"Rusiya Qarabağda həmişə ermənilərin tərəfində olub" Akif Nağı: "1992-ci ildə Azərbaycan Milli Ordusu Xankəndinə yaxınlaşanda Rusiya Ermənistana külli miqdarda silah-sursatla, hərbi mütəxəssislərlə yardım göstərib" Xarici İşlər Nazirliyinin mətbuat katibi Xəzər İbrahim bu həftə keçirdiyi mətbuat konfransında "Gürcüstan-Cənubi Osetiya münaqişəsində vasitəçidən münaqişə tərəfinə keçən Rusiyanın Minsk Qrupunda həmsədrlikdən kənarlaşdırılması məsələsinə baxılırmı?" sualına diqqət çəkən cavab verib. O deyib ki, Rusiya Ermənistan-Azərbaycan münaqişəsində tərəf deyil. Rusiyanın Dağlıq Qarabağ münaqişəsində tərəf olmadığını əsas gətirən Xəzər İbrahim bu ölkənin həmsədrlikdən kənarlaşdırılmasına lüzum görmür. Ancaq hər kəsə bəllidir ki, əslində Rusiya Dağlıq Qarabağ münaqişəsində nəinki tərəf, bu konfliktin yaradıcısı və torpaqlarımızın işğalını həyata keçirən əsas qüvvədir. Ramiz Mikayıloğlu Xocalıda da qətliamı məhz Rusiyanın Xankəndində yerləşən 366-cı motoatıcı alayın bilavasitə iştirakıyla törədildiyi də inkarolunmaz həqiqətdir. Politoloq Vəfa Quluzadənin bənzətməsi bu mənada hər şeyi əhatə edir. O bildirir ki, Qarabağda müharibə başlayarsa, yenə də ruslar erməni geyimində peyda olacaqlar. Qarabağ Azadlıq Təşkilatının sədri Akif Nağı qəzetimizə açıqlamasında dedi ki, son hadisələr göstərdi ki, Azərbaycan Rusiyanın vasitəçiliyindən imtina etməlidir. Onun sözlərinə görə, ruslar bu münaqişədə həmişə tərəf olublar. Münaqişənin törədicisi də Moskvadır. I Qarabağ müharibəsinin gedişində də dəfələrlə Rusiya proseslərə müdaxilə edib. Azərbaycan üstün gələn zaman Moskva hərbi əməliyyatları dayandırıb, ya da açıq şəkildə Ermənistana hərbi yardım göstərib: "1992-ci ildə Azərbaycan Milli Ordusu uğurlu hərbi əməliyyatlar aparırdı və Xankəndinə yaxınlaşmışdı. Həmin dövrdə Ermənistanın prezidenti olan Levon Ter-Petrosyan təslim olmaq haqqında da fikirləşirdi. Hərbi əməliyyatları dayandırmaq xahişiylə Azərbaycana müxtəlif variantlar təklif etmişdi. Ermənilər artıq məğlubiyyət astanasında idilər. O situasiyada Rusiya məsələyə müdaxilə etdi, Ermənistana külli miqdarda silah-sursatla, hərbi mütəxəssislərlə, hərbçilərlə yardım göstərdi. 1992-ci ildən 1996-cı ilə qədər Moskva Ermənistana 1 milyard dollar məbləğində silah yardımı göstərib və bu, fakt bizə sonradan məlum oldu". Akif Nağı hesab edir ki, son dövrlər Rusiya düşünülməmiş addımlar atır. Rusların Gürcüstana müdaxiləsi, Cənubi Osetiyanın və Abxaziyanın müstəqilliyinin tanıması da düşünülməmiş addımlardır: "Mənim qənaətimə görə, Qərbin üstünlüyü, Rusiya qarşısında bu üstünlüyün artıdığı şəraitdə Rusiya kortəbii, emosional formada, aqoniya vəziyyyətində belə düşünülməmiş addımlar atır. Vaxtilə Almaniyanın kansleri Otto Bismark deyirdi ki, Rusiya ilə zarafat etməyin, o, elə axmaq cavab verər ki, heç kəs baş tapa bilməz. İndi Rusiya axmaqlığın birini edib və bu da azmış kimi onları davam etdirir. Amma son illərin hadisəsi göstərir ki, Qərb birmənalı şəkildə Rusiyanı üstələyir. Qərb Rusiyanı Əfqanıstandan, Balkanlardan, Kosovadan çıxardı və Moskva bu proseslərə heç bir təsir göstərə bilmədi. Bu da ruslarda qıcıq yaradıb. SSRİ-nin varisi sayılan ruslar hegemon dövlətçiliyi davam etdirmək istəyirlər, bu da alınmır". QAT sədri növbəti düşünülməmiş və sarsaq addım kimi Rusiyanın İrəvanı Dağlıq Qarabağdakı ermənilərin "müstəqilliyi"ni tanımağa təhrik edə biləcəyini proqnozlaşdırır. Onun fikrincə, Moskvanın özünün Qarabağ ermənilərini tanıyacağı inandırıcı deyil: "Amma Rusiya Ermənistanın əliylə bu işi görə bilər. Həmin situasiyaya da Azərbaycan hazır olmalıdır. Regionda situasiya gərgindir, müharibə ab-havası var. Bu, heç kəsə sirr deyil ki, Qərblə-Rusiya arasında münasibətlər kəskinləşir, bu münasibətlərin açıq hərbi qarşıdurmaya keçəcəyi ehtimalı da var. Ona görə də Azərbaycan müharibəyə hazır olmalıdır. Ermənistan elə bir axmaq addım atarsa, Azərbaycan torpaqlarını azad etmək üçün dərhal hərbi əməliyyatlara başlamalı, beynəlxalq təşkilatları da qabaqcadan bu istiqamətdə məlumatlandırmalıdır". xalqcebhesi