Rusiya gələcəyini baltaladı Elçin Mirzəbəyli: "Azərbaycan hökuməti Gürcüstanın ərazi bütövlüyünün toxunulmazlığı barədə israrlı mövqeyini davam etdirməlidir" Dünən Rusiya separatçı Cənubi Osetiya və Abxaziyanın müstəqilliyini tanıyıb. Rusiya prezidenti Dmitri Medvedyev bununla bağlı müvafiq sərəncam imzalayıb. Dövlət başçısının bəyanatı ölkə televiziyası ilə yayımlanıb. Məsələylə bağlı BAXCP də mövqeyini açıqlayıb. Partiyanın beynəlxalq məsələlər üzrə katibi Elçin Mirzəbəyli bildirib ki, Rusiyanın addımıpostsovet məkanında, ümumilikdə dünyada münasibətlərin kəskinləşməsinə, süni surətdə qarşıdurma yaradılmasına, separatizmin və onun nəticəsində meydana gələn terrorizmin stimullaşdırılmasına zəmin yaradır. BAXCP Rusiyanın beynəlxalq hüquq normalarının kobud şəkildə pozulmasına, suveren dövlətin ərazi bütövlüyünün təhdid olunmasına xidmət edən hərəkətlərini və təcavüzkar siyasətini qətiyyətlə pisləyir. Rəvan Məmmədli Partiya hesab edir ki, Azərbaycan hökuməti Gürcüstanın ərazi bütövlüyünün toxunulmazlığı barədə israrlı mövqeyini davam etdirməlidir: "Yaranmış vəziyyətlə bağlı MDB-nin növbədənkənar sammitinin çağrılmasına ehtiyac var. Bu sammitdə Gürcüstanla bağlı vəziyyət müzakirəyə çıxarılmalı, Rusiyanın MDB-yə üzv ölkələrin ərazi bütövlüyü ilə bağlı mövqeyinə bir daha aydınlıq gətirməlidir. Əks təqdirdə Azərbaycanın onsuz da ölü quruma çevrilən bir təşkilatda qalmasına heç bir ehtiyac yoxdur". Bəs proseslərin bu gedişatı Rusiyanın öz gələcəyi üçün nə dərəcədə məqsədəuyğundur? Qeyd edək ki, Rusiyada çoxlu sayda muxtar respublikalar, vilayətlər, qurumlar var. Bu sırada Tatarıstan, Çeçenistan, İnquşetiya, Dağıstan, Dağıstan, Başqırdıstan, Saxa (Yakutiya), Kabardin-Balkar, Adıgey, Kareliya, Komi, Şimali Osetiya respublikalarının, Xantı-Mansiysk, Taymır, Koryaksk, Ordınsk Buryatsk, Givennkiysk muxtar dairələrinin və digərlərinin adlarını çəkmək olar. Bütün bunlar isə göstərir ki, Rusiya əslində ağılsızcısanı məhz öz gələcəyini baltalayır. Politoloq Zərdüşt Əlizadə vurğulayır ki, əslində beynəlxalq hüquqda ərazi bütövlüyünün təftişinə başlanması ilk növbədə Rusiya, Çin, Hindistan kimi ABŞ-a, Qərbə rəqib ola biləcək böyük, etnik çoxluğa malik dövlətlərin parçalanmasına yönəlib və Rusiya da öz addımları ilə bu tələyə düşdüyünü göstərir. Həm də Çeçenistanda müqavimət hərəkatının birtəhər yatırılmasından o qədər də vaxt keçməyib. Tatarıstanda da "sular hələ ki, durulmayıb". Politoloq Rasim Musabəyov da hesab edir ki, Abxaziya və Cənubi Osetiyanın tanınmasıyla Moskva üçün riskli addım atıb. Onun sözlərinə görə, məsələnin Rusiyanın özünün başını ağrıdacağı şübhə doğurmur. Proseslərin gedişatı göstərir ki, Rusiya Dağlıq Qarabağla bağlı da gələcəkdə xam xəyala düşə bilər. Məhz bu prosesi önləmək üçün Qərbdə, Türkiyədə, o cümlədən Azərbaycanda ən azı ictimai səviyyədə Rusiyadakı muxtar qurumların tanınmasının zəruriliyi yönündə müzakirələrin aparılması məqsədəuyğun olardı. ADP sədri Sərdar Cəlaloğlu da hesab edir ki, Qərb zamanında səhvə, boşluğa yol verib: "Çeçenistan məsələsi çox tez yaddan çıxdı. Bu, səhv idi. Rusiyadakı muxtar qurumlar, bu ölkədə insan hüquq azadlıqlarının tanınması diqqət mərkəzində olmalıdır. Bu halda Rusiya zaman-zaman aqressiv davranışlarından geri çəkilmək məcburiyyətində qalacaq". xalqcebhesi