MTRŞ-ın qərarı Azərbaycana beynəlxalq təzyiqləri artırır "Xarici radiostansiyaların yayımına qoyulan məhdudiyyətlər Qərbdə ciddi rezonans doğurur" MTRŞ-nin qərarı ilə yanvarın 1-dən Azərbaycanın milli tezliklərində yayımlanan "Bi-Bi-Si", "Azadlıq" və "Amerikanın Səsi" radiostansiyalarının yayımı dayandırılıb. Azərbaycanın "Televiziya və radio yayımı haqqında" qanununa əsasən, xarici radiostansiyalar milli tezliklərdə yayımlana bilməz. Xarici radiostansiyalar peyk, internet və kabel şəbəkəsi vasitəsilə yayımlana bilər. Avropa Şurası Parlament Assambleyasının qış sessiyası ərəfəsində MTRŞ-in xarici radioların yayımının dayandırılmasıyla bağlı qərarı Azərbaycana beynəlxalq təzyiqləri artırmaqdadır. Cəmiyyətdə bu qərarın düzgün olub-olmaması ilə bağlı müxtəlif rəylər var, ayrı-ayrı partiyalar, QHT-lər buna öz münasibətlərini bildiriblər. Sözügedən məsələ o qədər reaksiya doğurub ki, MTRŞ-in qərarının nə qədər hüquqi əsaslı olmasından daha çox, bu qərarın Azərbaycana beynəlxalq təzyiqlərin artması daha çox narahatçılıq doğurub. Tural Belə bir sual da ortaya çıxır. Bəlkə MTRŞ sözügedən qərarı vermək üçün heç də düzgün vaxt seçməyib və ya qərar kifayət qədər əsaslandırılmayıb? Xarici radiolar üçün faktiki olaraq çıxış yolu qoymayan MTRŞ sədri Nuşirəvan Məhərrəmli dünən "Trend"ə açıqlamasında xarici radiostansiyaların milli tezliklərdə yayımının bərpası məsələsinə yenidən baxmayacağını bildirib. Onun sözlərinə görə, Azərbaycanın milli tezliklərində xarici radiostansiyaların yayımı məsələsi yenidən müzakirə obyekti ola bilməz: "Bizim üçün əsas meyar Azərbaycan qanunvericiliyidir". MTRŞ sədrinin sözlərinə görə, xarici radiostansiyaların Azərbaycanın milli tezliklərində yayımı məsələsinin yenidən müzakirəsi o halda mümkün olardı ki, həmin radiostansiyaların məxsus olduqları ölkələrdə xarici radiostansiyalar milli tezlikdə yayımlansın. Artıq ABŞ Dövlət Departamenti, Avropa Şurası, ATƏT-in Bakı ofisi və digər beynəlxalq təşkilatlar da Azərbaycanda xarici radiostansiyaların yayımının dayandırılmasından narahatlıqlarını bildiriblər və MTRŞ-nı qərara yenidən baxmağa çağırıblar. Avropa Şurası Azərbaycanda xarici radiostansiyaların yayımının dayandırılmasını pisləyərək bunu anlaşılmaz addım kimi qiymətləndirib. Bununla bağlı bəyanat verən Avropa Şurası Nazirlər Komitəsinin sədri, İspaniyanın xarici işlər naziri Miqel Anhel Moratinos və AŞ PA prezidenti Luis Mariya de Puçun Azərbaycanın 2001-ci ildə Avropa Şurasına üzv qəbul olunan zaman ölkədə demokratik cəmiyyətin əsaslarından birin təşkil edən söz azadlığı və media müstəqilliyini təmin edəcəyinə dair öhdəlik götürdüyünü xatırladıblar. Onlar Milli Teleradio Şurasının ölkədə xarici radiostansiyalarının yayımının dayandırılması ilə bağlı qərarının heç bir məntiqə əsaslanmadığın da vurğulayıblar. Qeyd edək ki, Bütöv Azərbaycan Xalq Cəbhəsi Partiyası (BAXCP) İdarə Heyəti də hökuməti xarici radioların yayımını bərpa etməyə çağırıb. Ən çətin günlərdə milli tezliklərdə yayımı dayandırılan bir sıra radiostansiyaların Azərbaycan xalqının milli-azadlıq hərəkatına dəstək verdiklərini xatırladan BAXCP İdarə Heyəti hesab edir ki, MTRŞ-nin qərarına yenidən baxılmalıdır: "1990-cı ildə, 20 Yanvar hadisələri zamanı rus-sovet hərbi birləşmələrinin ölkəmizdə törətdikləri qanlı cinayətlər barədə beynəlxalq ictimaiyyəti məlumatlandıran, bununla da Azərbaycan xalqının qismən də olsa informasiya blokadasından çıxmasına yardım göstərən "Azadlıq" radiosunun, eləcə də digər radiolranı yayımınan dayandırılması tamamilə yanlış qərardır və heç bir halda təqdir oluna bilməz. BXCP İdarə Heyəti xarici radioların ölkənin milli tezliklərində yayımının dayandırılmasıyla bağlı Milli Teleradio Şurasının qərarına kəskin etirazını bildirir. BAXCP İdarə Heyəti hesab edir ki, MTRŞ öz qərarına yenidən baxmalı və Azərbaycan hökuməti xarici radiostansiyaların yayımınan bərpasıyla bağlı konkret addımlar atmalıdır". Məsələ ilə bağlı fikirlərini öyrəndiyimiz politoloq Leyla Əliyeva MTRŞ-nin xarici radiostansiyalara qadağaların qoyulmasına beynəlxalq təşkilatların ciddi reaksiya verməsinin Azərbaycan üçün başağrısına çevrilməsini istisna etmədi. Onun sözlərinə görə, ABŞ Dövlət Departamenti, Avropa Şurası, ATƏT-in Bakı ofisi və digər beynəlxalq təşkilatların Azərbaycanda xarici radiostansiyaların yayımının dayandırılmasından narahatlıqlarını bildirməsi adi hal sayılmamalıdır. Qloballaşan dünyada Azərbaycan kimi yenicə müstəqillik qazanmış ölkələrdə informasiyaların yayılmasına və xarici radiostansiyaların yayımına qoyulan məhdudiyyətlər Qərbdə ciddi rezonans doğurur: "Yaxın vaxtlarda bu radiostansiyaların yayımının bərpa edilməsi real görünməsə də, bu istiqamətdə Avropanın və ABŞ-ın ciddi təzyiqləri davam edəcək. Xarici radiolarla belə rəftar edilməsi" Azərbaycanın imicinə də mənfi təsir göstərib. Yaxın vaxtlarda MTRŞ-nin atdığı bu addımın əks-effektini müşahidə edəcəyik".