Ukrayna rus qazını Avropaya ötürməyəcək Rusiya ilə "qaz müharibəsi" Ukraynada siyasi gərginliyi artırır "Rusiya təbii qazının Ukrayna ölkə ərazisi ilə Avropaya nəqli texniki cəhətdən mümkün deyil". Bunu "Naftoqaz Ukrainı" Milli Səhmdar Şirkətinin rəhbəri Oleq Dubina deyib. Onun sözlərinə görə, Rusiyanın qaz nəqliylə bağlı tələbi dəyişməyib, "Qazprom" yenə də "Naftoqaz"a əvvəlki tələbnaməni göndərib. Dubina bildirib ki, Rusiya "Suca" stansiyasından qaz axınının açılaraq "Orlovka"ya qədər çatdırılmasını istəyir. Ancaq Ukraynanın bu tələbi yerinə yetirmək imkanı yoxdur: "Biz bunu etsək, bəzi bölgələrimiz qazsız qala bilər. Ona görə də dünən yaranmış situasiya bu gün də davam edir". Dubinanın sözlərinə görə, 2009-cu ildə qazın nəql istiqamətlərinin və həcminin dəqiq göstərildiyi texniki saziş hələ imzalanmayıb: "Buna görə qaz stansiyalarının iş şərtlərilə bağlı 1 aylıq texniki protokol hazırlanıb". Raifə Rusiya Avropaya qazın nəqlini bərpa etsə də, Avropaya mavi yanacaq hələ də çatmayıb. Bundan narahat olan Avropa Birliyi Rusiya və Ukraynanı tərslik etməməyə çağırıb. Rusiyanın baş naziri Vladimir Putin qazın Avropaya nəqlinin bərpasından sonra "Qazprom"un baş qərargahına gedib. "Qazprom"un sədr müavini Aleksandr Medvedyev bildirib ki, Ukrayna qaz kəmərləri sıradan çıxdığından "Naftoqaz" qazı Avropaya ötürə bilmir. Vladimir Putin isə bildirib ki, Ukrayna ərazisilə qaz nəql olunmursa, ukraynalı tərəfdaşlarla birlikdə qazı ötürmək üçün hansı əlavə tədbirlərin lazım olması barədə düşünməliyik: "Bəlkə Ukraynanın qaz kəmərləri elə vəziyyətdədir ki, onlar qazın lazımi həcmdə nəqlinə imkan vermir. Bütün bunlar mümkündür, lakin belədirsə, bu barədə səmimi və düzgün danışmaq lazımdır". "Qazprom"un sədri Miller isə bəyanlayıb ki, Rusiyaya aid olan hissədə qaz kəmərləri qazla doludur və qaz Ukraynanın tranzit sistemilə ötürülmür. Bu ərəfədə Ukrayna prezidentinin enerji məsləhətçiləri bildiriblər ki, Rusiya bilərəkdən qazı texniki cəhətdən çətin marşrutla nəql edir ki, "Naftoqaz" məcbur qalıb yerli ehtiyatlardan istifadə edərək Avropaya qaz çatdırsın və yerli istehlakçıların qazı kəsilsin. Ukrayna dövlət başçısı Viktor Yuşşenko isə deyib ki, "Ukrayna qaza olan borcunu tamamilə ödəyib". O Moskvanı ölkənin qaz sisteminə nəzarət etməyə cəhd göstərməkdə günahlandırıb: "Mən istəyirəm ki, rəsmi mövqe Avropa Birliyi vətəndaşlarına və hökumət başçılarına çatdırılsın, Ukrayna Avropaya rus qazının nəqlinin dayanması istiqamətində heç bir addım atmayıb. Bu gün həddindən artıq söz-söhbətlər var. Qeyri-obyektiv məlumatlara baxmayaraq, bu bizim üçün prinsipial mövqedir. Çox güman bütün bunların əsas məqsədi öhdəliklərini yerinə yetirən tərəflərin hörmətdən salınmasıdır". Viktor Yuşşenkonun sözlərinə görə, Rusiyanın bu addımı Ukraynanın suverenliyinin pozulması kimi qiymətləndirilə bilər. Yuşşenko xatırladıb ki, analoji hadisə 2007-ci ildə Belarusda da baş vermişdi. Amma Rusiya ilə qaz müharibəsi Ukraynada siyasi gərginliyi də dərinləşdirir. Bu məqsədlə Ali Radanın növbədənkənar iclasında çıxış edən Regionlar Partiyasının lideri Viktor Yanukoviç 15 yanvarda keçiriləcək iclasda hökumətin buraxılmasi və prezidentin impiçmenti kimi məsələləri gündəliyə salınmasını təklif edib. Bu arada Avropa Parlamentinin Xarici Əlaqələr Komitəsinin sədri Yaçex Sariuş Volski çərşənbə axşamı qurumun sessiyasında deyib ki, Rusiya ilə Ukrayna arasındakı qaz böhranı öz həllini tapmasa, Avropa Birliyi sanksiyalar tətbiq edə bilər. O deyib ki, vəziyyət indiki kimi davam edərsə, Avropa Parlamenti AB Nazirlər Şurasına sanksiyaların tətbiqi təklifini irəli sürəcək. Komitə sədri hər iki tərəfi qarşılıqlı ittihamlardan əl çəkməyə çağıraraq onların diqqətini soyuq qış mövsümündə soyuqdan donan insanların taleyinə yönəldib. Müxtəlif mənbələrin yaydığı məlumatlara əsasən, Ukrayna qaz nəqli sistemini ABŞ şirkətlərinə satmağa hazırlaşır. Bu barədə Ukrayna xarici işlər naziri Vladimir Oqrızko və ABŞ dövlət katibi Kondoliza Rays arasında dekabrda imzalanan "Strateji əməkdaşlıq xartiyası"nda bildirilir. Sənəddə Vaşinqtonun Ukraynanın köhnəlmiş qaz sisteminin yenilənməsinə kömək edəcəyi vurğulanır. Xatırladaq ki, Rusiya Ukraynanı Amerikanın göstərişilə hərəkət etməkdə günahlandırıb. "Qazprom" şirkətinin sədr müavini Aleksandr Medvedyev Kiyevin atdığı addımların "inanılmaz" olduğunu və bütün bu hadisələrin başqa bir ölkədən idarə edildiyi təsəvvürünün yarandığını açıqlayıb: "Həqiqətən də, Ukraynadakı gərginlik Amerikanın "demokratiyanın müdafiəsi uğrunda" növbəti yürüşünə gətirib çıxara bilər". Rəsmi Vaşinqton isə Rusiyanın bu iddiasının "cəfəng" olduğunu bildirib. Dövlət Departamentinin rəsmi nümayəndəsi Şon Makkormak Aleksandr Medvedyevin bəyanatının arxasında heç bir fakt durmadığını vurğulayıb.