Türkiyə cəmiyyəti Qars bələdiyyəsini ağıllandırmalıdır "Türklər AKP hökumətinin antitürk siyasəti həyata keçirməsinə imkan verməməlidir" Bir neçə gün öncə Türkiyənin Qars şəhərində keçirilən film festivalı çərçivəsində Ermənistandan gələn nümayəndə heyətinə xüsusi isti münasibət göstərilməsi Azərbaycan ictimaiyyətində narazılıq yaradıb. Bütöv Azərbaycan Xalq Cəbhəsi Partiyası (BAXCP) İdarə Heyətinin toplantısında da ölkədaxili ictimai-siyasi vəziyyətlə yanaşı, ermənilərin Qarsa tez-tez səfərlər etməsi də müzakirə olunub. BAXCP İdarə Heyətinin üzvləri qardaş ölkədə belə olayların baş verməsindən narahat olduqlarını bildiriblər. Qarsda mütəmadi olaraq Ermənistanın rəsmi dairələrinin və qeyri-hökumət təşkilatlarının, iş adamlarının iştirakı ilə müxtəlif tədbirlərin keçirildiyini, erməni fotoqraflarının və rəssamlarının əsərlərindən ibarət sərgilərin təşkil edildiyini, musiqi və folklor festivallarının düzənləndiyini vuruğulayan BAXCP İdarə Heyətinin üzvləri baş verənlərin Azərbaycan-Türkiyə təməl prinsiplərinə uyğun gəlmədiyini bildiriblər. Tural Məsələ ilə bağlı fikirlərini öyrəndiyimiz Qarabağ Azadlıq Təşkilatının (QAT) sədri Akif Nağı Türkiyədə keçirilmiş bu tədbirdən məyus olduğunu söylədi. O, Qarsın bələdiyyə başqanının ermənilərlə dostluq münasibətləri yaratması üçün canfəşanlıq etməsindən də narahatlığını bildirdi. Türkiyənin mərkəzi hakimiyyəti əvvəllər ayrı-ayrı şəxslərin bu tip siyasətinə müqavimət göstərirdi. Amma görünür Türkiyə rəhbərləri də Qars bələdiyyəsinin səviyyəsinə düşüb və bu cür siyasəti qəbul edir. Akif Nağı deyir ki, Qarsda erməni-türk dostluq abidəsinin ucaldılması da məsələnin ciddi olmasından xəbər verir. Qars bələdiyyəsi qınaq və təzyiqlərə baxmayaraq bu istiqamətdə addımlar atmaqda israrlı görünür. Türkiyədə cəmiyyət, ayrı-ayrı siyasi qurumlar bunun əleyhinədir. Hətta Türkiyənin Milliyətçi Hərəkatçı Partiyası Qars bələdiyyəsinin bu hərəkətlərinə qarşı öz etirazını bildirib. Cəmiyyətdə bu addımlara mənfi rəyin olmasına və Azərbaycan ictimaiyyətinin də narazılığına baxmayaraq belə adamlar öz hərəkətlərində korrektə etmirlər. Deməli, burada maraq var. Maraq isə iki istiqamətdə ola bilər- ya Qars bələdiyyə rəhbəri erməni soyludur, ya da maliyyə məsələsinin də bu işdə rol oynaması istisna deyil. Həyata keçirilən tədbirlərin hamısı beynəlxalq fondlar tərəfindən maliyyələşdirilir: "Güman edirəm ki, ermənilərin əli olan beynəlxalq fondların da bu cür tədbirlərə pul ayırması realdır. Həmin maliyyəni əldə etmək üçün Qars bələdiyyəsi belə bir addım ata bilər. Hesab edirəm ki, bu, təkcə Azərbaycanın deyil, elə Türkiyənin də milli maraqlarına ağır zərbə vuran və heç nə ilə izah olunmayan bir hərəkətdir. Türklər boş-boş bəyanatlar verməməli, əməli tədbirlərə keçməlidir". Onun sözlərinə görə, bu tip tədbirlərin məntiqi nəticəsidir ki, artıq Azərbaycan cəmiyyətinin böyük əksəriyyətində AKP hökumətinin Qarabağ məsələsilə bağlı mövqeyindəki səmimiliyinə şübhə ilə yanaşılır. Beynəlxalq münasibətlərdə səmimilik kateqoriyası yoxdur. Amma Türkiyə ilə bizim aramızda daim qardaşlıq münasibətləri olub. Hə biz türklərə diplomatiya prizmasından baxmamışıq, nə də onlar. Görünür, AKP hökuməti artıq Azərbaycanla Ermənistan arasında fərq qoymur: "Hesab edirəm ki, hazırda gedən proseslərdə Türkiyə AKP hökumətinin apardığı antiazərbaycan siyasətinin əlamətləri görünür. Amma qardaş ölkənin AKP hökumətinin mövqeyi türk xalqının mövqeyinin göstəricisi deyil. Nə qədər gec deyil, Türkiyə cəmiyyəti bu kimi məsələlərlə bağlı öz fəallığını artırmalı və AKP hakimiyyətinin bu cür antitürk siyasəti həyata keçirməyə imkan verməməlidir".