi xidmət orqanları ata bilər. Təhlükəsizlik orqanlarındakı adının çəkilməsini istəməyən anonim ekspert qəzetə açıqlamasında deyib ki, hazırda vəba terrorla mübarizədə ən ölümcül silah hesab oluna bilər: “Çünki terrorçuların bu xəstəliklə mübarizə aparmaq üçün elementar dərmanları da yoxdur, onlar bu xəstəliyə yoluxandan cəmi bir neçə saat sonra ölürlər”. “The Sun” qəzetinin əldə etdiyi məlumata görə, epidemiya Əlcəzairin paytaxtından 150 kilometrlik məsafədə yerləşən Tizi-Uzu əyalətindəki mağaralarda başlayıb. Amerika xüsusi xidmət orqanlarının axtardığı yerli “əl-Qaidə” liderlərindən biri Əbdülmalik Drukdel öz tabeçiliyində olanlar arasında kütləvi ölümlərdən sonra ölənləri dəfn edərək qalanlarla birlikdə sığınacaqdan gedib. Terrorçuların liderləri ehtiyat edirlər ki, sağ qalanlar bu dəhşətli xəstəlikdən yaxa qurtara bilmək üçün təslim olacaqlar. “əl-Qaidə”nin Məğrib ölkələrindəki lideri hesab edilən Drukdelin dəstəsində minlərlə yaraqlının olduğu bildirilir. Onun təşkilatının təlim düşərgələri Mərakeş, Tunis və Nigeriyada da var. Drukdel Üsamə bin Ladenin rəhbərlik etdiyi “əl-Qaidə” şəbəkəsi ilə müntəzəm əlaqə saxlayır. Vəba təhlükəli infeksion xəstəlikdir və müxtəlif formaları var. Bu xəstəliyin daşıyıcıları gənələr hesab olunur, lakin xəstəliyə yoluxan insanlar da bir-birilərini hava-damcı yoluyla yoluxdura bilirlər. Xəstəliyin ən dəhşətli forması ağ ciyər vəbasıdır, ona yoluxanların sağ qalmaq şansı yoxdur. Xəstəliyin inkubasiya dövrü bir həftəyə qədər davam edir, bu müddət ərzində simptomlar müşahidə edilmir, ancaq yoluxan insan digərlərini də yoluxdura bilər. Məlumatlara görə, orta əsrlərdə bu xəstəlik Avropa əhalisinin üçdə birini məhv edib. Xəstəliyə qarşı vaksin yalnız 20-ci əsrin əvvəllərində kəşf olunub. İnkişaf etmiş ölkələrdə vəbaya rast gəlinmir, lakin Asiyanın və Afrikanın bir çox ölkələrində bu xəstəlik ara-sıra yayılır. “Soyuq müharibə” dövründə bu xəstəliyin daşıyıcısı bakteriloji silah kimi ABŞ, Rusiya və bəzi başqa ölkələrin laboratoriyalarında saxlanılırdı. “əl-Qaidə” terrorçularının sanitar normaların mövcud olmadığı mağaralarda yaşadığı, onlarda bu xəstəliyə qarşı vaksinin yoxluğu nəzərə alınarsa onlara qarşı vəba virusunun silah kimi istifadə edilməsi mümkündür. Xatırladaq ki, ABŞ xüsusi xidmət orqanları son illər prezident Buşun gizli sərəncamı əsasında dünyanın müxtəlif yerlərində “əl-Qaidə”yə qarşı məxfi əməliyyatlar həyata keçiriblər və keçirməkdədirlər.