AZƏRBAYCANLILAR AMERİKAYA PREZİDENT SEÇİR Respondentlər Con Makkeynə etimad göstərir Amerikada keçiriləcək prezident seçkilərinə az müddət qalıb. Amerikada prezidentlik uğrunda Respublikaçılar Partiyasından Con Makkeyn və Demokratlar Partiyasından isə Barak Obama mübarizə aparır. Qeyd edək ki, ölkə mətbuatında hər iki namizəd haqqında kifayət qədər məlumat verilib. Namizədlərin daxili və xarici siyasətdə tutacaqları mövqe bir çoxlarına məlumdur. Gürcüstanda baş verən məlum olaylardan sonra hər iki namizədin ortaya qoyduğu mövqe onlar arasında seçimə bir daha imkan yaradıb. Makkeynin Rusiyanın işğalçılıq mövqeyini kəskin tənqid etməsi dünya ictimaiyyətinin ona qarşı rəğbətini artırdı. ABŞ prezidentliyinə namizədlərə ölkə vətəndaşlarının münasibətinin necə olduğuna aydınlıq gətirmək məqsədilə kiçik sorğu keçirdik. “Amerika vətəndaşı olsaydınız, hansı namizədə səs verərdiniz” sualı ilə respondentlərə müraciət etdik. Yalçın Abbaslı bildirdi ki, əgər o, Amerika vətəndaşı olsaydı, Con Makkeynə səs verərdi: “Con Makkeyn Azərbaycanda demokratiyaya dəstək verən siyasətçilərdən olub. O həm də 2003-cü ildə keçirilən prezident seçkilərində saxtakarlığa qarşı kəskin etirazını bildirən ilk şəxs kimi yaddaşda qalıb. Səhv etmirəmsə, Senatda da bu məsələni qaldırmış, Azərbaycanda təkrar seçkilərin keçirilməsi tələbi ilə çıxış etmiş və total saxtakarlığı pisləmişdi. İndinin özündə də Makkeynin yürütdüyü siyasətdə demokratiyaya üstünlük verir. O həm də Rusiyaya qarşı sərt mövqeyi olan siyasətçidir. İnanıram ki, Makkeyn qələbə çalacaq. Gürcüstan hadisələrində də o, Rusiyaya qarşı sərt mövqeyi ilə digər siyasətçilərdən seçildi. Bu da onun reytinqini artırdı və hazırda o, Barak Obamadan irəlidədir. Makkeynin prezident seçilməsi Azərbaycan üçün də sərfəlidir. İnanıram ki, o, Azərbaycanda demokratiyaya dəstək verənlər arasında birinci olacaq”. Şakir Abdulla da Con Makkeyni dəstəklədiyini söylədi: “Əgər Amerikada yaşasaydım və həmin ölkənin vətəndaşı olsaydım namizədlərdən Makkeynə səs verərdim. Mən onun çıxışlarını dinləyirəm və o, demokratik dəyərlərə çox üstünlük verir. Makkeyn Rusiyanın Gürcüstana təcavüzünü pisləy və bu barədə qəti ölçü götürülməsini tələb edir. Onun bu keyfiyyətlərini yüksək qiymətləndirirəm. İnanıram ki, Makkeyn prezident olsa, bölgədə demokratiyanın inkişaf etdirilməsi uğrunda daha çox işlər görə bilər”. Ümid Partiyasının mətbuat məsələləri üzrə müavini Şəbnəm Bəkirzadə əvvəllər Hillari Klintonu dəstəklədiyini bildirdi: “Hillari Klintona səs verərdim. Amerika tarixində nə qadın, nə də qaradərili prezident olub. Amma məni narahat edən bir məqam var. Əgər Amerikanın prezidenti qaradərili olsa, o illərin əsarətini fəaliyyətində biruzə verər. Bu səbəbdən də iki seçim arasında qalsaydım Makkeynə səs verərdim”. Ş.Bəkirzadə Amerikalı namizədlərin çıxışlarını və verdikləri bəyanatları izlədiyini söylədi: “Onlar daha çox erməni diasporunun yanında görsənirlər. Mənə elə gəlir bu siyasi revanşdır. Bill Klinton da, Corc Buş da prezident seçilməmişdən əvvəl eyni bəyanatları səsləndirirdilər. Amma onların heç biri verdikləri bəyanatları doğrultmadılar. Bunlar hamısı seçkiyə hesablanmış çıxışlardır. Amma tərcümeyi-halına, indiki dövrə qədərki fəaliyyətinə nəzər saldıqda Makkeyni daha uğurlu namizəd hesab edirəm”. “Çağrı” Gənclər Hərəkatının rəhbəri Əhəd Məmmədli əvvəllər demokratlara simpatiyasının olduğunu bildirdi: “Həmişə demokratlara rəğbət bəsləmişəm. Albert Qor prezident seçkilərində uduzanda çox məyus olmuşdum. Amma bu seçkilərdə səsimi respublikaçıların namizədinə verərdim. Çünki Barak Obamanın Yaxın Şərq, Qafqaz və MDB məkanı istiqamətində yürütdüyü xarici siyasəti çox zəifdir. Mənə elə gəlir ki, rus basqısına qarşı müqavimət göstərən təcrübəli siyasətçi lazımdır. Bu isə Con Makkeyndir”. Leyla İLQAR musavat