2012-ci ildə Aşqabat dünyanın super şəhərinə çevriləcək Müstəqilliyini əldə etdikdən sonra ölkənin ana şəhəri Aşqabatın dünyanın ən müasir şəhərlərindən birinə çevrilməsi üçün Türkmənistan rəhbərliyinin göstərdiyi səylər davam etməkdədir. Bu baxımdan bir neçə gün əvvəl Türkmənistan Prezidenti Qurbanqulu Berdımuxammedov tərəfindən imzalanan “2008-2012-ci illərdə Aşqabatın sosial-iqtisadi inkişafı Konsepsiyası” diqqəti cəlb edib. Konsepsiyada 2012-ci ilə kimi Aşqabatın dünyanın ən müasir şəhərlərindən birinə çevrilməsi, onun bölgədə siyasi, mədəni, elmi-texniki mərkəz kimi mühüm rol oynamasının təmin edilməsi nəzərdə tutulub. Bunun üçün şəhərdə müasir texnologiyaların tətbiqi və bu məqsədlə elmin son nailiyyətlərinə əsaslanan elektrik avadanlıqları zavodunun inşa edilməsi, kompyuter istehsalı müəssisəsinin istifadəyə verilməsi, bir sıra texniki mərkəzlərin açılması və həmin müəssisələrdə yüzlərlə insanın müasir texniki biliklərə yiyələnməsini təmin etmək nəzərdə tutulub. Bundan əlavə, Aşqabatın texnopolis şəhərə çevrilməsi məqsədi ilə orada kondisioner istehsalı, ölkənin tibbi dərmanlara olan ehtiyacının ödənilməsi üçün dərman zavodunun inşası planlaşdırılıb. Ölkədə yüngül sənayenin böyük imkanlarının olduğunu nəzərə alaraq, bu sahədə də ən müasir fabriklərin işə salınması və hazırda fəaliyyət göstərən bu tipli müəssisələrin müasir texnoloji avadanlıqlarla təchiz edilməsi də konsepsiyada əksini tapıb. Bu məqsədlə Aşqabatda xarici ölkələrin tanınmış şirkətləri ilə birgə müəssisələr yaradılması gözlənilir. Yaxın 4 ildə əsas diqqət ölkənin ana şəhərin Marı, Türkmənabad, Daşoğuz və digər şəhərləri ilə birləşdirən avtomobil yollarının dünya standartlarına uyğun şəkildə yenidən qurulması da planlaşdırılıb. Paytaxtda və onu ölkənin şəhərləri ilə birləşdirən yollarda sərnişin daşımaları zamanı yeni avtobuslardan istifadə ediləcək. Bu məqsədlə xaricdən yüzlərlə yeni avtobus və marşrutlarda taksi kimi istifadə ediləcək digər maşınlar alınacaq. Aşqabatın dünyanın müxtəlif avtovağzalları ilə birbaşa əlaqəsini təmin edəcək, eyni zamanda sərnişin və yük daşımalarını nəzarətdə saxlaya biləcək loqistik mərkəz və beynəlxalq internet saytlarına istənilən anda çıxmağa və onlarla əlaqə yaratmağa imkan verəcək kompyuter mərkəzləri yaradılacaq. Bunun üçün paytaxtın ətrafında dünyada analoqu olmayan avtovağzal kompleksinin inşası üçün hazırda tanınmış xarici ölkə şirkətləri ilə danışıqlar aparılır. Aşqabatda 2012-ci ilə kimi 95,2 min nömrəli yeni müasir telefon stansiyalarının quraşdırılması, mobil telefon istifadəçilərinin sayının 250 min nəfər, internetdən istifadə edənlərin sayının isə 247 min nəfər artırılması üçün tədbirlər həyata keçiriləcək. Aşqabatın cənubunda Kopetdağın ətəklərində 211 metr hündürlüyü və 61 min kvadratmetr sahəsi olacaq müasir teleqüllənin ucaldılması barədə artıq bəzi xarici şirkətlərlə ilkin razılıq əldə edilib. Buna paralel olaraq, yaxın bir neçə ildə Aşqabatda100 milyon ABŞ dolları dəyərində 35 yaşayış binası inşa ediləcək. 2012-ci ilə kimi paytaxtda məktəbəqədər uşaq müəssisələrinin sayının artırılmasına xidmət edəcək 34 məktəbəqədər uşaq müəssisəsi tikiləcək.