MDB-də analoqu olmayan Paralimpiya İdman Kompleksinin açılışı olub 13-cü Yay Paralimpiya Oyunlarında iştirak edəcək idmançılar üçün mükafat təsis edilib Dünən prezident İlham Əliyev Sumqayıt şəhərində olub. Dövlət başçısı əvvəlcə ümummilli lider Heydər Əliyevin ölkəmizin ikinci böyük sənaye şəhərinin mərkəzində ucaldılmış abidəsini ziyarət edərək gül qoyub. Sonra İlham Əliyev Sumqayıtda Əmək və Əhalinin Sosial Müdafiəsi Nazirliyinin Paralimpiya İdman Kompleksinin açılışında iştirak edib. Dövlət başçısına məlumat verilib ki, kompleksin tikintisi barədə qərar ümummilli lider Heydər Əliyevin paralimpiyaçılarla görüşündən sonra qəbul edilib. MDB məkanında yeganə olan bu kompleksdə respublika və beynəlxalq səviyyəli yarışların keçirilməsi nəzərdə tutulub. Tikintisinə 2005-ci ildə başlanmış və 2,25 hektar sahəni əhatə edən kompleksin smeta dəyəri 3,1 milyon manatdır. Kompleksə 130 nəfərlik akt salonu, trenayor, əl oyunları, böyük və kiçik atıcılıq zalları, açıq futbol və voleybol meydançaları, qapalı üzgüçülük hovuzu daxildir. Binada müasir tipli liftlər, üzgüçülük hovuzunda avtomatik təmizləmə, dezinfeksiya, qızdırıcı qurğular quraşdırılıb. Kompleksdə əlillərin sərbəst hərəkəti üçün lazımi şərait yaradılıb. Ərazidə abadlıq işləri aparılıb, yaşıllıq salınıb, ağac və gül kolları əkilib, müasir işıqlandırma sistemi quraşdırılıb. Kompleksin yanında müasir tipli mehmanxana da tikiləcək. İlham Əliyev kompleksin rəmzi açılışını bildirən qırmızı lenti kəsib və bina ilə yaxından tanış olub. Binanın foyesində ulu öndər Heydər Əliyevin büstü qoyulub. Burada ümummilli lider Heydər Əliyevin və İlham Əliyevin müxtəlif vaxtlarda idmançılarla görüşlərini əks etdirən fotoşəkillərdən ibarət guşə yaradılıb. Dövlət başçısı akt salonunda Pekin Paralimpiya oyunlarında iştirak edəcək Azərbaycan idmançıları ilə görüşüb, onlarla xatirə şəkli çəkdirib. Görüşdə çıxış edən prezident İlham Əliyev paralimpiyaçıların idmana sadiqliyini qəhrəmanlıq adlandırıb. İlham Əliyev Çinin paytaxtı Pekin şəhərində keçirilən 13-cü Yay Paralimpiya Oyunlarında iştirak edəcək idmançılara uğurlar arzulamaqla yanaşı, onları ən yüksək nəticələr göstərməyə həvəsləndirmək məqsədi ilə mükafatın təsis edildiyini bildirib. Prezident vurğulayıb ki, Yay Paralimpiya Oyunlarında ən yüksək nəticələrə görə Azərbaycanın əlil idmançıları və onların məşqçiləri üçün mükafatların məbləği aşağıdakı qaydada müəyyən edilib. Birinci yeri tutan hər bir idmançıya 200 min manat, onun məşqçisinə isə 100 min manat, ikinci yeri tutan hər bir idmançıya 100 min manat, onun məşqçisinə isə 50 min manat, üçüncü yeri tutan hər bir idmançıya 50 min manat, onun məşqçisinə isə 25 min manat. "Bu sizin fəaliyyətinizə dövlət tərəfindən verilən qiymətdir. Əminəm ki, bu, ədalətli bir qərardır" - deyə İlham Əliyev vurğulayıb. Qeyd edək ki, dünən prezident bununla bağlı sərəncam da imzalayıb. Prezident İlham Əliyev həmçinin Sumqayıtda Qarabağ müharibəsi əlilləri, şəhid ailələri və Çernobıl qəzası əlilləri üçün tikilmiş dördmərtəbəli 36 mənzilli yaşayış binasının istifadəyə verilməsi mərasimində də iştirak edib. Əmək və Əhalinin Sosial Müdafiəsi Nazirliyinin sifarişi ilə tikilən binaya əlillərin rahat daxil olmaları üçün xüsusi giriş quraşdırılıb, hər bir mənzil mebel və digər məişət avadanlığı ilə təmin edilib. Azərbaycan prezidenti adından hər bir ailəyə televizor və soyuducu hədiyyə olunub. Binaya qaz, elektrik və su xətləri çəkilib, bütün mənzillər telefonlaşdırılıb, mərkəzi istilik sitemi, yanğın əleyhinə xəbərdarlıq siqnalı quraşdırılıb. Ətrafda abadlıq və yaşıllıq işləri aparılıb. İlham Əliyev yeni mənzillərin orderlərini sakinlərə təqdim edib, bina ilə yaxından tanış olub. Dövlət başçısına məlumat verilib ki, mənzillərin 5-i şəhid ailələri, 29-u Qarabağ müharibəsi əlilləri, 2-si isə Çernobıl qəzası əlilləri üçün ayrılıb. Prezident İlham Əliyev Sumqayıtda yenidən qurulan Nəsimi adına mədəniyyət və istirahət parkında da olub. "Göyərçin" abidəsinin yerləşdiyi park dövlət başçısının tapşırığı ilə yenidən qurulub. Parkda yerə daş plitələr döşənib, dekorativ gül kolları və ağaclar əkilib, müasir işıqlandırma sistemi quraşdırılıb, köpüklü fəvvarə tikilib. Sakinlərin istirahəti üçün lazımi şəraitin yaradıldığı parkda məişət obyektləri də fəaliyyət göstərir. Sumqayıtda Yeni ailə quranlar günü hər il iyul ayında bu parkda qeyd edilir. İlham Əliyev və xanımı Mehriban Əliyeva burada Sumqayıt sakinləri ilə söhbət ediblər, xatirə şəkli çəkdiriblər. Daha sonra İlham Əliyev Sumqayıtın Sülh və Bakı küçələrinin kəsişməsindəki əraziyə gəlib. Dövlət başçısına məlumat verilib ki, buradakı 12 mərtəbəli üç bina alkapon materialla üzlənib, park yenidən qurulub, fəvvarə tikilib. Ətrafda abadlıq və yaşıllaşdırma işləri aparılıb. İlham Əliyev və xanımı Mehriban Əliyeva burada da şəhər sakinləri ilə söhbət ediblər, xatirə şəkli çəkdiriblər. Elman BABAYEV kaspi