Aydın Canıyev bin Laden: əfsanə, yoxsa zombi? Onun nə Allaha, nə də millətinə dəxli var... Onun kimliyini Amerika Birləşmiş Ştatlarında bilmirlər, amma Pentaqonda və icmalçılarla ekspertlər arasında bilənlər var! Onun kimliyini Rusiyada bilmirlər, amma BKİ-dəkilərin bir neçəsi onun dosyesini dəfələrlə əlinə götürüb: əldə olunmuş əlavə faktları əlavə etmək üçün! “Onun kimliyini kimlərin bilməsi vacibdirsə, o qədər adam da bilir!!! Bilənlər həqiqəti niyə açmırlar” sualının bir cavabı var – dil həm də susmaq üçündür! Danışanların olması və danışılanların ortaya çıxması heç də o demək deyil ki, biz həqiqəti eşidirik. Bizə həqiqəti başa düşmək üçün danışılan nəsnələr var! KİM(in)DİR bin Laden? Üzəvari götürəndə, çap və elektron informasiya vasitələrində kifayət qədər informasiya var ki, maraq dairəmizin qurdunu öldürsün! Amma və lakin, biz o informasiyaları oxuyuruq ki, onlar ütülənib, qatlarının qırışığı belə adamı əyrisinə kəsir! Diqqətin nəzarətdən çıxmaması üçün yetərli olan bu kombinasiyalardan “məxfi”lik əsirliyindən azadlığa buraxılmış “məhbus”un iyi gəlir! Doğrudanmı, ərəb şeyxinin oğludur bin Laden? Doğrudanmı, ABŞ-da, Avropada, Asiyada (day ərəb dünyası heç də) məhz bin Ladenin qardaşı sərbəst və azad şəkildə biznesini yaşada bilir? Doğrudanmı, Amerika dövlətinin şərəf və ləyaqətinə təcavüz etmiş, dünya kapitalının məbədini Yer üzündən silmiş birisinin gücü pulu Allah bilənlərdən artıq oldu? Biz inanarıq, dünya inanar, amma eyni zamanda AĞILLI siyasətçilər də inanmaz – işlərini ehtiyatlı tutarlar! Sonuncu “doğrudanmı” sualıyla fikirlərimizi bölüşək: “bin Laden dünya üçün təhlükəlidirmi?” “Əfqanıstanın Əzrayılı” bin Laden sadəcə qeyri-rəsmi, belə demək mümkünsə, qanunsuz hərbi birləşmənin – “əl-Qaidə”nin sahibidir. Ən müxtəlif versiyalarda bu birləşmənin yaranma tarixi, formalaşdırılması, maliyyə mənbələri, meydana çıxma zərurəti barədə izahlar olub – hamısını “yalandır” hökmüylə bir kənara tullamaq olmaz: onların içində nadir hallarda da olsa, ipucu olub. Ancaq hesab etmək lazım deyil ki, əgər ABŞ-ın MKİ-si bin Ladeni güllə hədəfində olduğu halda vurub öldürmürsə, o, elə MKİ-nin agentidir! “Rusiya – dovşanı əvvəl arabayla, indi pultla tutan bir ölkə - öz geopolitik maraqlarını həyata keçirmək üçün mümkün maneələrdən biri olan bin Laden “əl-Qaidə”sini zərərsizləşdirmək istəmirsə, deməli, onların uzlaşan ilişkiləri var!” düşüncəsi də yanlış bir hökm. NATO üzvləri barədə də şübhə yersiz olar! BMT də onun böyründə. AB və AŞ PA dünəndən onlarla bir sırada həmrəy! Məhz bu baxımdan yanaşanda, rəhmətlik Yasir Ərəfat və Cövhər Dudayev yada salınmalıdır! 