Fars rejimi özünə-sözünə nəzarəti itirir "Hüsnü Mübarəkin başına pul qoyulması rəsmi Tehranın daha çox təklənməsinə yol açacaq" İran İnqilab Keşikçiləri Korpusunun ("Sepah") nəzdində fəaliyyət göstərən "Bəsic" (rejim tərəfdarı olan könüllülər dəstəsi) təşkilatının tələbələr qanadı yanvarın 5-də Misir prezidenti Hüsnü Mübarəki qətlə yetirə bilən şəxsə 1 milyon dollar mükafat verəcəyi barədə bəyanat yayıb. "Bəsic" təşkilatı mükafatın təyin edilməsinin Misir hökumətinin sərhədyanı Rəfəh keçid məntəqəsini Qəzza bölgəsindəki fələstinlilərin üzünə bağlamasıyla əlaqədar olduğunu bildirib. Bəyanatda deyilir: "Beynəlxalq terrorçu Hüsnü Mübarəki dünyanın hər bir nöqtəsində qətlə yetirə bilən şəxsə 1 milyon dollar mükafat veriləcək". Tehranda Qəzzaya göndəriləcək könüllülərin səfərbərliyilə məşğul olan Beynəlxalq İslam Şəhidləri Hərəkatının rəsmisi Fəruz Rəcayi isə jurnalistlərə açıqlamasında Misir prezidenti Hüsnü Mübarəkin qətli üçün mükafat qoyulmasını dəstəkləyərək lazım olsa, mükafat miqdarının daha da artırıla biləcəyini bildirib. Tural Məsələ ilə bağlı fikirlərini öyrəndiyimiz "Atlas" Araşdırmalar Mərkəzinin rəhbəri Elxan Şahinoğlu İranın bu çağırışlarının vəziyyəti gərginləşdirdiyini vurğuladı. Onun sözlərinə görə, belə çağırışlar rəsmi Qahirə ilə Tehran arasında olan soyuq münasibətləri daha da gərginləşdirib pik həddinə çatdıra bilər. Onsuz da, Misir ilə İran arasında olan münasibətlər uzun müddətdir ki, kifayət qədər pisdir. Əgər bu terrorçu çağırışları İran rəhbərləri də dəstəkləsə, demək iki ölkə müharibə həddinə çatacaq: "Mən bu proseslərin arxasında İranın müəyyən hakimiyyət dairələrinin dayandığını, belə bəyanatların daxili ziddiyyətlərdən irəli gəldiyini düşünürəm. Beynəlxalq təzyiqin artması perspektivi, gələn il İranda keçiriləcək prezident seçkiləri bu ölkədə daxili ziddiyyətləri kəskinləşdirib. Həmin ziddiyyətlər isə zaman-zaman müxtəlif formalarda özünü göstərir. Aqtıq 40 ilə yaxındır ki, Misirə rəhbərlik edən, həm Qərb, həm də Ərəb dünyasında böyük nüfuzu olan Hüsnü Mübarəkə qarşı terrorçu çağırışlar qəribə təəssürat yaradır. Sanki rəsmi Tehran özünün sağlam məntiqini itirir. Misir rəhbərliyini öz əleyhinə çevirmək İranın rəhbərlərinə baha başa oturacaq. Qeyd edim ki, iki ölkə arasında münasibətlərinin daha da gərginləşməsini Misir və İran mətbuatında da görə bilərik. Hər hansı bir dövlətin başçısına qarşı belə həqarətli çıxış yeni qarşıdurmaya yol açmış olur. Misirin Qəzza ilə sərhədləri bağlı saxlamasına tənqidi münasibət bəsləmək olar. Çünki bu qərar fələstinlilərə humanitar yardımın çatdırılmasına əngəl oldu. Amma terrorçu çağırışlar edərək Hüsnü Mübarəkin başına pul qoymaq İrana başucalığı