İsrail yenə də Türkiyəyə müraciət etməli olacaq "Amma Türkiyə rəsmilərinin İsrailin ünvanına sərt bəyanatlar səsləndirilməsi rəsmi Təl-Əvivinin Ankaraya inamı azaldıb" Terrorçu "Həmas" təşkilatının Misir rəhbərliyilə münasibətləri pozulandan sonra Türkiyə hökuməti vasitəçilik cəhdlərində bulunur. Artıq Türkiyənin İsraillə Fələstin arasında vasitəçilik missiyanı yerinə yetirəcəyi bildirilir. Bundan əlavə, Qəzza-Misir sərhədinə Türkiyənin nəzarət edəcəyi və Fələstinin "Həmas" təşkilatının buna razı olması barədə məlumatlar da yayılıb. Məsələylə bağlı "Atlas" Araşdırmalar Mərkəzinin rəhbəri Elxan Şahinoğluyla əlaqə saxladıq. O bildirdi ki, Qəzzada silahlı qarşıdurmanın genişlənməsi narahatçılıq yaradır: "Yaxın günlərdə gərginlik və silahlı toqquşmalar azalan xətt üzrə inkişaf edəcək. Çünki İsrail rəsmi dairələri də Qəzzada uzun müddətli hərbi əməliyyatlar aparmağın mümkün olmadığını başa düşürlər. Tural Ona görə də problemin danışıqlar masası arxasında həllinə çalışmaq lazım gələcək. İsrail rəsmiləri də vuruğulayırlar ki, onların məqsədi "Həmas"ı yox etmək deyil. Əslinə qalsa bu mümkün də deyil. Çünki bu təşkilatın altı min döyüşçüsünün olduğu bildirilir. Qısa müddətdə altı min "Həmas" fəalının hamısını məhv etmək mümkün deyil. Sadəcə, rəsmi Təl-Əviv "Həmas"ı müəyyən mənada zəiflətmək istəyir ki, bundan sonra həmin təşkilat anlaşmalara qol çəksin və İsraili raket atəşinə tutmayacağına dair öhdəlik götürsün". Onun sözlərinə görə, beynəlxalq təşkilatların təzyiqi altında İsrail danışıqlar masası arxasında oturacaq: "Bu ölkə çalışır ki, indiki bombardımanları davam etdirməklə danışıqlarda özünə münasib şərtlər əldə edə bilsin. Bu gərginlikdən sonra dünya müəyyən bir sakitlik dövrünə qədəm qoyacaq. Bu dövrün yaranması Barak Obamanın Ağ Evə sahib olmasından sonra surətlənəcək. Son nəticədə isə Fələstin dövlətinin yaradılması və İsrailin bu ölkəni tanıması üçün müəyyən bir münbit şərait yaranacaq". Türkiyənin ötən il BMT Təhlükəsizlik Şurasının müvəqqəti üzvü təyin olunduğunu xatırladan Elxan Şahinoğlu bunun Ankara üçün önəmli olduğunu vurğuladı: "BMT TŞ-yə üzvlük də onu diktə edir ki, Türkiyə beynəlxalq məsələlərin həllində aktiv olsun. Artıq Türkiyə xarici siyasət idarəsinin müxtəlif istiqamətlərdə fəallıq göstərdiyini müşahidə edirik. Türkiyə Avropa Birliyinə üzvlük, Kıbrıs probleminin həlli, Qafqazda sülh və əmkdaşlıq, kimi ciddi məsələlərə qol qoymağa çalışır. İndi isə bu ölkə Yaxın Şərq məsələsində də xeyli aktivləşib. Türkiyə Qəzza bölgəsində hərbi əməliyyatlardan öncə Suriya və İsrail arasında danışıqlara da vasitəçilik edirdi. Qəzzadakı gərginlik azaldıqdan, silahlı qarşıdurma başa çatdıqdan sonra bu vasitəçilik davam etdirilə bilər. Amma Türkiyə rəsmilərinin İsrailin ünvanına sərt bəyanatlar səsləndirilməsi rəsmi Təl-Əvivinin Ankaraya inamı azaldıb. Hesab edirəm ki, İsrail yenə də son anda Türkiyəyə müraciət etməli olacaq. Çünki bu ölkə İsrailin müsəlman ölkələri arasında ən çox münasibət saxladığı dövlətdir. Türkiyə "Həmas"ın Suriyadakı təmsilçisilə də müəyyən təmaslar qurur. Bu mənada Ankara həm İsraillə diplomatitk əlaqələrini davam etdirəcək, həm də "Həmas"la təmaslar qurub vasitəçilik missiyasını yerinə yetirəcək. Ankaranın təşəbbüslərini də dünya dəstəkləyir. Artıq "Həmas" rəhbərliyi də vurğulayıb ki, onlar Qəzzaya sülhməramlı qüvvələr gələndə orada türk əsgərlərini də görmək istəyirlər".