Dünya iki cəbhəyə ayrılır? Gürcüstanda yaşanan müharibə səbəbindən bölgədəki atmosfer hələ də sakitləşmədiyi kimi, gürcüləri dəstəkləyən ABŞ ilə Rusiya ətrafında birləşən qruplar, "2-ci Soyuq Müharibə başlayır" siqnalını verir QayNar: Gürcüstan ilə Rusiya arasında Cənubi Osetiya səbəbindən yaşanan müharibə, bölgədəki durumu mürəkkəbləşdirməklə yanaşı, eyni zamanda 2-ci Dünya Müharibəsindən sonra dünyanı dəmir pərdə ilə iki hissəyə ayıran Soyuq Müharibəni də "yuxusundan oyandırdı". "Independent", Suriyanın dövlət başçısı Bəşşar Əsadın Rusiyaya ötən günlərdə etdiyi ziyarət zamanı Moskvaya verdiyi dəstək ilə Soyuq Müharibədən bu yana unudulan strateji ortaqlığın yenidən başladığını yazdı. QayNar.info-nun verdiyi xəbərə görə, ABŞ-ın raket müdafiəsi razılaşmasını imzaladığı Polşa, keçmiş sovet ölkələrindən Gürcüstan və Ukrayna ilə İsrail Amerikanın yanında yer aldığı halda, Suriya, İran və Belorus ruslara dəstək verir. Bu arada Rusiya ilə Suriya arasında silah anlaşması edildiyi yönündə ortaya atılan iddialar, ABŞ başda olmaqla, Qərb dünyasını narahat etdiyi halda, Suriya, Amerikanın Şərqi Avropaya yerləşdirməyi planlaşdırdığı raket müdafiəsi siteminə qarşılıq olaraq, Şam hökumətinin rus raketlərinə ev sahibliyi etməyi qəbul etdiyi xəbərlərinin yalan olduğunu açıqladı. Əsad ilə Rusiya dövlət başçısı Dmitri Medvedev arasında keçirilən görüşlərdə belə bir məsələnin gündəmə gəlmədiyi bildirildi. QayNar.info-nun məlumatına görə, Suriyanın Rusiyaya olan dəstəyini açıqlamasının əks-sədaları davam etdiyi kimi, ABŞ-ın, Suriya ilə İsrail arasındakı sülh danışıqlarını dayandırmaq üçün Türkiyə və İsrailə basqı etdiyi iddia edildi. "Əl Bəyan" qəzetinə görə, ABŞ hökuməti, Suriya ilə İsrail arasında Türkiyənin vasitəçiliyi ilə İstanbulda keçirilən dolayı görüşlərin bitirilməsini istəyir. Digər tərəfdən Ağ Ev, ABŞ prezidenti Corc Buş ilə Fransa dövlət başçısı Sarkozinin, Rusiyanın Gürcüstan ilə qəbul olunan razılaşmaya riayət etmədiyi məsələsində həmfikir olduğunu açıqladı. 1. ABŞ - Prezident Corc Buş, ABŞ-ın Gürcüstanın müstəqillik və ərazi bütövlüyünə zəmanət verilməsi üçün müttəfiqləri ilə birlikdə çalışmasına üstünlük verir. 2. Polşa - ABŞ və Polşa, Rusiyanın güclü etirazlarına baxmayaraq raket müdafiəsi anlaşmasına imza atdı. Anlaşma, Polşada 10 raket müdafiəsi sistemi qurulmasını nəzərdə tutur. 3. Ukrayna - Ukrayna lideri Yuşşenko, Rusiyaya qarşı keçmiş Şərq Bloku ölkələri ilə ortaq bir mövqe tutdu. Xarici İşlər Nazirliyi, Rusiyadan Krım bölgəsindəki flotunu çəkməsini istəyir. 4. Gürcüstan - Gürcüstan dövlət başçısı Saakaşvili, Avropa Birliyi və ABŞ-ın, Rusiyanın Gürcüstandan çıxmasını təmin etməsi və növbəti təcavüzkar hərəkətlərinə son verməsini istəyir. 5. İsrail - İsrailin Gürcüstanı silah-sursatla təmin etdiyi iddia edilir. Hadisələrin inkişafından narahatlıq keçirən Tel Əviv, Rusiyanın Suriyaya uzun məsafəli raket satmasına qarşıdır. 6. Suriya - Suriya lideri Əsad, Soçidə Medvedev ilə görüşü zamanı, "Suriya, dünyadakı təhlükəsizlik üçün Suriya-Rusiya arasındakı işbirliyinin inkişaf etdirilməsi tərəfdarıdır" demişdi. 7. İran - ABŞ-ın Gürcüstan yolu ilə İrana təsir göstərmək məqsədində olduğu iddia edilir. Moskva, İranın yaxın müttəfiqi olan Suriya ilə silah ticarətini canlandırmaya çalışmaqda günahlandırılır. 8. Belarus - Rusiya, ABŞ-ın Polşa və Çex Respublikasında raket müdafiəsi qurma anlaşmalarına qarşılıq olaraq, Belarus ilə eyni - raket müdafiəsi məsələsində anlaşmışdı. 9. Rusiya - Gürcüstandakı müharibədən sonra Orta Şərq ölkələri ilə yaxınlaşmasını davam etdirən Rusiya, Qara dənizə müharibə gəmisi göndərən ABŞ-ın cəhdini qayğı ilə qarşılayır. //Rəşad Səfərov, QayNar