Fransa "Həmas"ın sahibiylə dil tapmağa çalışır Bernar Kuşner Mənuçöhr Müttəkiyə telefon açaraq terrorçu təşkilatı atəşkəsə razı salmağa çağırıb İsrailin Qəzzada hərbi əməliyyatları davam etdirdiyi bir vaxtda, Knesset üsvü Avigdor Liberman qəribə təkliflə çıxış edib. İsraildə nəşr edilən "Yerusalim Post" qəzetinin yaydığı məlumata görə, qatı sağçı siyasətçi Liberman "Həmas"ın iqtidarda olacağı müddətdə İsrailin təhlükəsizliyinin təmin olunmadığını bildirib və Qəzzaya atom bombası atmağı təklif edib. "ABŞ-ın II Dünya müharibəsində Yaponiyaya qarşı etdiyini biz də "Həmas"a qarşı edək"- deyən Liberman Qəzzanı işğal etməyin gərəksiz olduğunu bildirib. Dünən İsrail xüsusi təyinatlı əsgərləri Qəzza şəhərinə girərək "Həmas" təşkilatının üzvlərilə döyüşə başlayıblar. İsrail ordusu şəhərin içinə doğru bir neçə yüz metr irəliləyə bilib. Hər tərəfdə intensiv atışma gedir. Raifə İsrail hökumətinin nümayəndələri bildiriblər ki, gün ərzində Qəzzadakı 100-dən çox obyekt, o cümlədən "Həmas"ın Misirə keçmək üçün istifadə etdiyi 55 tunel atəşə tutulub. Fələstin tərəfi isə Qəzza sektorunda gün ərzində 40 nəfərin öldüyünü bildirir. Həkimlər atəşə məruz qalan bir çox rayonlara gedə bilməyiblər. Fələstin mənbələri qeyd edirlər ki, dekabrın 27-də başlayan əməliyyat zamanı 975 nəfər öldürülüb. Onlardan 311 nəfəri uşaq, 76 nəfəri qadındır. 4400 nəfər yaralanıb. İsrail isə 13 nəfər itirdiyini bildirir. Dünən Livan ərazisindən İsrailin şimalına ən azı üç raket zərbəsi endirilib. Raketlər insanlar məskunlaşmayan ərazidə partladığına görə dağıntı və tələfat olmayıb. İsrail ordusu raketi atəşi açılan nöqtələrə artilleriya zərbəsi endirib. Qeyd edək ki, yanvarın 8-də baş verən analoji insident iki İsrail vətəndaşının yaralanmasına səbəb olub. O zaman "Hizbullah" təşkilatı baş verən insidentlə heç bir əlaqəsi olmadığını açıqlamışdı. Livan ərazisindən Israilin Kerya Şamuna məntəqəsinə 3 raket atılmasına cavab olaraq, İsrail ordusu Livanın cənubunu raket atəşinə tutub. İranın dövlət radiosu yanvarın 13-də İsrail dəniz qüvvələrinin Qəzzaya üzən yük gəmisini dayandırdığı barədə məlumat yayıb. İranın Bəndərabbas limanından yola düşən gəmi Qəzzaya 200 ton dava-dərman və ərzaq aparırmış. Yük gəmisi Qəzzanın 30 kilometrliyində dayandırılıb. İsrail İranı "Həmas"a maddi və silah-sursat yardımı göstərməkdə günahlandırır. Eyni zamanda, İsrailə döyüş sursatı göndərmək istəyən ABŞ Müdafiə Nazirliyinin planı baş tutmayıb. Pentaqondan bildiriblər ki, Yunanıstan hərbi yükün öz limanlarından İsrailə göndərilməsinə razılıq verməyib. Mənbə deyib ki, İsrailə döyüş sursatı göndərmək barədə razılıq hələ Qəzzada hərbi əməliyyatın başlamasından əvvəl - 2008-ci ilin yayında əldə edilib. Hərbi yük Yunanıstanın Astakos limanından İsrailin Aşdod limanına göndərilməli imiş. Yanvarın 12-də informasiya agentlikləri Pentaqona istinadən belə bir xəbər yayıblar ki, Qəzzada hərbi əməliyyatın keçirildiyi bir vaxtda yükün təhlükəsizliyini təmin etmək mümkün olmadığından ABŞ İsrailə hərbi sursat göndərməyi təxirə salıb. Ancaq yanvarın 13-də Pentaqonun rəsmi nümayəndəsi Yunanıstanın etirazı üzündən planın baş tutmadığını açıqlayıb. Hazırda Pentaqon yükü göndərmək üçün başqa marşrut axtarır. Avropa parlamentinin sosialistlər qrupunun rəhbəri Martin Şulçun adından yayılan bəyanatda isə bildirilir ki, BMT Təhlükəsizlik Şurasının Qəzzadakı vəziyyətə dair qəbul etdiyi qətnaməyə hörmətlə yanaşmaq lazımdır: "BMT-nin qətnaməsi zəruri atəşkəsə nail olmaq üçün güclü bazadır. Biz əminik ki, İsrail-Fələstin münaqişəsi hərbi yolla həll edilə bilməz. Yaxın Şərqin tarixi onu göstərir ki, hərbi yol, silah yolu səhv seçimdir. Heç bir ölkə raketləri hədəfinə çevrilmək istəməz, lakin İsrailin reaksiyası qeyri-proporsionaldır və qəbuledilməzdir. Bütün münaqişə tərəfləri danışıqlar masası arxasına keçməlidirlər". İstanbulda İslam Ölkələri Konfransı Təşkilatı Parlament Birliyinin İcraiyyə Komitəsinin Qəzzada baş verən son hadisələrlə bağlı iclası keçirilir. Toplantıda iştirak edən Iran parlamentinin spikeri Əli Laricani Qəzzada keçirilən hərbi əməliyyatların insanlıq əleyhinə yönəldiyini bildirib. Fars rejiminin nümayəndəsi Laricani Qəzzada keçirilən hərbi əməliyyatların bütün dünyada kəskin etiraza səbəb olduğunu bildirərək, tez bir zamanda hərbi əməliyyatların qarşısının alınmasının vacib olduğunu vurğulayıb. Fransa İrandan "Həmas"ı atəşkəsi və BMT-nin 1860 saylı qətnaməsini qəbul etməyə razı salmasını istəyib. Fransanın xarici işlər naziri Bernar Kuşner İranın XİN rəhbəri Mənuçöhr Müttəkilə telefon danışığı aparıb. Kuşner Müttəkidən BMT-nin 1860 saylı qətnaməsinin icrasına şərait yaratmaq və atəşkəs əldə etmək məqsədilə "Həmas"ı razı salmaq üçün köməklik göstərməsini istəyib.