1995-ci ildə işlədiyim KİV-də tərcümə materialında rastlaşdığım cümləni olduğu kimi çatdırıram: “Yasir Ərəfat dəfələrlə güllə hədəfində olsa da, onun ölümü məsləhət bilinməmişdi”. Düzdür, o vaxt mən birtərəfli yanaşmışdım, rəhmətlikdən az qala bir satqın obrazı yaradacaqdım. Məni bu obrazı yaratmaqdan saxlayan elə həm də həmin cümlənin özü oldu: ölümü məsləhət bilinməyənlər, sadəcə, SƏHVLƏRİNİ (mən “günah” sözünü işlətmirəm) düzəltməyə AMANLIDIR! 62 yaşında dünyaya uşaq gətirən Yasir Ərəfat öz MÜDDƏTİNDƏ idi, anını gözləyirdi, sağlamlıq durumu hər cür təminlənən milli liderin qəfildən pisləşən səhhəti onun müddətinin sonu idi – GETMƏK ANI çatmışdı! Qərarı kim və yaxud da kimlər vermişdi? Bizim bir-birinə düşmən hesab etdiklərimiz heç də düşmən deyillər! Belə məsələlərdə... Nobel mükafatı artıq bir ORDEN MİSSİYASInın daşyıcısına çevrilir – Qorbaçovdan sonra bir daha sülh nominasiyasında nobeliantları vərəvurd edin: sonuncusu Marti Axtisaaridir! Finlandiyanın keçmiş prezidenti! Cövhər Dudayev – SSRİ MN aviasiya birləşməsinin komandiri “vıpendrivaet”! “Podumayeş”! Çeçen xalqının azadlıq mübarizəsində itirdiyi oğul və qızların ruhları ta qiyamət gününə qədər əzabda qalacaq! Ta həqiqət bilinənəcən! Öz xalqına azadlıq istəyənlər öz xalqlarını azadlığa çıxarıblar, öz xalqlarına azadlığı öz torpaqlarında, öz dövlətlərində veriblər! Missionerlərdən fərqli olaraq... Süpürgəçisini də “dövlət qulluğudur” deyə MİS-də işə götürəndə məlum idarənin filtrasiyasından keçirən bir dövlətin aviasiya generalının özbaşına olmağına heç bir halda inanmaq lazım deyil (bu yazının motivi olmadığından, real həyatda, çay stolu arxasında dəpdəqiq faktlarla çözümünü istənilən qədər apara bilərəm)! Çünki o öz milləti üçün istədiklərini eyniylə sovet dövləti üçün istəmişdi – əvvəllər! PSİXOLOJİ BARYERLƏRİN hər zaman özünü büruzə verəcəyini bildiklərindən, adətən, zombiləşdirmə variantından yararlanırlar! Bu hesaba da Cövhər Dudayevi, eləcə də ÖZBAŞINA “dudayevizm”ə qoşulub dəstək verənləri aradan götürmək çətin olmadı... bin Laden, qeyd-şərtsiz, zombiləşdirilmiş, həm də kukla teatrının personajına çevirilmiş birisindən artıq deyil. Onun sınaqdan çıxarılma meydanı isə Əfqanıstandır – niyə məhz Əfqanıstan və əfqanlarla soykök bağlılılğı olanlar (bu barədə növbəti yazıda)? Hələlik isə sapınmadan bin Ladenlə tanış olaq. bin Ladenin DNK-sı: TNK-lar... Nə Amerikanın, İngiltərənin, nə də Rusiyanın, İranın dövlət və milli maraqları bin Ladeni zəruri etməyib. bin Ladeni “döyüş silahı” faktoruna çevirən transmilli korporasiyaların iqtisadi maraqlarıdır. Əvvəla, narkoticarət və silah alveri qazanc gətirən ən gəlirli sahədir! İstehsal olunan silah arsenalına tələbatı artırmaq üçün istehsal olunanlar sıradan çıxarılmalıdır – silah-sursat arsenalının məhv edilmə yeri isə yalnız və yalnız döyüş meydanı ola bilər! İkincisi, niyə