Enes Cansevər [email protected]/* */ Fikri, vicdanı və ürfanı hürr nəsillər. Gələcəyə ümidlər Son dövrlərdə bir çox yazılarımda Azərbaycanda günbəgün müşahidə edilən inkişafdan bəhs edirəm. Bu yazımda isə inkişafın bəzi məqamlarından bəhs etmək istəyirəm. Noyabrın 13-17-də DA Platformasının Antalyada 8-ci böyük toplantısı keçiriləcək. DA dərgisinin və eyniadlı platformanın Azərbaycan təmsilçiliyinin bəzi vəzifələrini yerinə yetirmək məqsədilə müxtəlif yazarlar, fikir adamları, millət vəkilləri, dövlətin müxtəlif məqamlarında çalışan adamlarla görüşüb, onları bu məclisə dəvət etməyi planlaşdırırıq. Deyim ki, söhbət elədiyim adamların əksəriyyətinin həmin tarixlər ərəfəsində istər Azərbaycanda, istərsə də müxtəlif xarici ölkələrdə ən azı 2-3 görüşü var. Doğrusu, Azərbaycan rəsmilərinin, ziyalılarının bu qədər səmərəli çalışdıqları məni çox sevindirdi. Çünki istər ölkədə, istərsə də xaricdə keçirilən tədbirlər Azərbaycanın inkişafı baxımından çox önəmlidir. Əslində bu cür tədbirlər Azərbaycanın beynəlxalq aləmdə gücünün artdığını göstərən bir hadisədir. Sevinməyimin başqa bir səbəbi də Türkiyə ilə Azərbaycan arasında hər sahədə proqramların olmasıdır. Prezident İlham Əliyev bu məqama seçilən kimi ilk təbriki Türkiyə Prezidenti Abdullah Güldən aldı. İlk səfərini də elə Türkiyəyə etdi. Sabah Moskvada Rusiya Prezidentinin iştirakı ilə Ermənistan və Azərbaycan prezidentləri görüşəcəklər. Qarabağ probleminin həlli istiqamətində böyük ümidlər vəd edən bu görüşün ardınca İlham Əliyev ayın 3-də Türkiyəyə səfər edəcək. 14-15 noyabr tarixlərində Azərbaycanda enerji zirvəsi keçiriləcək və Prezident Aparatının İctimai-siyasi şöbəsinin müdiri Əli Həsənovun söylədiyinə görə, tədbirdə 20-dən çox ölkənin dövlət və hökumət rəhbərləri iştirak edəcək. Türkiyəni də bu tədbirdə ya Gül, ya da Ərdoğan təmsil edəcək. Son dövrlərdə dünyada öz gücünü göstərən iqtisadi böhran və enerji daşıyıcılarının qiymətinin sürətlə düşməsi baxımından bu zirvə toplantısı çox önəmli olacaq. Yazımın başında qeyd etdiyim kimi, noyabr ayındakı gəliş-gedişlər, Cenevrədən Nyu-Yorka, İstanbuldan Moskvaya, Orta Asiyadan Baltiklərə qədər geniş bir coğrafiyanı əhatə edir. Bu da Azərbaycanın nüfuzunun nə qədər artdığını, dünya ölkələri arasında sayılıb-seçildiyini göstərən faktordur. Elə bilirəm ki, hansı tədbir olursa-olsun, hər bir azərbaycanlı getdiyi yerdə artıq qanqrena olmuş Qarabağ problemini gündəmə gətirir və ölkəsinin uğradığı bu haqsızlığı dünyaya çatdırır. Bu da diaspor fəaliyyətinin güclənməsi deməkdir Türkiyədən Azərbaycana gerçəkləşən bu ziyarətlərdən birinin üzərində dayanmaq istəyirəm. Çünki bu ziyarət gələcəyimiz olan tələbələrlə bağlıdır. 29 oktyabr cümhuriyyət günü münasibətilə Slavyan Universitetində yenicə vəzifəsinə başlamış təhsil müşaviri Halis bəyin və burada təhsil alan türkiyəli tələbələrin nümayəndəsi Abdullah Çiçəyin təşkil etdikləri çox gözəl bir proqramın iştirakçısı olduq. Azərbaycanlı və türkiyəli gənclərin heç bir ayrı-seçkilik qoyulmadan burada nümayiş etdirdikləri fikir, düşüncə, geyim-kecim ortaqlığı qardaşlığımızın ən gözəl nümunəsi idi. Gənclərin qəlbi iki ölkənin gələcəyi üçün döyünürdü. Şəxsən mən gənclərin bu tədbirindən çox zövq aldım. Hər zaman da bu cür tədbirlərə və orada səslənən fikirlərə önəm verirəm. Doğrusu, orada gördüklərimdən ümidli oldum və gələcəyimizə də böyük ümidlə baxdım. Yeri gəlmişkən onu da deyim ki, noyabrın 12-14-ü arasında Türkiyənin Yüksək Öyrətim Kurulu (YÖK) başkanı Yusif Ziya Özcan Bakıda olacaq. Bu səfər zamanı Türkiyədə oxuyan azərbaycanlı tələbələrin və eləcə də burada təhsil alan türkiyəli gənclərin problemləri gündəmə gələcək. Bu səfər zamanı Azərbaycan-Türkiyə qardaşlığının ən gözəl nümunəsi olan özəl türk liseyləri, Qafqaz Universiteti və eləcə də burada təhsil alan 4500 türkiyəli tələbənin problemləri də müzakirə ediləcək. Hazırkı YÖK sədri Yusif Ziya Özcan, həqiqətən də, birbaşa öz işi, öz qayğıları ilə maraqlanır. Əgər xatırlayırsınızsa, əvvəlki YÖK sədri Ərdoğan Teziç bu mövqeyi siyasət meydanına çevirmişdi. Hətta professor cübbəsi geyən bir çox rektorlar bəzi siyasi partiyaların toplantılarına qatılır, elmdən daha çox, siyasətlə məşğul olurdular. Teziç və onun rektorları tələbələrin başının içindən daha çox, çölü ilə, onların geyim-kecimi ilə maraqlanırdılar. Elə Türkiyədə də keçirilən 29 oktyabr təntənələrindən bəzi siyasilər və hərbçilər acıq edərək getdilər və ya qatılmadılar. Siyasətlə məşğul olan və tələbələri də elmdən yayındırıb, bu sahəyə çəkmək istəyən rektorlar onların önünü kəsmək istədiyi kimi, xalqın rifahını düşünmək əvəzinə, onların geyim-kecimi ilə maraqlanan bu cür adamlar da insanlarımızın inkişafına əngəl olurlar. Onlar bu hərəkətlərini də atatürkçülük adı ilə bağlayırlar. Halbuki Atatürk bundan 85 il öncə azad fikirli, azad vicdanlı və elmli-ürfanlı nəsillər yetişdirməyi tövsiyə eləmişdi. 8 ildən çoxdur ki, Bakıda işləyirəm. Doğrusu, bu zamana qədər Türkiyədən YÖK sədrinin buraya gəldiyini xatırlamıram. Ona görə də hazırkı YÖK sədri Yusif Ziya Özcanın bu ziyarətinə böyük əhəmiyyət verirəm və ümid edirəm ki, bu səfərdə gənclərimizlə bağlı səmərəli təkliflər, layihələr gündəmə gələcək. Dəyərli oxucularım, onu da etiraf edim ki, yazını başlayanda onu necə tamamlayacağımı irəlicədən təxmin edə bilmirəm. Çünki gündəmimiz o qədər zəngin və doludur ki, hansı məsələyə toxunub-toxunmamaqda çətinlik çəkdim.zaman