“QARABAĞDA QISAMÜDDƏTLİ MÜHARİBƏ BAŞLAYIR” Kremlə yaxın agentlikdən şok xəbər “Regnum” yazır: “Rusiya müharibənin sonunda Qarabağı Azərbaycana qaytaracaq”; başqa məlumatlarsa daha dəhşətlidir İşğalçı erməni qüvvələri Qarabağda keçirilən manevrlər zamanı Azərbaycan üzərinə hücum variantlarını sınaqdan keçirir. “Regnum” agentliyinin məlumatına görə, separatçı rejimin rəhbərləri deyiblər ki, təlimlər zamanı təkcə müdafiə yox, həm də preventiv hücum və Azərbaycan ərazilərinin içərilərinə doğru hərbi əməliyyatları genişləndirmək variantlarına üstünlük verilib. Xəbər verildiyi kimi, erməni qüvvələri Azərbaycanın işğal olunmuş ərazilərində hərbi təlimlərə başlayıb, manevrlər cəbhə xəttinin bilavasitə yaxınlığında aparılıb. Dağlıq Qarabağın “müdafiə naziri” Movses Akopyan deyib ki, bu təlimlər zamanı sırf hücum əməliyyatları üzərində işlənilir. “Biz öz qoşunlarımızı ona hazırlayırıq ki, Azərbaycan hücum etmədən yaranmış situasiyadan çıxış edərək Dağlıq Qarabağa qarşı yaranmış təhlükəni neytrallaşdırmaq üçün hücuma keçsin”, - deyə o bildirib. Akopyan ötən şənbə günü başa çatmış təlimlərin yekunlarının uğurlu olduğunu da deyib. Bildirilir ki, bundan əvvəl təlimlərin gedişini Dağlıq Qarabağ separatçılarının başçısı Bako Saakyan da izləyib. O da bildirib ki, erməni qüvvələri zərurət yaranarsa, hərbi əməliyyatları nəinki düşmən ərazisinə keçirməyə, hətta Azərbaycan ərazilərinin dərinliklərinə doğru irəliləyib yeni mövqelər tutmağa hazırdır. Məlumatlara görə, bütün növ hərbi texnikanın cəlb olunduğu manevrləri Ermənistan prezidenti Serj Sərkisyan və müdafiə naziri Seyran Ohanyan birgə izləyib. Sərkisyanla Ohanyanın Dağlıq Qarabağa “işgüzar səfərə gəldiyi” deyilir, lakin məlum olub ki, onların gəlişinin əsl məqsədi məhz erməni qüvvələrinin Azərbaycanın işğal edilmiş ərazilərində keçirdiyi təlimləri izləməkdir. Məlumatlara görə, Sərkisyan və Ohanyan təlimlərin gedişi haqda manevrlərə başçılıq edən qərargahdan müntəzəm məlumatlar alıblar və döyüş poliqonunda olublar. Bu təlimlər Rusiyanın vasitəçiliyi ilə Ermənistan və Azərbaycan prezidentləri arasında görüş ərəfəsində keçirilir. Şübhə yoxdur ki, Ermənistan Dağlıq Qarabağdakı qüvvələrinə Azərbaycanın yeni ərazilərini işğal etmək variantları üzrə təlimə başlamağı tapşırmaqla danışıqlar ərəfəsində Azərbaycan tərəfinə mesaj vermək istəyib. Özü də açıq şəkildə bildirilir ki, təlimlər müdafiə xarakteri yox, məhz hücum xarakterlidir və Azərbaycan ərazilərinə hücum edib yeni mövqelər ələ keçirməyə hesablanıb. Ermənistan tərəfinin bu təcavüzkar mesajı Azərbaycan rəhbərliyinin işğal edilmiş ərazilərin hərbi yolla azad edilə biləcəyi haqda bəyanatları dayandırdığı bir vaxtda verilir. Xüsusən də Rusiyanın vasitəçi olduğu danışıqlar ərəfəsində. Belə görünür ki, bu təlimlər həm də Moskvadan gələn göstəriş əsasında keçirilir. Rusiya Azərbaycana işarə edir ki, Dağlıq Qarabağdakı erməni qüvvələrinin əliylə işğal edilmiş əraziləri genişləndirə bilər. Bundan əvvəl Rusiyanın Azərbaycanı diz çökdürmək üçün erməni qüvvələri vasitəsilə Azərbaycanın Qərbində bəzi strateji məntəqələri tutmağa yönələn təxribatlara