ABŞ Rusiyanın nüvə potensialını çökdürür Yaşar Cəfərli: "Amerikanın planı barədə yayılan xəbər elə Rusiyanın özünün fırıldağıdır" Amerikalılar qlobal konflikt baş verən zaman zaman Rusiyanın nüvə potensialını qabaqlayıcı zərbəylə elə bazalardaca məhv etməyi planlaşdırır. Yerdə qalan raketlərin ABŞ ərazisinə buraxılması halındasa amerikalılar onları kosmosda yerləşdirilmiş "lazer qrupu" tərəfindən vurulmasını nəzərdə tutub. Qısası, Vaşinqton "cavabsız nüvə zərbəsi" konsepsiyasının uğuruna inanır. Rusiyanın strateji təyinatlı raket qoşunlarının komandanı Nikolay Solovtsov hesab edir ki, ABŞ-ın "cavabsız nüvə zərbəsi" real deyil. Onun sözlərinə görə, rus ordusu istənilən vaxt cavab zərbəsi həyata keçirməyə qadirdir. Bununla bərabər, general bəyanlayıb ki, tezliklə Rusiyanın yeni xarakteriskalı qitələrarası ballistik raketi hazır olacaq. Ramiz Mikayıloğlu Bu raket düşmənin lazerini neytrallaşdırmağa qadir olacaq: "Onu da deyim ki, əgər düşmən raket buraxarsa, Rusiyadakı nüvə raketlərinin 96 faizi daimi döyüş hazırlığındadır və onların buraxılması üçün cavab atəşindən sonra cəmi üç dəqiqə lazımdır. Düşmənin raketlərinin hədəfə çatması üçünsə ən azı yarım saat lazımdır". Məsələylə bağlı fikirlərini öyrəndiyimiz hərbi ekspert Yaşar Cəfərli deyir ki, həyatda hər hansı zəhər hazırlayanda belə dərhal həmin zəhərin qarşısını alan, onu məhv edən nə isə icad olunur. Hərbi sahədə də yeni bir zirehli texnika hazırlanıbsa, dərhal onunla onunla parlalel həmin zirehi deşən raketlər icad edilib. Hərbi ekspert bildirdi ki, nüvə silahları yaranan zaman da dərhal həmin raketlərin yerində vurulması, havada partladılması, zərbənin nəzərdə tutulan şəhərə, obyektə çatmasının qarşını almaq üçün müəyyən tədbirlər üzərində düşünülməyə başlanıb. Bunun üçün yeni raket kompleksləri də icad olunub. Hələ "soyuq müharibə" dövründə amerikalılar raketdən müdafiə elementləri üzərində iş aparıblar. Nəzərdə tutulub ki, SSRİ hücum edərsə, onun hücumlarını bu sistem vasitəsiylə neytrallaşdırmağa çalışarlar: "Amma qlobal böhran yaranarsa, amerikalıların rusların bütün nüvə arsenalını yerindəcə məhv etmək planları real görünmür. Çünki Rusiyada kifayət qədər böyük raket arsenalı var. Həmin arsenalın ləğv olunması üçün bütövlükdə o qədər də raket lazımdır. Digər tərəfdən, belə bir hadisə baş verərsə, ümumiyyətlə, Yer kürəsi oxundan tərpənə, bütün canlılar məhv ola bilər. Ona görə amerikalıların planı inandırıcı görsənmir. Digər tərəfdən, axı Rusiyada da hərb elmi kifayət qədər inkişaf edib. Əgər elə bir sistem qurmaq lazımdırsa, ruslar da belə sistem qura bilərlər". Yaşar Cəfərli bir daha dedi ki, raketlərin havada vurulması, qarşısının alınması üçün sistemlər mövcuddur: "Ancaq Rusiyadakı bütün raket arsenalına zərbə faktiki hücum deməkdir. ABŞ qlobal böhran baş verdiyini hesab etsə və hücuma keçsə, Rusiyanın da cavab vermək üçün vaxtı olacaq. Bunun da nə ilə yekunlaşacağını təsəvvür etmək çətin deyil. Ona görə də söylənənlərə inanmağım gəlmir". Hərbi ekspert onu da vurğuladı ki, hər hansı mənbədə amerikalıların özlərinin belə açıqlamalrına da rast gəlməyib. Ona görə də bu informasiyanın mənbəyinin ruslar olduğunu ehtimal etmək daha realdır: "Hətta ötən gün mətbuatda məlumat getdi ki, Rusiya prezidenti Dmitri Medvedyev hərbi çağırışın əsasları haqqında qanunlara müəyyən dəyişikliklər təklif edib. Bundan sonra tək daimi yaşayış yerində yox, həm də vətəndaşlar bir yerə gedib, üç aydan çox qalacaqlarsa, onların hərbi komisarlıq tərəfindən qeydiyyatının aparılması məcburi sayılacaq. Bu, faktiki çağırış resurslarının daha çox hərbi komissarlıqlara təhkim olunması, qeydiyyatın müasir formalarına keçid ona bənzəyir ki, Rusiya özü nə isə müəyyən bəhanələr tapıb, öz hərəkətlərini doğrultmaq istəyir. Mümkün variantdır ki, fərman verildikdən sonra amerikalıların planı barədə məlumatların yayılması Moskvanın hərbi gücünü artırmaq niyyətinin əlamətləri sayıla bilər. Yəni mümkündür ki, Amerikanın planı barədə yayılan xəbər elə Rusiyanın özünün fırıldağıdır".