məhz bin Laden? Belə avantüraya ancaq və ancaq fanat, üstəlik də bədəvi ərəb – 12 imamının 12-sini də zəhərləyən, sonuncu peyğəmbərini də evindən-eşiyindən edən zümrə təmsilçisi razılaşa bilər! Avropa İsanı çarmıxa çəkəndən sonra gəlib qabağında şam yandıranda dərk etmişdi ki, İŞIĞI MƏHV EDİB, QABAĞINDA ŞAM YANDIRIR! Bu, Avropanın sonuncu səhvi oldu – Avropa daha səhv eləmir! Avropanın əvəzinə səhvi Yasir Ərəfat, Hüsni Mübarək, Müəmmər Qəddafi, Səddam Hüseyn, Bəşər Əsəd edir! Avropa üçün səhvi ərəb dünyasının şeyxləri edir – malik olduqları 1 trilyon 300 milyard kapitalın tam 1 trilyonunu Avropa banklarında girov qoyur öz səhvləri qarşılığında, hətta şahzadələri evlənəndə belə ingilis qızına elçi düşür ki, sərvətimlə bərəbər, namusumun taleyinə cavabdehliyi “sənə etibar edirəm”!!! “Niyə məhz bin Laden” sualında bin Ladenin yerində Dodi əl-Fayed də ola bilərdi, Səddam Hüseynin oğlu Uday da, başqa bir şeyx ərəbin balası da. Heç bir halda bu isim açıq-aşkar silah alveri ilə MƏŞĞUL OLAN Mark Tetçer ola bilməz! Mark təkcə Marqaret Tetçerin – meritokratiyanın 20-ci əsr İngiltərəsində, dolayısıyla Avropasında təntənəsini qurmuş baş nazirin oğlu deyil axı, həm də AVROPA AİLƏSİNİN təmsilçisidir. Hər bir fərd cəmiyyətdə öz ailəsinin təmsilçisidir – gələcəkdə “bəşəriyyət ailəsində kimlərə yol və yer verməməli” kriteriyasının konturlarını cızanlar belə məqamları indidən nəzərə alırlar. Belə ölçüsüzlük özünü batırmış Şərqdə ola bilər! O Şərqdə ki, indi diktatora çevrilmiş Hüsnü Mübarək 40 il qabaq Ərəb Dövlətləri Liqasının ilk konfranslarından sonra təəssüflə demişdi: 21 ərəb dövlətinin heç birinin fikri bir-biriylə üst-üstə düşmür! İki ingilisdilli, beş romankökənli dövlətin nümayəndələri hər zaman eyni fikirdədir! Məhz belə olduğu üçün də 30-40-cı illərin FAŞİST ALMANİYASI çox az sonra, 90-cı illərdə REABİLİTASİYA OLUNDU: “bu dövlət öz yerini Hitlerə görə itirməməlidir dünya düzənində” deyə. bin Laden təkcə Amerika MKİ-sinin agenti deyil və o, 1979-cu il təcavüzü zamanı sovet qoşunlarına qarşı vuruşmaqda əfqan qardaşlara kömək üçün göndərilməyib – rus mətbuatının yazdığı kimi. O, təkcə narkoticarətin və silah alverinin piştaxta dalında duran satıcısı da deyil – ABŞ-ın Potomak sahillərindən qaynaqlanan demokratik mətbuatının “1 nömrəli terrorçu” haqda yazdığı kimi. O, təkcə agent, narkobaron, silah maqnatı, eləc də Allahın yolunda qayda-qanun yaratmaq istəyən, müsəlman qardaşlara qan yardımçısı da deyil – bizim mətbuatda bizə yedirdilən məlumatlarda olduğu kimi. O, heç Allahın da mömin bəndəsi deyil – HƏR YERDƏ “əl-Qaidə” – “QAYDA!” iddiası il özünü bəyan edən bin Laden ilkin qaydanı elə ərəb dünyasından başlamalıydı! Dubaydan. Allahın bağışlanmaz günahlardan buyurduğu