ELMAR MƏMMƏDYAROV: «MƏN ÜMİD EDİRƏM Kİ, ERMƏNİSTAN BU YANAŞMANIN ÜSTÜNLÜKLƏRİNİ BAŞA DÜŞƏCƏK» «Biz çox rəmzi bir yerdə, təşkilatın fundamental sənədi olan Helsinki Yekun Aktının yarandığı yerdə görüşürük. Bu sənəd Avropa qitəsini parçalayan sərhədlərin aradan qaldırılması prosesinin başlanğıcı və bizim ölkələrdə demokratik quruculuq nailiyyətlərinin möhkəmləndirilməsində dönüş nöqtəsi olub». AzərTAc xəbər verir ki, bu sözləri Azərbaycanın xarici işlər naziri Elmar Məmmədyarov ATƏT-in üzvü olan ölkələrin Xarici İşlər Nazirləri Şurasının Helsinkidə keçirilən iclasındakı çıxışında deyib. Nazir daha sonra vurğulayıb: «Biz hamımız Helsinki Yekun Aktında ehtiva olunmuş prinsiplərin qorunmasına dair öhdəliklərimizə ciddi riayət etməyimizi təsdiqləməli və ATƏT-in Avropa Təhlükəsizlik sisteminə verdiyi dəyəri müəyyən etməliyik. Biz hamımız dərk etməyə başlayırıq ki, Avropa məkanındakı son hadisələrin kontekstində dövlətlərin ərazi bütövlüyü və suverenliyi ilk növbədə təhlükəsizlik baxımından ən vacib rol oynayır. Azərbaycan inanır ki, ATƏT-in Avropa təhlükəsizlik sistemində nadir yeri var. Qabaqlama, münaqişələrin qarşısının alınması və tənzimlənməsi, böhranların nizamlanması və böhrandan sonrakı reabilitasiya ATƏT-in vacib vəzifələri olaraq qalmalıdır». Azərbaycan xarici siyasət idarəsinin başçısı diqqətə çatdırıb ki, ATƏT-in indiyədək topladığı, danışıqlara konsensus yanaşmalar üzrə geniş təcrübəsinə əsaslanaraq silahlara nəzarət rejimlərində mövcud problemləri aradan qaldırmaq lazımdır: «ATƏT özünün müxtəlif strukturları və yerlərdəki missiyaları vasitəsilə iştirakçı dövlətlərdə demokratik cəmiyyətin və ümumi inkişafın dəstəklənməsi sahəsində zəngin təcrübə əldə edib. Ancaq hələ də bir sıra sahədə ATƏT-in potensialını gerçəkləşdirməyə ehtiyac var. Bununla belə, yaranan yeni tendensiya - ATƏT-in fəaliyyət dairəsini yalnız insan hüquqları məsələləri ilə və yalnız Avratlantik məkanının Şərq hissəsindəki məsələlərlə məhdudlaşdırmaq bizi narahat edir. Azərbaycan daim ATƏT-in fəaliyyətinin hər üç ölçüsünə tarazlı yanaşıb. Biz ATƏT-in icra strukturlarının diqqəti müvafiq iştirakçı dövlətlər tərəfindən müəyyənləşdirilmiş prioritetlərə yönəltməsinin, təşkilatın mandatından kənar vəziyyətlərdən, yaxud digər beynəlxalq təşkilatların atdığı addımları təkrarlayan fəaliyyətdən çəkinməyin vacibliyini vurğulayırıq». Ermənistan-Azərbaycan münaqişəsinin regionda qeyri-sabitliyin əsas mənbəyi olaraq qaldığını söyləyən E.Məmmədyarov bildirib ki, kövrək atəşkəs uzunmüddətli və davamlı sülh üçün əvəz ola bilməz. Azərbaycan, Ermənistan və Rusiya prezidentlərinin noyabrın 2-də keçirdikləri görüşdə imzalanmış Moskva bəyannaməsini Ermənistan-Azərbaycan münaqişəsinin həlli üçün yaxşı əsas yaradan vacib sənəd olduğunu vurğulayan nazir deyib: «Prezidentlər beynəlxalq hüququn prinsip və normaları, onların bazasında qəbul edilmiş qərarlar və sənədlərin əsasında münaqişənin siyasi həlli yollarını axtarmağa davam edəcəklərini bəyan ediblər. Bunlar Birləşmiş Millətlər Təşkilatı və ATƏT-in sənədləri və hər şeydən öncə BMT-nin nizamnaməsi, Helsinki Yekun Aktı, BMT Təhlükəsizlik Şurasının dörd qətnaməsi və BMT və ATƏT tərəfindən qəbul edilən qətnamə və qərarları nəzərdə tutur. Bütün bu sənədlər təsdiq edir ki, Azərbaycanın ərazi bütövlüyü münaqişənin tənzimləməsi üçün əsasdır. Moskva bəyannaməsi münaqişənin tənzimlənməsi prosesinə beynəlxalq təminatlarla mərhələli yanaşmanı təsdiq edib. Bunu bütün tərəflər və vasitəçilər real, mümkün variant kimi qiymətləndiriblər. Münaqişənin həlli bütün regionda iqtisadi inkişaf və əməkdaşlıq üçün əlverişli şərait yarada bilər. Bundan başqa, bəyannamə etimad quruculuğu tədbirlərinin həyata keçirilməsi üçün lazımi şəraitin yaradılmasının vacibliyini xüsusi qeyd edir». Azərbaycan etnik təmizləmələrin nəticələrinin aradan qaldırılmasının, Azərbaycanın Dağlıq Qarabağ regionunda erməni və azərbaycanlı icmaların sabit və təhlükəsiz yaşayışının təmin edilməsinin, icmalar arasında əməkdaşlığın bərpa edilməsinin və bunun əsasında regionun Azərbaycanın daxilində statusunun müəyyənləşdirilməsi prosesində insanların demokratik qaydada bərabər və birbaşa iştirakının faydalı olacağına inandığını deyən E.Məmmədyarov çıxışını bu sözlərlə bitirib: «Mən ümid edirəm ki, Ermənistan bu yanaşmanın üstünlüklərini başa düşəcək. Çünki bu, həm də onun öz maraqlarına uyğundur».