Soyuq Müharibə təhlükəsi varmı? Rusiyanın Cənubi Osetiya və Abxaziyanı rəsmən tanımasından sonra Moskvada ən aktual mövzulardan biri ölkəylə Qərbin gələcək münasibətləridir. Qərb ölkələri Moskvanı sərt tənqid edir və hətta Rusiyaya qarşı müəyyən koalisiyanın formalaşması zərurətindən danışılır. Rəsmi Moskva bəyan edir ki, o mümkün yeni soyuq müharibədən heç də qorxmur. Düzdür, rəsmilərdən fərqli olaraq bir sıra müxalifət liderləri və şərhçilər ölkənin təcrid olunmasından ehtiyatlanırlar. Rusiyanın Gürcüstanın separatçı bölgələri Cənubi Osetiya və Abxaziyanı tanıması Qərblə Moskva arasında münasibətləri xeyli gərginləşdirib. Tərəflər bir birini tənqid edən kifayət qədər sərt bəyanatlarla çıxış edirlər və artıq mətbuat yeni soyuq müharibənin başlamasından yazır. BBC-yə müsahibəsində Rusiya prezidenti Dmitriy Medvedev bəyan edib ki, belə soyuq müharibə perspektivi onu da narahat edir və Rusiya heç də qarşıdurma tərəfdarı deyil: "Məni bu narahat edir, ancaq əgər prioritetlər haqda danışsaq, bizim üçün başlıcası insanların həyatını xilas etməkdir, ona görə də mən 2 yeni dövlətin tanınması haqda qərarı qəbul etdim. Ancaq biz heç bir soyuq müharibəni istəmirik. Bu heç kimə xeyir gətirməyib, bəzi dövlət xadimlərinin bəyanatlarına baxmayaraq soyuq müharibədə qalib olmur. Ona görə biz qarşıdurma və gərginlik tərəfdarı deyilik, biz öz Qərb tərəfkeşlərimizlə səmərəli, normal, ən əsası isə qarşılıqlı hörmət əsasında olan münasibətlər istəyirik". Gəlin yadımıza salaq ki, SSRİ-nin heç olmasa Varşava müqaviləsi ölkələri və Moskvanın iqtisadi köməyindən asılı ölkələr simasında müttəfiqləri var idi. İndiki reaksiyaya baxın, hətta MDB-də Rusiyanı kimsə dəstəklədimi, yox, əks mövqelər var, məsələn, elə Azərbaycanda. Sonra deyək Rusiyanın bel bağlamaq istədiyi Çin, Tibet probemi olan Çin Rusiyanı heç zaman dəstəkləməyəcək Tatyana Porxalina Artıq Rusiya televiziyasına verdiyi müsahibəsində prezident Medvedev bəyan edib ki, Moskva soyuq müharibədən heç də qorxmur. Bu arada Rusiyadakı siyasətçilər və şərhçilər hazırkı durumun inkişafıyla bağlı müxtəlif ssenarilər irəli sürürlər. Bir çoxlarının zənnincə, Qərbin sərt reaksiyası qəzəbli bəyanatlardan irəli getməyəcək və Moskvanı heç bir sanksiyalar və əsaslı itkilər gözləmir. Məsələn, siyasi şərhçi Pavel Zolotaryov bunu belə açır: "Əgər real gərginləşmə olsa hamı üçün pis olacaq. Bu silahlar üzərində nəzarət sisteminə zərbə vuracaq, regional və qlobal təhlükəsizlik məsələləri zərbə altında qalacaq. Bu baxımdan indiki gərginləşmə müvəqqətidir, soyuq müharibə olmayacaq, onun üçün əsas, fundament yoxdur". Bir çox Moskvalı şərhçi və siyasətçilərə görə, Rusiya hazırda ilk növbədə iqtisadi baxımdan kifayət qədər qüclüdür və hətta müəyyən təcrid onu qorxutmamalıdır. Lakin, məsələn, Moskvalı politoloq Tatyana Porxalinaya görə, hər şey elə də birmənalı deyil, Rusiya Sovet İttifaqı deyil və hazırkı təcrid onun üçün çox ağrılı ola bilər: "Gəlin yadımıza salaq ki, SSRİ-nin heç olmasa Varşava müqaviləsi ölkələri və Moskvanın iqtisadi köməyindən asılı ölkələr simasında müttəfiqləri var idi. İndiki reaksiyaya baxın, hətta MDB-də Rusiyanı kimsə dəstəklədimi, yox, əks mövqelər var, məsələn, elə Azərbaycanda. Sonra deyək Rusiyanın bel bağlamaq istədiyi Çin, Tibet probemi olan Çin Rusiyanı heç zaman dəstəkləməyəcək. Faktiki biz təkik, biz Rusiya və ona qarşı olan bütün qalan dünya". Bu mövqe tərəfdarlarının zənnincə, təcrid birbaşa hər bir Rusiya vətəndaşına təsir edə bilər, birincisi xarici ölkələrlə viza rejimi sərtləşə bilər, başqa tərəfdən iqtisadi münasibətlər xeyli korlana bilər. Digər mühüm məqam isə odur ki, Qərbdən tamamilə üzünü çevirmiş Rusiya çox zaman elə Qərbin təyziqi altında apardığı demokratikləşmə, korrupsiyayla mübarizə fəaliyyəti arxa plana qoya bilər. bbc