RƏSMİ BAKI TÜRKİYƏ-ERMƏNİSTAN ƏLAQƏLƏRİNDƏN XƏBƏRSİZDİR Xəzər İbrahim: “Bu barədə bizdə rəsmi məlumat yoxdur” Rasim Musabəyov: “Türkiyə ilə Ermənistan arasında birbaşa təyyarə reysləri çoxdan var” Türkiyənin Gürcüstan ətrafında yaranmış böhrandan istifadə edərək Ermənistanla münasibətləri yumşaltdığı barədə xəbərlər ölkəmizdə narahatlıq yaradır. Qeyd edək ki, Türkiyənin Ermənistana uçan təyyarələrə öz hava məkanını açıq elan etdiyi barədə növbəti xəbəri qardaş ölkə mediası yayıb. Xəbərlərə görə, Ankara bu addımı Gürcüstana humanitar yardımların çatdırılmasını asanlaşdırmaq üçün atıb. Məqalə müəllifi yazır ki, Ankaranın bu addımı İrəvana barışıq üçün verilən növbəti mesajdır. Əslində Ermənistan prezidenti Serj Sərkisyanın türkiyəli həmkarı Abdullah Gülü İrəvana futbol oyununa baxmağa dəvət etməsindən və Gülün hələ ki bu dəvəti dəyərləndirdiyi barədə açıqlama verməsi şəraitində növbəti addımların atılacağı gözlənilirdi. Üstəlik Gürcüstanda böhrandan sonra Türkiyənin Qafqazda sülh və təhlükəsizlik platforması yaradılması ideyasını ortaya atması şəraitində Ermənistana yönəlik istənilən mesajlar təbii qəbul oluna bilər. Ancaq rəsmi Bakı hələ ki bunlardan bixəbərdir. Məsələyə münasibətini öyrəndiyimiz XİN-in mətbuat katibi Xəzər İbrahim bildirdi ki, bu barədə onda məlumat yoxdur:"Hansısa türk qəzetində nəsə yazıla bilər. Amma mən rəsmi şəkildə belə bir məlumat eşitməmişəm. Adətən belə addımlar atılanda rəsmi mövqe bildirilir. Yəni hansısa dövlət buna bənzər addım atanda bəyan edir ki, biz bunu edirik. Amma belə bir məlumatı görməmişəm. Əgər biz onu görsək, onda bəli, müvafiq reaksiyamız ola bilər. İndiki halda münasibət bildirməyimiz isə düzgün deyil". Ümumilikdə Türkiyənin Ermənistanla münasibətləri yumşaltmaq xətti götürməsi rəsmi Bakını narahat edirmi? X.İbrahim: "Türkiyənin rəsmi mövqeyi var və baş nazir Ərdoğan Azərbaycana etdiyi son səfərində birmənalı şəkildə öz mövqeyini bildirdi. Digər tərəfdən, heç bir dövlət fərziyyələrlə öz siyasətini normal apara bilməz. Ona görə də hansısa faktlar olanda təbii ki, biz ona öz mövqeyimizi bildiririk və müvafiq addımlar atırıq". Politoloq Rasim Musabəyov isə bu barədə xəbərin sensasiya kimi təqdim olunmasından təəccübləndiyini bildirdi:"İstanbuldan İrəvana bilavasitə uçan reyslər var. Özü də bu reyslər çoxdan açılıb. İndi burda hava sərhədlərinin açıldığı barədə söhbətlərin mənasını başa düşmürəm. Türkiyənin hava məkanı Ermənistanın üzünə nəinki açıqdır, üstəgəl İrəvan-İstanbul təyyarə reysi var və həftədə bir neçə dəfə uçuşlar həyata keçirilir. Vaxtilə Türkiyə Ermənistan təyyarələrinə hava dəhlizi vermirdi. O zaman ABŞ təzyiq etdi ki, humanitar yardımları çatdırmaq üçün bu dəhliz açılmalıdır. Bu, hardasa 10 il əvvəl olub. Sonra isə ikinci addım kimi Türkiyədən Ermənistana təyyarələrin birbaşa uçuşuna da icazə verildi". R.Musabəyova görə, ola bilsin bu uçuşlara şirkətlər səviyyəsində icazə verilib:"Dövlətlərarası münasibət olmadığı üçün bu, şirkətlər səviyyəsində də həyata keçirilə bilər". Politoloq məsələyə geniş prizmadan yanaşmağı da zəruri sayır: "Faktiki olaraq bu gün Ermənistanın blokadası daha da sərtləşib. Rusiya isə Ermənistanı blokadadan çıxarmaqdan ötrü Gürcüstanın içindən bu ölkəyə dəhliz açmaq istəyir. Bu bəhanələri aradan götürmək üçün Türkiyə Ermənistanla münasibətləri yumşaldır. Mükündür ki, Ərdoğan Moskvaya gedib-gələndən sonra münasiəti yumşaltmaq və bəhanələri aradan götürmək üçün müəyyən addımlara ehtiyac görüb. Ancaq Türkiyə istədiyi vaxt münasibəti sərtləşdirə bilər". Ekspert bu vəziyyətin Azərbaycanda narahatçılıqla qarşılanmasını da təbii sayır: "Ancaq bizim heç bir halda Türkiyədən dövlət və millət kimi küsməyə ixtiyarımız yoxdur. Türkiyədən başqa bu dünyada bizim dostumuzun olmadığını unutmamalıyıq. Hökumətin səhv siyasətinə qarşı münasibətimiz dəyişə bilər. Ancaq heç bir halda bu, dövlətə və millətə qarşı münasibətə çevrilməməlidir". Cavid TURAN musavat