İSRAİL-İRAN MÜHARİBƏSİNİN QARŞISI SON ANDA ALINIB

SON XƏBƏRLƏR

İSRAİL-İRAN MÜHARİBƏSİNİN QARŞISI SON ANDA ALINIB

2021.10.20, 07:36

Gunaz.tv

İSRAİL-İRAN MÜHARİBƏSİNİN QARŞISI SON ANDA ALINIB “The New York Times”dan sensasion iddia: “ABŞ Tehranın nüvə proqramını əngəlləmək üçün məxfi əməliyyat keçirib”

“Ötən il İsrail İranın nüvə obyektlərinə hava zərbələri endirmək istəyib. Lakin ABŞ prezidenti Corc Buş müdafiə naziri Robert Geytsin məsləhətlərindən sonra hərbi əməliyyatların başlanmasını son anda əngəlləyib. Ancaq hərbi əməliyyatlar olmasa da ABŞ xüsusi xidmət orqanları prezident Buşun məxfi sərəncamı əsasında İranın nüvə proqramlarını əngəlləmək üçün iki il ərzində gizli əməliyyatlar həyata keçirib”. Bu məlumatlar “The New York Times” qəzetinin dünənki sayında dərc edilmiş məqalədə yer alır. Amerikadakı və xaricdəki yüksəkrütbəli rəsmi mənbələrə, o cümlədən xüsusi xidmət orqanlarındakı qaynaqlara istinad edən qəzet yazır ki, ötən ilin əvvəllərində İsrail ABŞ-dan İraq üzərindən İranı vurmaq üçün uçuş icazəsi və nüvə obyektlərini dağıtmaq üçün yer altında partlayan bombalar istəyib. Ancaq gərgin danışıqlardan sonra Buş və onun administrasiyasının üzvləri İsraili İrana hücum etmək planlarından daşındırıb. Bu işdə müdafiə naziri Robert Geytsin rolu böyük olub. O, Buşu inandıra bilib ki, İranın nüvə obyektlərinə endiriləcək hava zərbələri istənilən nəticəni verməyəcək. İrana qarşı hərbi əməliyyatlar aparılmasa da, Buş iki il ərzində Tehranın nüvə silahı proqramlarını əngəlləmək üçün məxfi əməliyyatların keçirilməsi haqda əmr verib. Məlumata görə, İsrail İranın əsas nüvə obyekti olan Natanzanı vurmaq istəyirmiş. Bu məqsədlə baş nazir Ehud Olmert Vaşinqtonda səfərdə olaraq ABŞ-dan dəstək istəyib. Lakin gərgin danışıqlardan sonra Buş administrasiyası İsraili əməliyyatı heç olmasa təxirə salmağa razı sala bilib. Çünki Ağ Evdə təsdiq ediblər ki, İsrailin İrana hava zərbələri endirməsindən sonra münaqişə böyüyəcək və ABŞ İsrailin müdafiəsinə qalxmalı olacaq. Amerikanın İraq və Əfqanıstanda 140 minlik qüvvə saxladığı bir vaxtda bu münaqişə Birləşmiş Ştatlar üçün təhlükəli ola bilərdi. Məlumata görə, İsrail İrana Buşun səlahiyyət müddətinin başa çatmasına bir neçə ay qalmış zərbə endirməyə hazırlaşıb. Qəzetin yazdığına görə, Amerika kəşfiyyatı İsraili inandırıb ki, İranın nüvə proqramlarını əngəlləmək üçün gizli əməliyyatlar gedir və bu, hərbi əməliyyatlardan daha sərfəlidir. Bildirilir ki, belə gizli əməliyyatlar zamanı yüzlərlə Amerika kəşfiyyatçısı İrana keçib, ölkənin məxfi nüvə proqramlarına çıxış imkanı əldə edilib və Avropadakı agentlər vasitəsilə Tehrana işə yaramayan nüvə avadanlıqları ötürülüb. Belə əməliyyatlardan biri də Türkiyə üzərindən həyata keçirilib. İran Türkiyədə vasitəçi şirkətlərin birindən sentrifuq hissələri alıb, lakin bu hissələr Amerika agentləri tərəfindən əvvəlcədən korlanıbmış. Nəticədə onların İranda quraşdırılmasından sonra kiçik miqyaslı bir neçə partlayış baş verib və uranın zənginləşdirilməsi prosesi xeyli ləngiyib. Fərhad MƏMMƏDOV musavat

GUNAZ.TV

SON XƏBƏRLƏR