Ermənistan ordusu iflas astanasında Bu gün Ermənistan ordusu acınacaqlı vəziyyətdədir. Düşmən ölkənin müdafiə sistemində mövcud vəziyyət son dövrlər daha acınacaqlı şəkil alıb. Şəxsi heyət arasında mənəvi-psixoloyi vəziyyət və nizam-intizam xeyli zəifləyib. Təkcə onu demək kifayətdir ki, Ermənistan Silahlı Qüvvələrində baş verən fərarilik, ölüm, döyülmə, rüşvətalma, intihar və digər hərbi cinayətlərin sayı 2007-ci illə müqayisədə 2008-ci ildə 21 faiz artıb. İbrahim İbadoğlu Ötən il düşmən düşərgəsində 1643 hadisə baş verib. Bunlardan 41-i fərarilik, 171-i hərbi hissəni özbaşına tərketmə, 34-ü intihara cəhd, 570-i rüşvətalma, 376-sı döyülmə və işgəncə, 27-si zorlama, 53-ü ölüm faktı olub. Bu il isə müvafiq rəqəm 1984-ə çatıb. Cinayət hadisələrinin 13 faizi 1-ci Ordu Korpusunda (OK) (əsasən əlahiddə motoatıcı alaylarda), 245-i 3-cü OK-da, (əsasən əlahiddə motoatıcı alaylarda, əlahiddə artilleriya divizionlarında və əlahiddə tank taborunda), 16 faizi 4-cü OK-da (xüsusilə müxtəlif əlahiddə motoatıcı alaylarda), 47 faizi isə 2-ci və 5-ci OK-da və mərkəzi komandanlığın tabeçiliyində olan artilleriya briqadasında, tank əleyhinə artilleriya alayında, zenit-raket alayında, zenit-raket briqadasında, əlahiddə rabitə alayında, əlahiddə tank alayında və digər hərbi hissələrdə törədilib. Təkcə 2008-ci ilin bu gününədək Ermənistan silahlı qüvvələrində 64 hərbi qulluqçu həlak olub. Bunlardan 45 nəfəri qeyri-döyüş vəziyyətində dünyasını dəyişib. Düşmən ölkənin silahlı qüvvələrində rüşvətxorluq və korrursiya halları da geniş yayılıb. Xüsusilə bir sıra əlahiddə motoatıcı alaylarda aparılan yoxlamalar zamanı məlum olub ki, tabor və bölük komandirləri hərbi hissə komandirinin göstərişi ilə təmir-tikinti adı altında müddətli həqiqi hərbi xidmətdə olan hərbi qulluqçuların aylıq məvacibinin 50-80 faizini mənimsəyiblər. Bəzi əlahiddə motoatıcı hissələrdə isə əsgərlərin aylıq məvacibləri hətta tamamilə mənimsənilib. Yoxlamalar zamanı əsgərlərin qida rasionunda da xeyli problemlər aşkarlanıb. Ərzaq məhsulları arasında vaxtı keçmiş keyfiyyətsiz İran, Çin, Malayziya və Sinqapurdan gətirilmiş yeyinti məhsulları xüsusilə üstünlük təşkil edib. Şəxsi heyətə kərə yağı əvəzinə marqarin, mal və donuz əti əvəzinə isə Hindistan və Avstraliyadan gətirilmiş camış, zebra, kenquru və mənşəyi bilinməyən başqa heyvan ətləri, vaxtı ötmüş balıq və mal əti konservləri, satılmayan toyuq budları verilib. Elə bunun nəticəsində də son iki il ərzində şəxsi heyət arasında mədə-bağırsaq, dəri-zöhrəvi və dizenteriya xəstəliklərinin sayı iki dəfə artıb. Ermənistan ordusunda yeyinti və korrursiya hallarının geniş vüsət alması əsasən aylıq məvacibin aşağı olması və vaxtlı-vaxtında verilməməsi ilə əlaqədardır. Bir sıra əlahiddə motoatıcı alaylarda, artilleriya briqadasında, əlahiddə özüyeriyən artilleriya divizionlarında, əlahiddə rabitə alayında və s. xidmət rəisləri və hissə komandirləri tərəfindən ərzaq, əşya, yanacaq-sürtkü materiallarının, avtomobil və döyüş texnikaları ehtiyat hissələrinin satılması faktı adi hala çevrilmişdir. Bu yazıda qeyd olunan cinayət faktları üzrə təkcə 2008-ci il ərzində hərbi prokurorluq tərəfindən 83 nəfər vəzifəli şəxs haqqında cinayət işi açılıb. Şəxsi heyət arasında homoseksualizm faktları ötən illərə nisbətən bu il daha da artıb. "Mavi" hərbi qulluqçuların 80 nəfəri Ermənistan ordusunda, təqribən 150 nəfəri isə Qarabağ ordusunda xidmət edir. Vəziyyət o qədər acınacaqlı hal alıb ki, ordu rəhbərliyinin göstərişi ilə xüsusi hərbi həkim komissiyası yaradılıb. Digər ciddi bir fakt isə ondan ibarətdir ki, bu orduda ayrıseçkilik və dedovşina hallarının mövcudluğunu ölkə ictimaiyyəti narazılıqla