Abdulla Gül İrəvan səfərinin gizli məqamını açıqladı Abdulla Gül İrəvan səfərinin gizli məqamını açıqladı "Türkiyənin Dağlıq Qarabağ münaqişənin nizamlanması prosesində vasitəçilik etməsi təklifini Serj Sərkisyan irəli sürüb" "Ermənistanla problemlər həllini tapan kimi bu ölkə bütün layihələrdə iştirak edə bilər" "Biz Azərbaycanla Ermənistan arasında problemin həll olunmasını görmək istəyirik. Buna səmimi qəlbdən inanırıq və bu işə öz töhfəmizi vermək istəyirik". APA-nın məlumatına görə, bu fikirləri Türkiyə prezidenti Abdulla Gül amerikalı jurnalistlərlə görüşündə bəyanlayıb. Türkiyə prezidenti bildirib ki, ölkəsinin münaqişənin nizamlanması prosesində vasitəçilik etməsini o yox, Serj Sərkisyan irəli sürüb: "Bunu mən təklif etməmişəm. Bu təklifi İrəvanda görüşümüz zamanı Serj Sərkisyan səsləndirib. Mən isə dedim ki, Qafqazda hər hansı problem tək iki ölkəni deyil, bütün regionu öz ağuşuna alır və buna misal olaraq Gürcüstandakı son hadisələri göstərdim". Abdulla Gül deyib ki, Qafqaz regionunda hər hansı problemin həlli yalnız inkişafa səbəb ola bilər: "Mənim Ermənistana səfərimdən sonra əhəmiyyətli tərəqqi var. Ermənistana səfərimdən sonra Azərbaycanda oldum, öz həmkarım İlham Əliyevlə görüşdüm. Daha sonra Nyu-Yorkda Azərbaycan, Ermənistan və Türkiyə xarici işlər nazirlərinin görüşü keçirildi". Türkiyə prezidenti vurğulayıb ki, Türkiyə və Azərbaycanı çox mühüm enerji kəmərləri birləşdirir: "Mən bütün bəyanatlarımda bildirmişəm ki, Ermənistanla problemlər həllini tapan kimi bu ölkə bütün layihələrdə iştirak edə bilər". Qeyd edək ki, Rusiyanın Azərbaycandakı səfiri Vasili İstratov isə Bakıda keçirdiyi mətbuat konfransında bildirib ki, Türkiyənin Cənubi Qafqazdakı münaqişələrin həllində rolu kifayət qədər fəaldır: "Dağlıq Qarabağ münaqişəsinin həllində müxtəlif formatlardan (Minsk qrupu, üçtərəfli görüş) istifadə olunur. Əsas məsələ nəticənin əldə edilməsidir". Nizamlanma prosesinə sıfırdan başlamağın mümkünsüzlüyünü deyən diplomat ATƏT-in Minsk qrupu çərçivəsində böyük təcrübə toplandığını və bundan istifadə etməyin zəruri olduğunu söyləyib: "ATƏT-in Minsk qrupu çərçivəsində münaqişənin nizamlanması üzrə xeyli plan hazırlanıb, lakin bu planlar hər iki tərəfi qane etmədiyinə görə sonadək qəbul edilməyib. Minsk qrupu çərçivəsində irəli sürülən bir sıra təkliflər tərəflər arasında hələ razılaşdırılmayıb. Formatlar arasında rəqabətin olması barədə isə danışmağa gərək yoxdur, onlar bir-birlərinə kömək etməlidirlər". Vasili İstratov bildirib ki, Dağlıq Qarabağ münaqişəsinin nizamlanması məsələsində Rusiyanın rolunun fəallaşması rəsmi Moskvanın regional maraqlarıyla bağlıdır: "Rusiya prezidenti Dmitri Medvedyevin Rusiya-Azərbaycan-Ermənistan üçtərəfli görüşünün keçirilməsi barədə təklifi Azərbaycan tərəfinə çatdırılıb. Biz rəsmi Bakıdan cavab gözləyirik. Təklifin qəbul və ya rədd edildiyindən xəbərsizəm. Görüşün baş tutacağı, dəqiq tarixi hələ müəyyənləşdirilməyib. Hazırkı situasiyada münaqişənin həlli üçün əlavə imkanlar yaranıb. Cənubi Qafqazda vəziyyət mürəkkəbdir. Bu problemləri həll etmək lazımdır, hər şeyin öz-özünə həll olunacağını gözləmək olmaz. Bu danışıqlar zamanı Dağlıq Qarabağ münaqişəsinin nizamlanması məsələləri müzakirə olunacaq. Bu, çıxış yolları axtarmaq və razılığa gəlmək üçün daha bir vacib amildir". ABŞ dövlət katibi köməkçisinin müavini, ATƏT-in Minsk qrupunun həmsədri Metyu Brayza isə "Trend News"a açıqlamasında bildirib ki, rəsmi Vaşinqton Dağlıq Qarabağ münaqişəsinin həlli üzrə Azərbaycanın ərazi bütövlüyünü dəstəkləyəcək saziş tapmağa səy göstərir. O, məsələylə bağlı Minsk qrupu həmsədrlərinin gələn həftə Bakıya səfərinin planlaşdırıldığını da deyib.