SİLAH QALMAQALIYLA BAĞLI ƏN SON MƏLUMAT: RUSİYA MÜDAFİƏ NAZİRİNİN MÜAVİNİ AZƏRBAYCANA GƏLİR Vladimir Popovkin Yaxın günlərdə Rusiya Müdafiə Nazirliyi nümayəndə heyətinin Azərbaycana səfəri gözlənir. «Milaz» İnformasiya Agentliyi Rusiyadakı hərbi mənbələrə istinadla bildirir ki, nümayəndə heyətinin səfərində əsas məqsəd Rusiya-Azərbaycan hərbi əməkdaşlığındakı vəziyyət, iki ölkə arasında imzalanmış 2009-cu il üçün hərbi-texniki əməkdaşlığa dair sazişdən irəli gələn məqamları müzakirə etməkdir. Missiyanın Bakıda keçirəcəyi görüşlərdə Rusiyanın Ermənistana 800 milyon dollarlıq silah örtürməsi faktının diqqət mərkəzində olacağı istisna deyil. «Milaz»a daxil olan məlumata görə, rus hərbiçiləri Azərbaycanda ölkələr arasında bu müstəvidə yaranmış gərginliyi aradan qaldırmağa çalışacaqlar. Hələlik rəsmi təsdiqini tapmayan digər məlumata görə, Azərbaycana gələcək rusiyalı hərbiçilərə Silahlı Qüvvələri silahlandırma idarəsinin rəisi, müdafiə nazirinin müavini general-polkovnik Vladimir Popovkin rəhbərlik edəcək. Xatırladaq ki, Rusiyanın Ermənistanın Gümrü şəhərində yerləşən 102 saylı hərbi bazasının silahlanma üzrə rəisi, Şimali Qafqaz Hərbi Dairəsi komandanının silahlanma üzrə müavini, general-leytenant Vyaçeslav Qolovçenkonun imzası ilə 2008-ci ildə ermənilərə ötürülən 800 milyon dollarlıq silah-sursatın arasında 21 ədəd T-72 tankı; 27 ədəd BMP-2, 12 ədəd BTR 70/80, 5 ədəd BMP-1 bazasında hazırlanmış BREM-2 döyüş maşınları; 4 ədəd ZSU 23-4 «Şilka» raketi; müxtəlif markalı «Strela» raketləri; 875 yeşik F-1, RQD-5 qumbaraları; 1050 yeşik RKQ-3/3 EM qumbarası; 7897 ədəd müxtəlif markalı (122 mm RS, 152 mm 2S3, 122 mm D-30 və s.) döyüş sursatı; 120 ədəd QP-25 lüləaltı qumbaraatanı; 2846 ədəd 5,45 millimetrlik AK-74 və AKS-74 avtomat silahları; 1472 ədəd 7,62 millimetrlik AKM və AKMS avtomat silahları; 103 ədəd NB-8 gecəgörmə cihazı; trotil şaşkaları; müxtəlif markalı (TM 62 M/P, OZM-72, PMN) minalar; 14 ədəd BM-37 minaatanları; 9 ədəd «Qrad» qurğusu (RSZO 9K51 BM-21); 10 ədəd T-55 bazasında hazırlanmış «Akasiya» qaubitsası (SAU 152 mm 1S); 14 ədəd MT-LBU bazasında hazırlanmış «Qvozdika» qaubitsası (SAU 122 mm 2 S1); 5 ədəd 100 millimetrlik «Rapira» topu (MT-12r); 210 ədəd 3 M9M3 «Kub» raketi və başqa silah, hərbi sursat, texnika və avadanlıqlar var. Məsələ ilə əlaqədar yanvarın 12-də Rusiyanın Bakıdakı səfiri Vasili İstratov Azərbaycan Xarici İşlər Nazirliyinə dəvət edilib. Nazir müavini Araz Əzimovla görüşdə Rusiya səfirinə rəsmən belə bir sual verilib: Rusiya tərəfinin Ermənistandakı bazasından Ermənistan Silahlı Qüvvələrinə 800 milyon dollar dəyərində silah verilməsi barədə məlumat nə dərəcədə həqiqətə uyğundur? V.İstratov bildirib ki, Rusiya tərəfi Azərbaycan tərəfini narahat edən məsələyə dair izahat verəcək. Rusiya Müdafiə Nazirliyi də yaxın vaxtda məsələyə rəsmi mövqeyini açıqlayacağını vəd edib. Yanvarın 15-də Azərbaycan Xarici İşlər Nazirliyi məsələ ilə bağlı bəyanat verib. Bəyanatda nazirlik sözügedən faktdan dərin narahatlığını vurğulayıb: «Belə ki, ötürülmüş silah-sursat Azərbaycan Respublikasının ərazilərinin bir hissəsini işğal edən ölkənin hərbi potensialını əhəmiyyətli dərəcədə gücləndirəcək. Azərbaycan Respublikasının Xarici İşlər Nazirliyi hesab edir ki, silahların ötürülməsi bu işğalın davamına və güclənməsinə imkan yaradacaq». Azərbaycanın Xarici İşlər Nazirliyi hesab edir ki, ermənilərə külli miqdarda silah-sursatın ötürülməsi münaqişənin nizamlanması ilə bağlı vəziyyətin gələcək inkişafına görə Rusiya Federasiyasının üzərinə xüsusi məsuliyyət qoyur: «Azərbaycan Respublikasının Xarici İşlər Nazirliyi Azərbaycan ərazilərinin işğalının güclənməsinə yardımçı olan bu cür addımlara qarşı öz etirazını bildirir. Azərbaycan tərəfi Rusiya Federasiyasını silahların ötürülməsinin nəticələrinin aradan qaldırılması məqsədilə bütün mümkün tədbirlərin həyata keçirilməsinə çağırır».