İran DİN sədrinin parlamentdəki hesabatı zamanı bir çox gizli məqamlar açıqlanacaq – parlamentin sabiq nümayəndəsi İranın daxili işlər naziri Əli Kordanın diplomunun saxta olması ilə əlaqədar onun hesabat vermək üçün parlamentə çağırılması qalmaqalsız ötüşməyəcək və ona qarşı digər ittihamlar da irəli sürülə bilər. İran parlamentinin keçmiş nümayəndəsi və hakim koalisiyanın fəal üzvü İmad Əfruğ bazar ertəsi Trend News-a bildirib ki, Kordan hesabat vermək üçün parlamentə çağırılacaq və hesabat zaman onun haqqında «digər məsələlər» də açıqlanacaq. Əfruğ bildirib ki, Kordana qarşı parlamentdə səsvermə zamanı irəli sürülən əxlaqla bağlı təsdiq olunmuş ittihamlar da göstərir ki, Kordan mütləq parlamentə çağırılacaq. Kordanın diplomunun saxta olması haqda şübhələr parlamentin mühafizəkar nümayəndəsi Ruhullah Hüseynianın avqustun 5-də daxili şilər nazirinin səlahiyyətlərini araşdırdığı zaman yaranıb. Kordan parlamentdə daxili işlər naziri vəzifəsinə səs topladıqdan bir gün sonra, parlamentin digər mühafizəkar nümayəndəsi Əhməd Təvəkküliyə mənsub olan «Əlif» saytı Kordanın diplomunun saxta olması haqda məlumat yayıb. Təvəkküli parlamentin iclasında bu məsələnin araşıdırılmasını tələb etmişdi. Hakim Üsulgəra düşərgəsinin Əhmədinejadı tənqid edən cinahından olan Əfruğ bildirib ki, Kordanın parlamentdə hesabat verməməsi üçün çalışanlar olacaq, lakin bu dəfə parlament nümayəndələri Kordanı dəstəkləyənlərin bütün səylərinə baxmayaraq, onun hesabata dəvət edilməsində qərarlıdırlar. Əfruğ hesabat zamanı digər məsələlərin də aşkar olacağını bildirib, lakin bu məsələlərin mahiyyəti haqda geniş açıqlama verməyib. Kordan hesabat vermək üçün parlamentə çağırılarsa, o, Əhmədinejadın hesabat verəcək ilk naziri olacaq. Bundan öncə sentyabr ayında təhsil naziri Əli Əhmədi hesabat vermək üçün parlamentə dəvət olunmuşdu, lakin hesabat gününə bir necə gün qalmış nümayəndələrdən bir neçəsinin imzalarını geri götürməsi səbəbindən hesabat baş tutmamışdı. Əfruğ parlament nümayəndələri tərəfindən imzaların geri alınması məsələsini tənqid edərək bildirib ki, dünyanın bütün parlamentlərində «tərəfkeşlik» mövcuddur, lakin hansısa məmurun hesabat verməsi üçün verilmiş imzanı geri götürməsi yaxşı hal deyil. Əfruğ İran parlamentində bu cür halların baş vermə səbəbini ölkədə partiyaların güclü və birlikdə olmaması ilə əlaqələndirib. Onun sözlərinə görə, parlament nümayəndələrindən bəziləri öz maraqları çərçivəsində güzəştlər əldə etmək məqsədilə nazirlərlə «sövdələşmə»yə girirlər: əvvəl hesabata çağırılmaları üçün imza verir, daha sonra imzalarını geri götürürlər. İranın daxili işlər nazirinin mətbuat xidməti Kordanın diplomu ilə bağlı xəbərlərə münasibət bildirərək bu haqda şayiə yayanlar barədə qanun çərçivəsində tədbirlər görüləcəyini bildirmişdi. Kordan öz diplomunun surətinin İran DİN-in saytında dərci haqda sərəncam vermişdi. O iddia edirdi ki, fəxri doktorluq diplomunu Oxford Universitetindən alıb. Lakin oktyabrın 5-də Kordan İran prezidenti Mahmud Əhmədinejada məktub yazaraq, fəxri doktorluq diplomunun həqiqətən saxta olduğunu etiraf etməklə bildirmşdi ki, bundan xəbərsiz olub. O, diplomun saxta olmasında Oxford Universitetinin Tehrandakı nümayəndəsinin günahkar olduğunu qeyd etmişdi. Kordanın etirafından sonra parlament nümayəndələri Əhmədinejaddan daxili işlər nazirinin diplomunun saxta olduğu üçün vəzifədən uzaqlaşdırılmasını tələb etmişdilər. Parlament nümayəndələri oktyabrın 12-nə kimi prezidentə onların bu istəyinə cavab vermək üçün möhlət vermişdilər. Lakin prezident parlament nümayəndələrinin istəyinə etinasız yanaşdığı üçün nümayəndələr Kordanın hesabat vermək üçün parlamentə çağırılması məsələsini parlamentin Rəyasət Heyətinə təqdim etdi. İran prezidenti cari ilin iyul ayında iqtisadiyyat, daxili işlər və nəqliyyat nazirləri vəzifələrinə öz namizədlərinin siyahısını parlamentə təqdim etmişdi. Daxili işlər nazirliyinə namizəd Kordan və nəqliyyat nazirliyinə namizəd Həmid Behbəhani hakim «Üsulgəra» koalisiyasının hakimiyyəti tənqid edən qanadına yaxın şəxslər sayılırlar. İqtisadiyyat nazirliyinə namizəd Şəmsəddin Hüseyni isə koalisiyanın hakimiyyəti dəstəkləyən cinahına yaxın şəxsdir. Lakin Kordan həmçinin İran Ali İslam Şurası Məclisinin sədri Əli Laricaniyə yaxın şəxs kimi də tanınır. O, indiyədək İranın neft nazirinin müavini, İran Dövlət Televiziyasında texniki şöbənin sədri və həmçinin Dövlət Televiziyasının İran parlamentindəki maliyyə nümayəndəsi vəzifələrində çalışıb.