gətirməyəcək və belə addımlar rəsmi Tehranın beynəlxalq aləmdə daha çox təklənməsinə yol aça bilər". Elxan Şahinoğlu onu da vurğuladı ki, İranın hakim dairələri istəsəydilər, bu tip açıqlamaların qarşısını ala bilərdi. Deməli, belə fikirlərin səsləndirilməsi rəsmilərin də maraqlarına uyğundur. Görünür Misirin Qərb dünyasıyla əlaqələrinin genişlənməsi və rəsmi Qahirənin Tehrana tənqidi yanaşması belə çağırışların stimullaşdırılmasına rəvac verib. Vaxtilə Salman Rüştü "Şeytan ayələri" kitabını yazanda İranın dini lideri oxşar açıqlama yayıb və onun başına pul qoyub. İslama həqarətlə yanaşan Salman Rüştüdən fərqli olaraq, Misir prezidenti Hüsnü Mübarək haqqında belə sərt fikirlərin səsləndirilməsi düzgün addım sayılmır. Bu daha çox terror çağırışlarına bənzəyir. Fikrimcə, yaxın günlərdə İran prezidenti bu məsələyə rəsmi münasibət bildirməsə, iki ölkə arasında münasibətlər müharibə həddinə çata bilər. "Atlas" Araşdırmalar Mərkəzinin rəhbəri ərəb dünyasında həmrəylik probleminin hökm sürdüyünü vurğuladı. İsrail Qəzza bölgəsini bombalamağa başlayandan sonra bu addıma ərəb ölkələrindən birmənalı reaksiya gəlmədi. O, dövlətlər, siyasi qüvvələr İsraili çox sərt tənqid etdilər ki, onların terrorçu "Həmas"la iş birliyi var və bu təşkilatı dəstəkləyirlər. Belə ölkələr isə Suriya və İran oldu. Amma Səudiyyə Ərəbistanı, İordaniya rəsmi Təl-Əvivin addımlarına sərt reaksiya vermədilər. Bu da onunla bağlıdır ki, əslində terrorçu "Həmas"ın siyasi meydandan yox edilməsi onların da maraqlarına uyğundur. Bu ölkələr daha çox Fələstin muxtariyyətinin hazırkı rəhbəri Mahmud Abbasla təmaslar qururlar və onu dəstəkləyirlər. Elxan Şahinoğluna görə, terrorçu, İranın nəzarətində olan "Həmas"ın fəaliyyətinin dayandırılması elə "Fəth" hərəkatının, Mahmud Abbasın maraqlarına cavab verir: "Ərəb dünyasında sadə insanlar arasında bu qırğınlar pislənir. Reallıq isə budur ki, "Həmas"ın zəiflədilməsi əksər ərəb ölkələrinin və Mahmud Abbasın xeyrinədir. Dünya bu savaşdan sonra xüsusi bir siyasi mərəhələyə qədəm qoyacaq, bölgədə atəşkəs bərpa olunacaq. Hətta Qəzzaya beynəlxalq sülhməramlı qüvvələrin yerləşdirilməsi də aktual ola bilər. Çox güman ki, İsrail hakimiyyəti Qəzza bölgəsində nəzarəti artırsa da, sonradan bu nəzarətin Mahmud Abbas tərəfdarlarına keçməsinə razılaşa bilər. Bu da terrorçu "Həmas"ın əsas rəqiblərindən sayılan Mahmud Abbasın xeyrinə işləyən amildir. Onu da xatırladım ki, Misirin "Həmas"la olan problemləri səbəbindən Hüsnü Mübarək Qəzza bölgəsilə sərhədləri bağlı saxladı. Yəni, ərəb dünyası ilə İsrail arasında 50 illik qarşıdurmada bəlkə də ilk dəfə göründü ki, ərəb ölkələrinin bir qisminin maraqları İsrailin maraqlarıyla üst-üstə düşür".