fahişəliyin çiçəkləndiyi bir regiondan! O isə... Əfqanıstandadır! O, seçilmişlərdən deyil, seçilənlərdəndir! O, Əfqanıstana gəlməyib, göndərilənlərdəndir! Onun bir faciəli müqayisəsi var dünya düzənində – Dodi əl-Fayed. Ərəb-müsəlman-oliqarx dünyasının iki nəhənginin ikisi də eyni taleyi yaşayır: biri ingilisin xanımıyla qəzaya uğrayır, biri “ingilisin barmağı”yla. bin Laden təkcə Əfqanıstan üçün “əzrayıl” ola bilər – onun əhatə dairəsi oradır. Belə razılaşdırılıb! Kiminlə? Sual belə verilsə, daha yaxşı olar – hansı TNK-larla... Gələcək TNK-ların müstəqil ordu birləşmələrinə, monopoliyaya aldıqları istehsal sahələrinə və geopolitik maraqlarına hamilədir! “Yığışdırın “denbalen” söhbətini” Elçin Şıxlının Amerika təəssüratlarından oxumuşdum, deyəsən: “Əyalət amerikalısı üçün öz şəhərinin informasiyasından başqa heç nə maraqlı deyil, hətta prezidentin kim olması da”. Amma həmin AMERİKADA “əl-Cəzirə” kanalı hətta BBS-ni kölgədə qoyur! Niyəsini açmağa ehtiyacmı var!? Rus oxucusu, dinləyicisi və tamaşaçısı intellekt sarıdan yararlanmaq üçün faydalı olan heç bir nəsnəni qaçırmır. Ancaq ona xüsusi qaydada hər gün “bin Laden” dozası yeridilir! Niyəsini açmağa ehtiyacmı var?! Fransa və İngiltərə vətəndaşlarının təhlükəsizliyini təmin etmək adıyla miqrasiya qapılarını açmaqdan imtinaya doğru əməlli-başlı konsepsiya hazırlayıb tətbiq etməkdədir. Niyəsini anlamaq beləmi çətin? Bütün günahların səbəbkarı isə bin Laden sayılır! Doğrudanmı, o, ZƏMANƏMİZİN QƏHRƏMANIDIR - döyüş şücaətləri, iqtisadi fərasəti, təfəkkürü, liderlik bacarığıylamı? Nümunəsinə rast gəlibsinizmi? Axtardım – tapmadım!!! Milli Məclisin iclaslarının birində deputatın səsləndirdiyi “yığışdırın “denbalen” söhbətini” o vaxt hoydu-hoyduya götürsələr də, bu, ən düzgün qiymət idi! Çünki... “...bütün dinlər əfsanə və puçdur” deyən M.F.Axundovun “əfsanə”yə verdiyi anlamdan yararlanıram. “Bin Laden bir əfsanədir” Həm də öləri, unudulası, utanası bir əfsanə. Tarixdə Hitler əfsanəsi kimi bir şey. Halbuki, şərqdə Çingizxan, əmir Teymur əfsanəsi olub. Şərq sonuncu peyğəmbərin məkanıdır. Bu məkanı – Qara daşı MÜQƏDDƏSLİYİNƏ GÖRƏ yox, qazanc naminə ələ keçirmək istəyənlərin prototipidir bin Laden! SON Biz heç vaxt onun canlı vücudunu görməyəcəyik. O, həmişə “əl-Cəzirə”dən danışacaq. BBC və digər nəhəng informasiya yetkililəri heç vaxt ondan birbaşa müsahibə götürə bilməyəcəklər – düşünməyə dəyməzmi “nə üçün?” “əl-Cəzirə” belə ələ alınmaz və möhtəşəm, professionaldırmı? ...Birdən adam yorulur – iyrəncliklərin həqiqətlərini başa düşdükcə, yorulursan. bin Laden bizim dünyanın yorğunluğudur! Bizi bin Ladenlə yatırdıb da onunla oyatmaq istəyirlər. O bir zəngli saat – kukla içində... Əsl əfsanə də elə bu... bu qədər də bəsit! LENT.AZ