Rusiya əsgərləri neft limanı Potidə səngərləniblər Rusiya qoşunları bu gün yenidən Gürcüstanın ən mühüm Qara Dəniz limanı olan Potinin girəcəyində mövqe tutublar. Xəbər verilir ki, rus əsgərləri şəhərin girəcəyində səngər qazır və topların ağzını şəhərə doğru çevirirlər. Rusiyanın bir-neçə zirehli maşını Potiyə gedən yeganə quru yolundakı körpünü bağlayıb. Zirehlilərin başqa bir qrupu meşə yaxınlığında mövqe tutub. “Rusiya dünyanı barmağına dolayıb” Bir sıra müşahidəçilər Rusiya prezidenti Dmitri Medvedevin Rusiya qoşunlarını Gürcüstandan cümə gününədək çıxarmaq vədinə baxmayaraq Rusiya hərbçilərinin daha uzunmüddətli işğala hazırlaşdıqlarını bildirirlər. Gürcüstan prezidenti Mixeil Saakaşvili deyib ki, Rusiya hərbi qüvvəsi bir sıra yerlərdə əsgərlərin və texnikanın sayını azaltsa da, əvəzində başqa, yeni strateji məntəqələrdə mövqelərini möhkəmlədir. O deyib ki, “ruslar dünyanı barmaqlarına dolayıblar”. Avropa İttifaqı tərəfindən dəstəklənən sülh sazişinə əsasən istər ruslar, istərsə də gürcülər öz hərbi qüvvələrini 7 avqust münaqişəsindən əvvəlki mövqelərinə çəkməlidirlər. Bu müqaviləyə əsasən Rusiya hərbi qüvvələrinə həmçinin Cənubi Osetiyanı dövrələyən 7 kilometrlik zolaqda qalmaq icazəsi verilir. Lakin Gürcüstanın Poti limanı Cənubi Osetiyadan 150 kilometr aralıdadır. Rusiya əsgərləri həmçinin tərk etdiklərini iddia etdikləri Qori şəhərinin həndəvərlərində də mövqelərini möhkəmlədirlər. Paytaxt Tbilisinin 50 kilometrliyində olan İqoeti məntəqəsində də eyni vəziyyət hökm sürür. Rusiyanın Gürcüstanın ərazisi olan Cənubi Osetiyada 18 zastava qurmaq niyyəti Moskvanın bu bölgədə bəlkə də həmişəlik qalmaq niyyətindən xəbər verir. Başqa bir separatçı region – Abxaziya Rusiyaya müraciət edərək müstəqilliyinin tanınmasına çağırıb. Qərb isə bu mövqedədir ki, istər Cənubi Osetiya, istərsə də Abxaziya Gürcüstan ərazisi olaraq qalmalıdır. Bu arada Röter agentliyi Rusiya qoşunlarının və ağır texnikasının Cənubi Osetiyadan Rusiyaya tərəf çıxdığını xəbər verir. Agentliyin operatoru Cənubi Osetiyanın baş şəhəri Tsxinvalidə cümə axşamı onlarca Rusiya tankının cənubdan qayıtmasını görüb. İnterfaks agentliyi isə xəbər verir ki, tanklardan və zirehlililərdən ibarət karvan üzü şimala – Rusiyaya doğru hərəkət edir. Rusları ləngidən yağmaladıqları texnikadır Bu arada Röyter maraqlı bir məlumat verib. Agentliyin Rusiya-Cənubi Osetiya sərhədində yerləşən Verxni zaramaq kəndindəki müxbiri bildirir ki, ruslar hazırda Gürcüstan ordusundan ələ keçirdikləri ağır texnikanı Rusiyaya daşımaqla məşğuldurlar. O, 7 ZTR-in və 3 T-72 döyüş tankının aparılmasının şəxsən şahidi olub. Bundan əvvəlki xəbərlərdə rusların 40-dək yük maşınını çəkib apardıqları xəbər verilirdi. Diplomatiyanın çətinlikləri Avropa İttifaqı diplomatlarını ən çox maraqlandıran cəhət Rusiyanın BMT Təhlükəsizlik Şurasının Fransa tərəfindən təklif olunmuş qətnaməsini rədd etməsinin səbəbləridir. Halbuki bu qətnamə əsas etibarilə rusların artıq imzaladıqları 6 bəndli Sarkozi planının təkrarı idi. Qərb diplomatları narahatdırlar ki, Moskva artıq həmin sülh planında ona Gürcüstanda daha uzun müddətə qalmaq imkanı verən zəif müddəalar tapıb. Rusiyanın ən mühüm ticarət partnyoru olan Almaniya Gücüstandakı vəziyyəti tamamilə qeyri-qənaətbəxş adlandırıb. Ağ Evin sözçüsü Qordon Condrou bəyan edib ki, Gürcüstanı tərk etmək üçün ruslara heç bir əlavə vaxt tanınmamalıdır. İndi bir çox diplomatlar Rusiyanın əraziyə gətirdiyi bu qədər top-tüfəngi cümə gününüədək çıxarıb qurtara bilməyəcəyinə inanırlar. Diplomatik dartışmalara baxmayaraq Rusiyanın NATO-dakı səfiri bildirib ki, Moskva üçün NATO ilə münasibətlər həyati əhəmiyyətini saxlayır. Dmitri Roqozin deyib ki, “Soyuq Müharibənin bərpasından söz gedə bilməz”. Rusiya rəsmi qaydada Gürcüstana hücum əməliyyatında 64 hərbçisini itirdiyi xəbər verib. Tbilsinin itkiləri 215-dir, bunlardan 69 mülki şəxslərdir. Amerika Gürcüstanı tək qoymayacaq General John Craddock Amerika Birləşmiş Ştatları münaqişədən sonra Gürcüstanın hərbi qüdrətinin bərpasına kömək göstərəcək. Bu barədə məlumatı Amerika generalı John Craddock (Con Krəddok) verib. O deyib ki, “biz Gürcüstana ən azı terrorla müharibədə tərəfdaşımız kimi yardım göstərməliyik”. “Heç şübhəsiz onlar belə bir köməklik üçün özləri də bizə müraciət edəcəklər”,- deyib general. Gürcüstana səfərə hazırlaşan general Craddock bildirib ki, o, səfərdə ikən Gürcüstanın ehtiyaclarını öyrənəcək. bbc