“ERMƏNİSTAN HƏRBİ TƏLİMLƏRLƏ AZƏRBAYCANA TƏZYİQ ETMƏK İSTƏYİR” Arif Yunus: “Rusiya istəyir ki, Qarabağ məsələsi hər iki tərəfə təzyiq vasitəsi kimi həll olunmamış qalsın” Qarabağ danışıqlarında ciddi irəliləyişlərin əldə olunması görüntüsünün yaradıldığı bir məqamda düşmən ölkə işğal etdiyi Azərbaycan ərazilərində hərbi təlimlərə başladı. Təlimlərə prezidentlərin Rusiyada keçirilməsi gözlənilən görüşü ərəfəsində start verilməsi təəccüb doğurur. Qeyd edək ki, Rusiyanın “Regnum” agentliyi təlimlərin gedişində Azərbaycan üzərinə hücum variantlarının sınaqdan keçirildiyi xəbərini yayıb. Agentliyin məlumatına görə, separatçı rejimin rəhbərləri deyiblər ki, təlimlər zamanı təkcə müdafiə yox, həm də preventiv hücum və Azərbaycan ərazilərinin içərilərinə doğru hərbi əməliyyatları genişləndirmək variantlarına üstünlük verilib. Dağlıq Qarabağın “müdafiə naziri” Movses Akopyan da xəbəri təsdiqləyərək təlimlər zamanı sırf hücum əməliyyatları üzərində işlənildiyini etiraf edib. Son məlumatlara görə, bütün növ hərbi texnikanın cəlb olunduğu manevrləri Ermənistan prezidenti Serj Sərkisyan və müdafiə naziri Seyran Ohanyan da izləyib. Rusiyanın vasitəçiliyi ilə Ermənistan və Azərbaycan prezidentlərinin görüşü ərəfəsində ermənilərin bu qədər aqressivləşməsi ortaya suallar çıxarır. Digər tərəfdən, bu təlimlərə məhz Rusiya prezidentinin Ermənistana səfərindən sonra başlanılması da bəzi ehtimallara yol açır. Konfliktoloq Arif Yunus bildirdi ki, ermənilərin genişmiqyaslı hərbi təlimlərə başlaması təzyiq vasitəsidir: “İstənilən münaqişə həll olunmamış qalıbsa, o zaman aydın məsələdir ki, belə təlimlər yalnız və yalnız danışıqlarla bağlıdır. Bu gün Qarabağ münaqişəsi ətrafında aktiv diplomatik və geosiyasi oyunlar gedir. Əvvəl Amerika və Türkiyə fəal idisə, indi artıq Rusiya təşəbbüsü ələ alıb. Hərbi təlimləri də ermənilərin gedən proseslərə reaksiyası saymaq olar. Onlar bu yolla bizi qorxutmağa çalışır. Bununla demək istəyirlər ki, müharibəyə hazırdırlar. Bununla Azərbaycanı qorxutmaq və danışıqlarda ayrı mövqe tutmağa vadar etmək istəyirlər”. A.Yunus hərbi təlimlərin yalnız Azərbaycana qarşı yönəlmədiyini vurğuladı: “Təlimlər danışıqlarda vasitəçilik rolunu oynayanlara cavab kimi qiymətləndirilə bilər. Düşmənin aqressiv təlimlərə başlaması mütləq müharibənin olacağı anlamını vermir. Mən yaxın vaxtlarda müharibənin olacağına inanmıram. Təbii ki, cəbhə zonasında gərginlik olacaq, tez-tez atəşkəsin pozulduğu xəbərini eşidəcəyik”. Ekspert Azərbaycanın da adekvat tədbirlərə əl atmasını zəruri sayır: “Yaxşı olar ki, Azərbaycan da öz növbəsində belə təlimlər keçirsin. Hər halda, rəsmi Bakının məsələyə reaksiyası lazımdır”. Rusiyanın Qarabağı işğaldan azad edərək Azərbaycana qaytaracağı barədə ermənilərin iddialarına gəldikdə, A.Yunus bunu cəfəngiyyat sayır: “İnanmıram ki, Rusiya Qarabağ məsələsinin həllini istəyir. Deyək ki, doğrudan da Rusiya Ermənistana təzyiq edərək Azərbaycan torpaqlarını işğaldan azad edir. Ancaq fakt budur ki, məsələ həll olunandan sonra Rusiyanın bizim regionda taleyi sual altına düşəcək. Aydındır ki, Rusiya məlum hadisələrdən sonra Gürcüstana qayıda bilməz. Azərbaycan - Ermənistan münasibətləri yaxşılaşsa, o zaman Ermənistandakı hərbi bazaların taleyi sual altına düşəcək. Üstəlik, Ermənistan -Türkiyə məsələsi də həll olunacaq. Ruslar açıq şəkildə bəyan edir ki, Ermənistan bazaları Türkiyəyə qarşıdır. Ermənistanın sərhədlərini də ruslar qoruyur. Qarabağ məsələsi həll olunandan sonra Ermənistandakı rus qoşunları kimə lazım olacaq? Qarabağ məsələsi həll olunsa, Rusiya buradan çıxıb gedəcək. Ona görə də ruslar istəyir ki, Qarabağ məsələsi hər iki tərəfə təzyiq vasitəsi kimi qalsın. Lazım olan anda Rusiya bundan həm Ermənistana, həm də Azərbaycana qarşı istifadə edəcək. Ona görə də ruslar ermənilərə bir, Azərbaycana başqa söz deyirlər. Rusiya bununla göstərmək istəyir ki, regiondakı məsələlərin həllində böyük rola malikdir”. Elşad PAŞASOY musavat