Avropa Birliyi mövqeyini niyə dəyişir "Araz Əzimovun Brüsseldə Azərbaycanın Avropa Birliyinə üzv olmaq istəmədiyini bəyanlaması problem yaradıb" Xarici İşlər Nazirliyi və Mərkəzi Seçki Komissiyası (MSK) Azərbaycanda keçirilmiş prezident seçkiləri ilə bağlı Fransanın Bakıdakı səfirliyinin Avropa Birliyinin prezidentliyi adından yaydığı bəyanata bəyanatlarla cavab verib. MSK rəhbərliyi Avropa Birliyi prezidentliyinin bu mövqeyindən təəssüfləndiyini bildirib: "Avropa Şurası Parlament Assambleyasının müşahidə missiyasının rəhbəri Andres Herkel keçən seçkilərlə müqayisədə bu il keçirilən prezident seçkilərində seçkilərin idarə edilməsində gözə çarpacaq dərəcədə irəliləyişlər olduğunu bildirib. Avropa Şurası Nazirlər Komitəsinin sədri Karl Bildt də deyib ki, seçkilərin keçirilməsi zamanı qeydə alınmış müsbət irəliləyişləri alqışlayırıq". MSK təəccüblənir ki, Avropa Birliyinin prezidentliyi adından yayılmış bəyanatda adları çəkilən və digər beynəlxalq qurumların seçkilərlə bütövlükdə və eyni zamanda seçkilərin ayrı-ayrı aspektləri ilə bağlı hesabatlarında rast gəlinməyən "seçkilər beynəlxalq standartlara cavab vermir" ifadəsi işlənib. Tural "Xatırlatmaq istəyirik ki, Avropa Birliyinin xarici siyasət və təhlükəsizlik üzrə ali nümayəndəsi Havyer Solana prezident seçkiləri ilə bağlı bəyanatında seçkilərin sakit şəraitdə, heç bir qanun pozuntusuna yol verilmədən və yaxşı təşkil olunmuş şəkildə keçdiyini qeyd edərək deyib ki, müxalifətdən olan namizədlər üçün daha ədalətli şərait yaradılması onu razı salıb. Avropa Birliyi Avropa Komissiyasının xarici əlaqələr və Avropa Qonşuluq Siyasəti üzrə ali komissarı Benita Ferrero-Valdner də ATƏT-in seçkilərdə qeydə aldığı tərəqqini alqışlayıb və eyni zamanda, müxalifətdən olan namizədlərin seçkilərdə iştirakı üçün daha yaxşı şəraitin yaradılmasını müsbət qiymətləndirib. Beləliklə, Avropa Birliyi prezidentliyinin yaydığı bəyanat mahiyyət etibarı ilə əsasları məlum olmayan səbəblərdən bir tərəfdən prezident seçkilərini izləmiş çoxminli müşahidəçilər korpusunun, digər tərəfdən isə Avropa Birliyinin yüksək vəzifəli şəxslərinin mövqeyinin üstündən qara xətt çəkir". MSK hesab edir ki, bu ilin əvvəllərində qonşu ölkələrdə keçirilən seçkilərlə bağlı Avropa Birlinyidən göndərilən təbrik məktubları ilə müqayisədə Azərbaycanda keçirilən seçkilərə aid bu mövqe ən azı anlaşılan deyil. Xatırladaq ki, Xarici İşlər Nazirliyi də bu məsələyə kəskin cavab verib. Politoloq Rauf Mirqədirov AB-nin dəyişkən mövqeyində Fransanın Azərbaycana olan xüsusi münasibətinin əsas rol oynamadığını bildirdi. Düzdür, bu gün Avropa Birliyinə Fransa prezidenti Nikola Sarkozi rəhbərlik edir. Amma Fransanı həm birliyin sədri, həm də bu qurumun iki aparıcı dövlətindən biri kimi Azərbaycanla bağlı olan başqa məsələlər maraqlandırır. Digər tərəfdən, Azərbaycanda indiyə kimi keçirilən seçkilərin hamısında bu və ya digər problemlərin yaranıb və Fransa bu günə kimi belə proseslərə müdaxilə etməyib. Yəni Fransa bir dövlət kimi belə bəyanatların verilməsində maraqlı olsaydı, hətta özü sədrlik etmədiyi dövrdə Avropa Birlyinin bu cür aqressiya göstərməsinə nail ola bilərdi: "Hər halda bu bəyanat Parisdə deyil, Avropa Birliyinin mənzil qərargahı yerləşən Brüsseldə hazırlanıb. Ancaq bununla belə, Azərbaycan rəsmilərinin bəyanatla bağlı rəsmilərin Fransa amilini önə çəkməsi başadüşüləndir. Çünki bu ölkə Avropa Birliyində sədrdir və Parisin ermənipərəst mövqeyi var". Ermənistanda və Gürcüstanda keçirilən prezident seçkilərini xatırladan pollitoloq regionun hər üç dövlətində keçirilən seçkinin qiymətləndirilməsinin həmişə pozitivdən neqativə doğru getdiyini dedi: "Ermənistanda pozitiv mövqe sərgiləndi və seçkidən sonrakı hadisələrə görə münasibət kəskin neqativə doğru getdi. Azərbaycanda da ilk günlərdə müəyyən pozitiv bəyanatlar oldu. Hətta Havyer Solana da nikbin fikirlər səsləndirdi. Birdən-birə isə Avropa Birliyinin sözügedən bəyanatı ortaya çıxdı. Qiymətləndirmənin yavaş-yavaş neqativə doğru köklənməyə başlanmasının bir neçə səbəbi var. Yəni bu Azərbaycanın regiondakı rolu ilə də bağlı ola bilər". Onun sözlərinə görə, Azərbaycanın Avropa Birliyinə, NATO-ya qarşı konkret münasibətini formalaşdırması müsbət heç nə vəd etmir: "Araz Əzimovun Brüsseldə Azərbaycanın Ukrayna və Gürcüstandan fərqli olaraq, Avropa Birliyinə üzv olmaq istəmədiyini söyləməsi problem yaradıb. Çünki sual meydana çıxdı ki, bizim Avroatlantikaya inteqrasiya siyasətimiz dəyişib? Bu gün heç rəsmilərimiz də bilmir ki, Azərbaycanı harada görürlər, hansı qütbə meyl edirlər. Bu prioritetlərin qeyri-müəyyənliyi Avropa Birliyinin Azərbaycana münasibətinin formalaşmasına təsir göstərir". xalqcebhesi