Avropada PKK-ya münasibət sərtləşir "Türkiyənin regionda önəminin artması, Ankaranın diplomatik mübarizəsi, diplomatik danışıqlar Avropanın PKK-ya loyal yanaşmasını qırıb" "PKK-nın Avropa kassası" kimi tanınan Nedim Seven iki ay əvvəl İtaliyadan Ermənistana keçmək istəyərkən həyata keçirilən məxfi əməliyyat nəticəsində həbs olunub. Roma məhkəməsi onun barəsində həbs qərarı çıxarıb. Təhlükəsiz sığınacaq və fəaliyyət üçün məhz işğalçı Ermənistana keçmək istəyən PKK-çı terrorçu Türkiyə və bir sıra Avropa dövlətlərinin xüsusi xidmət orqanlarının beynəlxalq əməkdaşlığı nəticəsində zərərsizləşdirilib. Hazırda Fransanın hüquq-mühafizə orqanlarının dindirdiyi Nedim Sevenin Paris yaxınlığında bir həbsxanada saxlanıldığı bildirilir. Türkiyə artıq Nedim Sevenin bu ölkəyə təhvil verilməsi üçün rəsmən Fransa hökumətinə müraciət edib. Ramiz Mikayıloğlu Dünən səhər Türkiyə hüquq-mühafizə orqanlarının terrorizmə qarşı mübarizə üzrə ekspertlərindən ibarət beş nəfərlik heyət Fransaya gedib. Heyətin artıq Nedim Seveni dindirdiyi bildirilir. Qeyd edək ki, buna qədər bir çox hallarda PKK terrorçuları saxlansalar da, Avropada onlar cinayət məsluiyyətinə cəlb olunmayıb, Türkiyəyə təhvil verilməyiblər və qısa müddətdən sonra azadlığa buraxılıblar. Elə buna görədir ki, qardaş dövlətin rəsmiləri dəfələrlə Avropanı terrorizmə qarşı mübarizədə ikili standartlar yürütməkdə günahlandırıblar. Ekspertlərə görə, indiki mərhələdə Qərdə PKK-ya qarşı sərt davranışının nədəni, Ankaranın tələblərinin nəzərə alınması Türkiyənin bölgədə önəminin və rolunun artmasıyla bağlıdır. Məsələylə bağlı fikirlərini öyrəndiyimiz Türkiyə Araşdırmalar Mərkəzinin rəhbəri Toğrul İsmayıl deyir ki, Qafqazda baş verən olaylar Türkiyənin regiondakı önəmini Qərb üçün daha da artırıb. Məsələn, ABŞ-da qanunverici orqana son seçkilərdə demokratlar qalib gəlib. Onların liderlərindən olan Hensi Pelosi demişdi ki, SSRİ dağılıb, ona görə də Türkiyənin öncəki əhəmiyyəti artıq azalıb. Amma son hadisələr göstərir ki, istər ABŞ, istər Avropa Birliyi üçün qardaş ölkənin əhəmiyyəti daha da artıb. Digər tərəfdən, Mondros anlaşmasına görə, Türkiyədən icazə almaqla digər dövlətlər boğazlardan gəmilər keçirə bilərlər. Təsadüfi deyil ki, Rusiya Baş Qərargah rəisinin Anatoli Hoqovitsin deyib ki, Ankaranın üzərinə çox ciddi məsuliyyət düşür, bu dövlət Mondros anlaşmasına ciddi nəzarət etməlidir. Belə çıxır ki, Türkiyə özü istəsə də, istəməsə də münaqişədə tərəf qismində hadisələrin içərisinə daxil olub. Düzdür, Ankara bölgədə balansı qorumağa çalışıb. "Qafqaz Sülh və Əməkdaşlıq Platforması" ideyası da balansı qormağa hesablanmışdı. Amma Moskvanın Cənubi Osetiya və Abxaziyanı "tanıması" bu balansı Türkiyə üçün pozub. Onu da nəzərə almaq lazımdır ki, Rusiya həm də hazırda qardaş ölkənin birinci dərəcəli iqtisadi tərəfdaşıdır. Təbii qaz ehtiyacları da hazırda əsasən Rusiya hesabına ödənilir. Qərbdə bunu da nəzərə alırlar: "Qısası, Türkiyə həm ABŞ, həm Avropa Birliyi, həm də Rusiya üçün əhəmiyyətli dərəcədə ciddi önəm qazanıb". Toğrul İsmayıl da dedi ki, indiyə qədər Avropada PKK-ya münasibət birmənalı olmayıb. Uzün müddət Türkiyədə fəaliyyət göstərən PKK terror təşkilatının əsas gəlir qaynağı xüsusilə Avropadakı özəklərdən gəlib. Amma Türkiyənin regionda önəminin artması, Ankaranın diplomatik mübarizəsi, diplomatik danışıqlar Avropanın PKK-ya loyal yanaşmasını qırıb. Türkiyə ötən dövr ərzində PKK-nın Avropadakı bir çox qərargahlarını bağlatdıra bilib. Hətta "Roj TV"-ni müəyyən mənada yoxlatdıra, bağlatdıra bildi. Məsələ həm də ondadır ki, PKK artıq tək Türkiyə yox, Avropa üçün də təhlükəyə çevrilib. Xüsusən narkotik ticarəti, insan qaçaqmalçılığı avropalıları narahat etməyə başlayıb: "Üçüncüsü, qarşılıqlı protokollar var. Avropa istəsə də, istəməsə də, bu məsələyə yanaşmasını dəyişməlidir. Fransada bu dindirmənin həyata keçirilməsi də anlaşılandır. Qondarma "erməni soyqırımı"nı tanımaqla Türkiyəylə münasibətləri pisləşdirmiş Fransa indi Avropa Birliyinə rəhbərlik etdiyi bir dönəmdə bu dinləmənin Parisdə keçirilməsinə şərait yaratmaqla əlaqələri normallaşdırmağa çalışır. Ancaq PKK-nın fəaliyyəti Avropada tamamilə aradan qaldırılmayıb, oradakı mənbələrdən maliyyələşmə davam edir". xalqcebhesi