BTC-nin BOMBALANDIĞI TƏSDİQLƏNDİ Rus mərmiləri kəmərin cəmi 50 metrliyində dərin çala-çuxurlar açıb Rusiyanın Gürcüstana hərbi müdaxiləsi zamanı Bakı-Tiflis-Ceyhan neft kəmərinin də bombardman edildiyi təsdiqlənib. Xatırladaq ki, Rusiya təyyarələrinin 5 gün davam edən hərbi münaqişə zamanı bir neçə dəfə kəmərin keçdiyi ərazilərə raket-bomba zərbələri endirdiyi haqda Gürcüstan hökumətinin rəsmiləri tərəfindən məlumatlar yayılmışdı. Lakin Rusiya tərəfi, eləcə də Azərbaycan hökuməti kəmərə zərbə endirildiyi haqda yayılan xəbərləri təkzib edirdilər. Bununla belə xarici jurnalistlər kəmərin keçdiyi ərazilər boyu gəzərək həqiqətən BTC-yə Rusiya tərəfindən zərbələr endirildiyinin şahidi olublar. “Röyter” agentliyinin və Britaniyanın “News Staesman” qəzetinin əməkdaşları müəyyən ediblər ki, kəmərin yaxınlığında onlarla bomba partlayıb, bombalardan biri BTC-nin cəmi 50 metrliyində dərin çala açıb. BTC-nin keçdiyi ərazilərdə yaşayan gürcü sakinlər jurnalistlərə nəql ediblər ki, onlar Rusiya təyyarələrinin alçaqdan uçaraq kəmərin yaxınlığına necə zərbələr endirdiyinin şahidi olublar. Bombalar kəmərə ziyan verməsə də onun yaxınlığında böyük kraterlər açıb. “Onlar avqustun 11-də axşam saat 7 radələrində bomba atmağa başladılar”, - deyə 26 yaşlı gürcü çobanı Adam Zaridze bildirib. Onun dediyinə görə, ertəsi gün də Rusiya təyyarələri BTC-nin keçdiyi bölgədə görünüblər və cəmi 42 bomba atıblar. “Bombaları qara təyyarələr atırdı, partlayış səslərindən mal-qara hərəsi bir tərəfə qaçdı, onların bir hissəsi öldü”. Çoban deyib ki, bombardman zamanı yaxınlıqdakı qadınlardan biri infarkt keçirərək ölüb. Bildirilir ki, Azərbaycan sərhədlərindən cəmi 20 kilometr məsafədə kəmərin 50 metrliyində dərinliyi 3, diametri 8 metr olan bomba krateri indi də qalır. Digər bölgələrdə də BTC-nin yaxınlığında Rusiya bombalarının açdığı çalalar görünür. bp-nin Londondakı mərkəzi ofisindən Mark Teylor bildirib ki, onların bombardman haqda xəbərləri olub, lakin şirkət rəsmisi Rusiyanın kəmərin yaxınlığına zərbələr endirməsini şərh etməyib. Ekspertlər hesab edirlər ki, Rusiyanın həqiqətən kəmərə zərbə endirmək niyyəti olub. Lakin kəmər yerin altıyla keçdiyinə görə Rusiya bombardmançıları onun istiqamətini dəqiq müəyyən edib vura bilməyiblər. Çünki Rusiya hədəfi bir neçə metr dəqiqliklə vuran bombalara malik deyil, belə silahlar ABŞ ordusunda var. Ehtimal olunur ki, Rusiya kəməri ən azından bir neçə yerdən sıradan çıxarmaq istəyib, lakin sonradan Qərbin Gürcüstanda baş verənlərlə bağlı sərt reaksiyalar göstərməsi nəticəsində bombardmanlara son qoyub və BTC-ni partlatmaqdan çəkinib. Bəzi ekspertlər isə hesab edir ki, Moskva sadəcə, BTC-nin artıq təhlükəsiz marşrut olmadığını göstərmək üçün kəmərin keçdiyi əraziləri bombalayıb. Xəbər verildiyi kimi, Rusiyanın Gürcüstana hərbi müdaxiləsindən iki gün əvvəl BTC Türkiyə ərazisində partladılıb. Nəticədə kəmərlə Azərbaycan neftinin nəqli dayanıb. Bununla belə Rusiyanın Gürcüstanı bombaladığı günlərdə kəmər neftlə dolu idi əgər zərbələr hədəfə dəysəydi, güclü yanğın başlayardı. Hazırda BTC üç həftəlik fasilədən sonra yenidən işə salınıb, bununla belə Gürcüstandan keçən və sutkada 90 min barrel neft nəql edən Bakı-Supsa kəməri hələ də işləmir. bp şirkəti kəməri Gürcüstana hərbi müdaxilədən sonra bağlamağı qərara alıb. F.MƏMMƏDOV musavat