Milli fəal Həmid Valayi beynəlxalq təşkilatlara müraciət ünvanlayıb Soydaşımız pozulmuş hüquqlarının bərpasını tələb edir Azərbaycanlı Tələbə və Müəllimlər Birliyinin üzvü, Güney Azərbaycan Milli Hərəkatının fəalı, hüquq müdafiəçisi Həmid Valayi Güney Azərbaycanın şərq əyaləti Vəkillər Birliyinin insan hüquqları üzrə komissiyası, İran adlanan yerin məhkəmə sisteminin rəhbəri, ayətullah Mahmud Şahrudi, prezident Mahmud Əhmədinejad, Beynəlxalq Vəkillər Təşkilatı, Vəkillərin Beynəlxalq Evinin Hüquqi İnstitutu, BMT-nin İşgəncələr Əleyhinə Komitəsi, İşgəncəyə qarşı Beynəlxalq İnstitut, ”Amnesty İnternational” (Beynəlxalq Əfv Təşkilatı), İnsan Hüquqlarını, "Cəbhə xəttini (Sərhəd boyunu)" Müdafiə Edən Təşkilat, BMT-nin İnsan Hüquqları üzrə Ali Komissarlığı, İnsan hüquqlarına Nəzarət Təşkilatı, İnsan Hüquqları üzrə Avropa Məhkəməsi və Beynəlxalq Qələm Təşkilatına məktub ünvanlayıb. o, məktubunda ifadə vermək üçün bu il iyulun 13-də “Ettelaat”ın Təbriz şəhərindəki idarəsinin 37-ci otağına çağırıldığını bildirib: ”Heç bir ittiham irəli sürülmədən, yazılı sənəd və ya saxlama əmri göstərilmədən qeyri-qanuni şəkildə həbs olundum. “Ettelaat”ın Təbriz şəhərindəki təcridxanasında təkadamlıq kamerada qanunsuz olaraq saxlanıldığım 13 gün ərzində dəfələrlə ağır psixi və fiziki təzyiqlər altında dindirildim. Müstəntiq etiraf almaq üçün məni döyür, müxtəlif işgəncələr verirdi. Onun zərbələri nəticəsində bir neçə dişim sındı, damağım şişdi, qanaxmalar başladı. Sağ ayağımdan da ağır xəsarət aldım”. Milli fəal işgəncələr zamanı bir neçə dəfə huşunu itirdiyini də vurğulayıb: “Kəskin başgicəllənmələr və baş ağrıları indi də davam edir. İşgəncə dolu dindirmələrdən sonra ciddi müalicəyə ehiyacım olsa da, həbsxanada mənim həkimə müraciətimə imkan vermirdilər”. Həmid Valayi məktubunda qeyd edib ki, Güney Azərbaycanın şərq əyaləti Vəkillər Birliyinin imtahanından uğurla keçib: ”Ancaq mənə hələ də vəkillik lisenziyası verilməyib. Çünki 2008-ci ilin mayında ”Ettelaat”ın Təbriz idarəsi qeyri-qanuni şəkildə Güney Azərbaycanın şərq əyaləti Vəkillər Birliyinə müraciət ünvanlayıb. Bu qurumun İdarə Heyəti də mənə lisenziya verməkdən imtina edib. Ancaq Güney Azərbaycanın şərq əyaləti Vəkillər Birliyinin ”Ettelaat”ın qərarını icra etməsi təşkilatın nizamnaməsinə ziddir”. Milli fəal hüquqi və mədəni yollarla Güney Azərbaycan türklərinə qarşı olan ədalətsizlik və ayrı–seçkiliyi aradan qaldırmaq üçün çalışdığına görə fəxr etdiyini vurğulayıb: ”Azərbaycan türklərinin tapdalanmış haqlarının bərpası yönündə fəaliyyət fars şovinist rejimi əleyhinə təbliğat aparmaq ittihamıyla müqayisə oluna bilməz. Ayrı-seçkiliyin ifşası uğrunda mübarizə xəyanət sayılmır. Əksinə ədalət prinsiplərinə bağlılıq, şərəf və tapdanmış hüquqlarını müdafiə etmək hər bir insanın görəvi sayılır. Əslində bunlar başa düşməlidirlər ki, mənə vəkillik lisenziyası verməməklə fəaliyyətimi məhdudlaşdıra bilməyəcəklər. Çünki hər zaman ədalətili olacağıma and içmişəm. Bu səbəbdən qanuni haqlarımın bərpası üçün aidiyyatı orqanlara öz etirazımı bildirmişəm. İxtisasımı diqqətə alaraq komissiyadan qanuni və insani haqlarımı müdafiə etməsini istəyirəm. Sizdən istintaqımı, ”Ettelaat”ın Təbriz idarəsi barədə qaldırdığım işi izləmək və Güney Azərbaycanın şərq əyaləti Vəkillər Birliyindən mənə lisenziya verilməsini təmin etməkdir”.