Qəzza ilə əlaqədar İstanbulda birinci ledilərin toplantısı oldu

SON XƏBƏRLƏR

Qəzza ilə əlaqədar İstanbulda birinci ledilərin toplantısı oldu

2021.10.20, 07:36

Gunaz.tv

Qəzza ilə əlaqədar İstanbulda birinci ledilərin toplantısı oldu

Türkiyənin Baş naziri Rəcəb Tayyib Ərdoğanın xanımı Əminə Ərdoğanın təşəbbüsü ilə İstanbulda birinci xanımların iştirakilə “Qadınlar Fələstində Sülh Naminə” adlı toplantı keçirilib. Türkiyə mətbuatının yazdığına görə Əminə Erdoğan bu toplantıya qatılması üçün Azərbaycan prezidentinin xanımı Mehriban Əliyevaya da dəvət göndərmişdi. Azərbaycanı bu tədbirdə Azərbaycan Milli Məclisinin sədr müavini Bahar Muradova təmsil edib. Bu tədbirdə İordaniya kraliçası Raniyə, Suriya prezidentinin həyat yoldaşı Asma Əssəd, Qətər şeyxinin xanımı şeyxa Moza bint Naser əl-Misned, Livan baş nazirinin arvadı Vəfa Süleyman və Pakistan baş nazirinin xanımı Bəyim Fövziyə Gilani iştirak edirdilər. Liviya lideri Müəmmar Qəzzafi bu tədbirə qızı Aişəni göndərib.

Yenə də Türkiyə mətbuatında getmiş bir sıra xəbərlərə görə Fransanın birinci ledisinə dəvət göndərilibmiş. Carla Bruni bu tədbirə şəxsən qatılmasa da ora yazılı dəstək mesajı göndərib. Belə mesajları göndərənlərin arasında İspaniya baş naziri Xose Luis Zapateronun xanımı Sonsoles Espinosa, Albaniyanın baş naziri Sali Berişanın həyat yoldaşı Liri Berişa və Britaniyanın keçmiş baş naziri Tony Blairin xanımı Cherie Blair də var. Bu tədbirə videogörüntü ilə qatılan BMT Xilas və Yardım İşləri Agentliyinin ali baş komissarı Karen Koning Abuzayd bildirib ki, bu gün Qəzzada baş verənlər bəşəriyyət üçün məqbul olan heç bir qanun və qaydaya sığmır. Tədbirə sədrlik edən Əminə Erdoğan təsirli çıxış edib. O deyib ki, “Məsumluğa və qanuniliyə hörmət etməyənlər bəşəri dəyərlərdən və humanizmdən danışa bilməzlər. Uşaqları və mülkiləri öldürənlər heç bir bəhanənin arxasında gizlənə bilməzlər”. Türkiyə mənbələri xəbər verirlər ki, bu tədbirə bir sıra tanınmış şou və sənət xadimləri də dəvət edilibmiş. Hollivudun tanınmış aktyorlarından Antonio Banderas görüşə göndərdiyi mesajda bildirib ki, zorakılıq heç vaxt həll yolu ola bilməz. Tədbirə qatılan birinci ledilər başlarına ənənəvi Fələstin örtüyü salmışdılar. Toplantının sonunda “İstanbul Bəyanatını” qəbul edən tədbir iştirakçıları Qəzzada hərbi əməliyyatların dərhal dayandırılması, qoşunların bölgədən çıxarılması və blokadanın götürülməsini tələb etdilər. Bu arada, Türkiyə prezidenti Abdulla Gül Amerika Birləşmiş Ştatlarının prezidenti Corc Buşa zəng edib. Telefon danışığı zamanı Qəzzadakı vəziyyətin müzakirə edildiyi bildirilir.bbc

GUNAZ.TV

SON XƏBƏRLƏR