əl ata biləcəyi haqda məlumatlar yayılıb. Rusiyanın Dağlıq Qarabağda müharibəyə başlaya biləcəyi haqda şübhələr Ermənistanın özündə də yaranıb. Lakin mahiyyətcə fərqli şəkildə. “Regnum” agentliyi xəbər verir ki, erməni etnoqraf alim Qranuş Haratyan oktyabrın 25-də İrəvanda keçirdiyi mətbuat konfransında Rusiyanın Qarabağda “süni müharibəyə” başlaya biləcəyini deyib. Onun iddiasına görə, bu müharibə nəticəsində Qarabağ Azərbaycana veriləcək. Haratyan deyib ki, Rusiya Gürcüstandakı müharibə ilə bu ölkənin bir hissəsinə nəzarəti ələ keçirdi və orada hərbi qüvvələrini yerləşdirdi. Bu isə Rusiyanın regionda mövqelərini möhkəmləndirmək üçün güc tətbiqindən istifadəni davam etdirəcəyini göstərir. “Mən istisna etmirəm ki, Rusiya yaxın vaxtlarda Dağlıq Qarabağda və ya onun ətrafında, məsələn, 10 günlük müharibə təşkil edəcək, bu müharibənin nəticəsində Qarabağ tam və ya qismən Azərbaycanın nəzarətinə keçəcək. Yəni Rusiya açıq və ya gizli şəkildə Azərbaycanın tərəfində yer alaraq bu ssenarinin reallaşmasına yardım edəcək”, - deyə o iddia edib. Haratyanın bu iddiası Türkiyə KİV-ində də geniş əks-səda verib. Haratyan hesab edir ki, Rusiya kasıb Ermənistanı enerji ehtiyatları ilə zəngin Azərbaycanla əvəz edə bilər. Onun fikrincə, Rusiya Qarabağın Azərbaycana qaytarılmasına kömək etməklə Türkiyə ilə regional ittifaqa girəcək və geosiyasi məqsədlərini reallaşdıracaq. Bu məqamda qeyd edək ki, qəzetimiz ötən həftə məlumatlı və mötəbər mənbələrə istinadən Rusiyanın Dağlıq Qarabağ problemi ilə bağlı hərəkətə keçdiyini yazmışdı. Manşetdən yayınladığımız həmin xəbərdə iddia olunurdu ki, Kreml çox ciddi güzəştlər və strateji seçimlər qarşılığında işğal altındakı 6 rayonu Azərbaycana qaytarmağa söz verib. Bunun əvəzində Azərbaycan BTC-dən tədricən imtina etməli, Rusiya qoşunlarının “sülhməramlı qüvvələr” statusu ilə boşaldılan bölgələrə və Dağlıq Qarabağa yerləşdirilməsinin hüquqi həllinə dəstək verməli, NATO-ya hədəflənən kursdan tam və qəti olaraq əl götürməli, ABŞ-la əməkdaşlığı arxa plana keçirməlidir. Bu istiqamətdə gələn məlumatların heç də hamısının düzgün olduğunu iddia etmək çətindir. Lakin bir məsələ dəqiqdir: Rusiya regionda təsirlərini və fəaliyyətini artırır, Azərbaycan iqtidarına ciddi şəkildə təzyiqlər göstərir və ən əsası da, Dağlıq Qarabağ və işğal altındakı digər torpaqlarımızla bağlı gedən prosesdə bütün təşəbbüsü ələ almaq üçün qərarlı görünür. Rusiya Azərbaycanın işğal altında olan və İranla sərhəddə yerləşən rayonlarını ermənilərdən azad edib, orada özü oturmaq niyyətindədir! Və bunu da bizim iqtidarın əli ilə həyata keçirtməyə ümid edir. Çünki bilir ki, belə bir prosesi o etməsə, ABŞ edəcək və İranla sərhəd rayonlara sülhməramlı NATO qoşunları yerləşdiriləcək. Yaxın gələcəyin mütləq müharibə meydanına - İran və onun ətraf bölgələrinə kim tez yetişsə və daha çox əraziyə nəzarət edə bilsə, savaşı da o qazanacaq. Gürcüstanda gedən müharibə də əslində həmin hədəflər uğrundaydı. Bir sözlə, Qafqazda başlayan ABŞ-Rusiya müharibəsi davam edir və belə getsə, yaxın vaxtlarda bizi də içərisinə alacaq. Siyasət şöbəsi musavat