Levon Ter-Petrosyan anti-Qərb mövqe sərgiləməyə başlayıb Levon Ter-Petrosyan anti-Qərb mövqe sərgiləməyə başlayıb "Sabiq prezident Ermənistan hakimiyyətini səhv addımlara sürükləməyə çalışır ki, ictimai rəydə öz reytinqini qaldırsın" Ermənistan Milli Konqresinin lideri, sabiq prezident Levon Ter-Petrosyan oktyabrın 17-də keçirilən mitinqdəki çıxışında kütləvi aksiyalara 2 ay fasilə verəcəklərini bəyanlayıb. O deyib ki, Ermənistan dövləti real təhlükə altındadır, bu da Dağlıq Qarabağ ətrafındakı situasiayla və hakimiyyətin yürütdüyü xarici siyasətlə bağlıdır. Levon Ter-Petrosyan bu müddət ərzində müxalifətin təşkilati xarakterli məsələləri yoluna qoymağa çalışacağını söyləyib. Ramiz Mikayıloğlu Məsələylə bağlı fikirlərini öyrəndiyimiz "Atlas" Araşdırmalar Mərkəzinin rəhbəri Elxan Şahinoğlu deyir ki, Levon Ter-Petrosyanın son aksiyadakı çıxışında manevr də, ziddiyyət də, həqiqətə yaxın fikirlər də var. Ziddiyyət odur ki, bu siyasətçinin hər zaman Ermənistanın Türkiyə və Azərbaycanla münasibətlərinin normallaşmasının tərəfdarı qismində çıxışları olub. Ancaq indi o, sanki radikallaşıb, İrəvanın Ankara və Bakıyla münasibətlərinin normallaşmasının ölkəni uçruma aparacığını iddia edir. Levon Ter-Petrosyan həmin aksiyada parlamenti Dağlıq Qarabağın "müstəqilliyini" tanınmağa da çağırıb. Elxan Şahinoğlunun fikrincə, məsələyə başqa prizmadan yanaşılsa, bu, siyasətdir və siyasətdə ikiüzlülük də var. Sabiq prezident erməni cəmiyyətini indiki hakimiyyətə qarşı çevirmək üçün manevr imkanlarından yararlanır. Bəyanatdakı həqiqət çalarlarına gəlincə, "Atlas" Araşdırmalar Mərkəzinin rəhbəri dedi ki, Levon Ter-Petrosyan çıxışında mövcud hakimiyyətin, prezident Serj Sərkisyanın Qərblə yaxınlaşmaq istədiyini söyləyib. Bunda müəyyən qədər həqiqət var. Qərbdə legitimliyi məsələsi həll olunmadığına görə Serj Sərkisyan bir qədər ABŞ və Avropaya yaxınlaşmaq xəttinə üstünlük verə bilər. Çünki həqiqətən Ermənistan Rusiyadan istədiyini əldə edə bilmir. Ruslar işğalçı ölkədəki böyük fabrik və zavodları ələ keçirsə də, həmin müəssisələrin fəaliyyətə başlaması istiqamətində elə bir ciddi addım atılmır. Bu da Ermənistan iqtisadiyyatına mənfi təsir edir və iqtisadiyyatın Qərbdən asılılığı güclənir. Ona görə də Serj Sərkisyan əlacı Qərblə əməkdaşlıqda görür. ABŞ dövlət katibinin müavini Daniel Fridlə görüşdə də Serj Sərkisyan və baş nazir Tiqran Sərkisyan vurğulayıblar ki, Vaşinqtonun Ermənistana etdiyi yardım çox böyük əhəmiyyət daşıyır. Bu mənada Levon Ter-Petrosyanın Serj Sərkisyanın Qərblə yaxınlaşmağa çalışması barədə söylədiklərində həqiqət var. Müxalifətin aksiyalarına 2 ay fasilə verməsi barədə sabiq prezilentin açıqlamasına toxunan Elxan Şahinoğlu bildirdi ki, hər zaman belə açıqlamalar olur: "Hesab etmirəm ki, Serj Sərkisyan böyük təhlükələrlə üzləşə bilər. Yəqin Levon Ter-Petrosyan onu nəzərdə tutur ki, Dağlıq Qarabağ münaqişəsinin həlliylə bağlı Ermənistana Qərbdən böyük təzyiqlər olacaq. Amma işğalçı ölkəyə hər hansı təzyiqin ediləcəyini güman etmirəm. Dağlıq Qarabağla bağlı bundan əvvəl də situasiyalar yaranmışdı və Azərbaycana da müəyyən təzyiqlər vardı. Amma bu o demək deyil ki, Bakı deyilən şərtləri qəbul etdi. Eyni sözləri Ermənistana da aid etmək olar. Münaqişənin həlliylə bağlı müəyyən ümidlər yaransa da, bu o demək deyil ki, Qərb, Rusiya, yaxud Türkiyə Ermənistana təzyiqləri artıracaq". Qurum rəhbəri vurğuladı ki, Levon Ter-Petrosayanın son aksiyadakı açıqlamaları Ermənistan hakimiyyətinə təzyiq elementlərini özündə ehtiva edir: "Güclü müxalifətin hər zaman hakimiyyətə təzyiq etməsi bir aksiomadır. Ona görə də Levon Ter-Petrosyan ona verilən bu imkandan yararlanaraq təzyiqlərini davam etdirir. Sabiq prezident Ermənistan hakimiyyətini səhv addımlara sürükləməyə çalışır ki, ictimai rəydə öz reytinqini qaldırsın".