qarşılayıb. Belə ki, Qarabağ ordusunda xidmət edən ermənistanlıların qarabağlı komandir heyəti tərəfindən daim təhqir olunması, əmri yerinə yetirməyən əsgərlərin isə fiziki təzyiqlərə məruz qalması adi hal alıb. Bunun nəticəsində Qarabağda yerləşən dağ-atıcı və motoatıcı diviziyaların tərkibindəki hərbi hissələrdə ermənistanlılarla Qarabağda yaşayan etnik ermənilər arasında 12 bıçaqlanma hadisəsi baş verib. Münaqişə zamanı 4 ermənistanlı hərbi qulluqçu ölmüş, 6 nəfər isə ağır yaralanıb. Son iki il ərzində Qarababda xidmət edən Ermənistan vətəndaşlarına qarşı törədilmiş 843 döyülmə və işgəncə faktı ilə bablı 97 zabit və 124 gizir barəsində cinayət işi qaldırılıb. Onlardan 98 nəfəri həbs edilib. Həbs olunanlardan 36 nəfəri zabit, 62 nəfəri isə gizirdir. Eyni maddələr üzrə ittiham olunmalarına baxmayaraq 123 zabit və gizir rüşvət hesabına bəraət alıb. Hərbi təhsil sahəsində də vəziyyət son dərəcə acınacaqlıdır. Heç kəs ali hərbi məktəblərdə oxumaq istəmir. İş o yerə çatıb ki, ordu rəhbərliyi qəbul ballarının aşağı salınması barədə qərar qəbul edib. Ancaq kursantlar yerlərdəki acınacaqlı vəziyyətlə tanış olan kimi hər vəchlə məktəbdən çıxmağa çalışırlar. Bunun yolunu isə intizam qaydalarını pozmaqda və fərarilikdə tapırlar. Hazırda 30-dan çox kursant barəsində fərarilik və məktəbi özbaşına tərketmə maddəsi üzrə cinayət işi qaldırılıb. Yeri gəlmişkən, İrəvan şəhərində yerləşən Vazgen Sarkisyan adına hərbi institutda oxuyan 100-dək kursant ötən il məktəbdən çıxmaq barədə raportla məktəb rəhbərliyinə müraciət edib. Onların 50 nəfəri dördüncü, yəni əsasən sonuncu kurs kursantlarıdır. Ermənistan Silahlı Qüvvələrində hərbi qulluqçuların sağlamlıq durumu da acınacaqlı vəziyyətdədir. Bunun əsas səbəbi isə şəxsi heyətə aşağı kalorili qida məhsullarının verilməsidir. Həmçinin əsgərlərin anti-sanitariya şəraitində xidmət aparması da sağlamlıq məsələsində ciddi problemlər yaradıb. Təkcə bu ilin yanvar-sentyabr ayları ərzində 1671 nəfər hərbi qulluqçu regional və mərkəzi hospitala yerləşdirilib. Bunlardan 98 nəfəri malyariyadan, 43 nəfəri heratitdən, 240 nəfəri pnevmoniyadan, 79 nəfəri vərəmdən, 34 nəfəri qarın yatalağından, 234 nəfəri müxtəlif infeksion xəstəliklərdən, 421 nəfəri dizenteriyadan və s. əziyyət çəkib. Xəstələrin sayının çox olması üzündən onların bir qismi də hərbi birləşmənin hospitalında yerləşdirib. Qondarma Qarabağ ordusunda cari il ərzində 2150 hadisə baş verib. Bunların 816-sı qəza, 1245-i cinayət xarakterli, 89-u isə qarşı tərəfdən açılan atəş tərəfindən baş vermiş hadisədir. Nəticədə 17 ölüm, 73 orta və ağır yaralanma faktı qeydə alınıb. 2150 cinayət hadisəsindən 924-ü yüngül, 321-i isə ağır cinayət tərkibli olub. Qondarma Qarabağ ordusu təkcə bu il ərzində 59 nəfər hərbi qulluqçusunu itirib. Onlardan 42 nəfəri qeyri-döyüş vəziyyətində dünyasını dəyişib. Ordu rəhbərliyi hərbi hissələrdə intizamsızlıq səbəbindən artan qeyri-döyüş itkilərinin sayını gizlətmək məqsədilə xarici və yerli nümayəndələrə hadisələrin guya qarşı tərəfdən törədildiyini bildirir. 2008-ci ilin yanvar-sentyabr ayları ərzində Kəlbəcər, Martuni, Ağdərə və Xankəndidə yerləşən hərbi hosritallara xeyli hərbi qulluqçu gətirilib. Bunlardan 63 nəfəri (7-si zabit, 9-u gizir və 47-si əsgər) malyariya, 217 nəfəri (13-ü zabit, 19-u gizir, 185-i isə əsgər) pnevmoniya, 94 nəfəri (9-u zabit, 17-i gizir, 68-i isə əsgər) vərəm və s. diaqnozu ilə müxtəlif hosritallara yerləşdirilib ki, bunların da ümumi sayı 1012 nəfər təşkil edib. Xəstəlik və yaralanmalarla bağlı vəziyyəti ağır olan 21 zabit və gizir, o cümlədən 80-ə yaxın əsgər müxtəlif vaxtlarda İrəvan şəhər hospitalında yerləşdirilib. xalqcebhesi